Chasikhar Dringrim (junior) Shedra, Chasikhar Gewog, Mongar

༉ ལྕགས་ས་མཁར་ཨྱོན་མདོ་སྔགས་བཤད་སྒྲུབ་ཆོས་འཁོར་གླིང་འབྲིང་རིམ་བཤད་གྲྭའི་ཆགས་རབས་དང་འབྲེལ་བའི་ལོ་རྒྱུས།
༡༽ མོང་སྒར་རྫོང་ཁག་ ལྕགས་ས་མཁར་རྒེད་འོག་གི་མངའ་འོག་ལུ་ཡོད་པའི་ ལྕགས་ས་མཁར་ཨྱོན་མདོ་སྔགས་བཤད་སྒྲུབ་ཆོས་འཁོར་གླིང་འབྲིང་རིམ་བཤད་གྲྭ་འདི་ སྤྱི་ལོ་ ༡༩༩༣ ལས་བླམ་ཕུན་ཚོགས་རྡོ་རྗེ་གིས་ བསྟན་པ་སྤྱི་དང་ དགོས་སུ་ལྕགས་ས་མཁར་གཡུས་འདི་ནང་ གསོན་གཤིན་གཉིས་རིམ་འགྲོ་དང་དགེ་རྩེ་སྒྲུབ་ནི་ལུ་ཕན་ཐབས་རྒྱ་ཆེ་ས་ལས་གཟིགས་ཞིནམ་ལས་སྒོམ་སྡེ་གཅིག་འགོ་གཞི་བཙུགས་གནང་ནུག དེ་གི་ཤུལ་ལས་ སྤྱི་ལོ་ ༡༩༩༥ ལས་ད་ལྟོ་ཡོད་མི་གཙུག་ལག་ཁང་འདི་བཞེངས་ནི་འགོ་བཙུགས་ སྤྱི་ལོ་ ༡༩༩༦ ལས་བཤད་གྲྭ་གཞི་བཙུགས་མཛད་གནང་སྟེ་ སྤྱི་ལོ་ ༢༠༠༠ ལུ་གཙུག་ལག་ཁང་འདི་ཕྱི་ནང་གཉིས་ཆ་རང་སྒྲུབས་གནང་ནུག དེ་བསྒང་མཐུན་རྐྱེན་ཉག་ཕྲ་བའི་རྐྱེན་གྱིས་ བཤད་གྲྭའི་སློབ་གཉེར་བ་ཚུ་ལུ་འཚོ་བ་ཡོ་བྱད་ཀྱི་དཀའ་ངལ་མཐོན་ཏེ་ ད་ལྟོ་ཞལ་བཞུགས་པའི་༸སྐྱབས་རྗེ་སྒང་སྤྲུལ་རིན་པོ་ཆེ་མཆོག་ལུ་ཕུལ་ཞིནམ་ལས་ སྐྱབས་རྗེ་མཆོག་གིས་ཡང་ འཛིན་རིམ་བཞི་པ་ཚུན་རྒྱ་སྐྱེད་མཛད་གནང་ཡོདཔ་མ་ཚད་ བཤད་གྲྭའི་དབུ་འཛིན་ཡང་ སྒང་སྟེང་མཐོ་སློབ་ཆེན་མོ་ལས་ སླབ་པ་མཐར་སོན་པའི་མཁན་སློབ་ཚུ་རིམ་པར་བསྐོས་གནང་ཡོདཔ་ཨིན།
༢༽ ད་ལྟོ་འཛིན་སྐྱོང་གནང་ཕྱོགས་ཀྱི་སྐོར།
དེ་ཡང་འཛིན་སྐྱོང་གི་ལམ་ལུགས་ཚུ་ མཐོ་སློབ་ཆེན་མོ་ནང་ག་གནང་དོ་བཟུམ་སྦེ་རང་གནང་དོ་ཡོདཔ་ཨིནམ་མ་ཚད་ འཛིན་སྐྱོང་གཙོ་བོ་འདི་ བཤད་གྲྭའི་དབུ་འཛིན་མཁན་པོ་སངས་རྒྱས་བསྟན་འཛིན་གྱིས་གཙོ་བོར་མཛད་དེ་ སློབ་དཔོན་ཚུ་གིས་ཡང་ སློབ་གཉེར་བ་ཚུའི་ཤེས་ཡོན་ཡང་རྒྱས་བཏང་ཕྱོགས་ཀྱི་འགན་འཛིན་གནང་དགོཔ་ཨིན། བཤད་གྲྭ་འདི་ནང་གཞི་རིམ་དང་པོ་ལས་འགོ་བཙུགས་འཛིན་གྲྭ་བཞི་པ་ཚུན་ཡོདཔ་ད་ སློབ་ཕྲུག་ཚུ་ལུ་ཤེས་ཡོན་སྤྲོད་མི་ དབུ་འཛིན་མཁན་པོ་གཅིག་ སློབ་དཔོན་བཞི་གིས་ གནང་བཞིན་ཡོདཔ་ཨིན།
༣༽ ལོ་ལྟར་དུས་མཆོད་འབུམ་སྡེའི་སྐོར།
དེ་ཡང་ སྤྱིར་གཡུས་འདི་ནང་གི་མི་སེར་ཚུ་གི་གསོན་པའི་རིམ་འགྲོ་དང་གཤིན་པོའི་དགེ་རྩ་སྒྲུབ་ནི་དང་ ཡར་ངོ་མར་ངོའི་ཚེས་བཅུ་ཚུ་གནངམ་ཨིནམ་ད། རང་ཟླ་གསུམ་པའི་ནང་རྒྱལ་བའི་བཀའ་འགྱུར་ཆེན་མོ་དག་ཚར་གཅིག་ ཟླ་ལྔ་པའི་ནང་སྤྲེལ་ཟླ་ཚེས་བཅུ་ ཟླ་བཅུ་པའི་ཚེས་ ༡༣ ལས་ ༡༥ ཚུན་ ཉིན་གྲངས་གསུམ་གྱི་རིང་ཚེས་བཅུ་དང་ ཟླ་འདིའི་ཚེས་ ༢༧ ལས་ ༢༩ ཚུན་བཀའ་བརྒྱད་ཀྱི་གཏོར་བཟློག་འདི་ལྕགས་ས་མཁར་དམངས་ཀྱི་རིམ་འགྲོ་དང་ ཟླ་བཅུ་གཅིག་པའི་ཚེས་ ༡༣ ལས་ ༡༧ ཚུན་ཉིན་གྲངས་ལྔའི་རིང་ལོ་ལྟར་བཞིན་དུ་གནང་དོ་ཡོདཔ་ཨིན།