སྤ་གྲོ་སྨན་རི་དགོན་པའི་ལོ་རྒྱུས།
སྨན་རི་དགོན་པ་འདི་དུས་རབས་ ༡༥ པའི་ནང་ལུ་གྲུབ་དབང་རིན་ཆེན་ཆོས་རྡོར་གྱིས་ཕྱག་བཏབ་གནང་ནུག །གྲུབ་དབང་རིན་པོ་ཆེའམ་མཚན་གཞན་བླམ་དྲུང་དྲུང་ཟེར་ཞུ་མི་འདི་སྤ་རོ་ལས་རིགས་རུས་མཐོ་བའི་མི་ཚན་ཅིག་ནང་ལས་སྐུ་འཁྲུངས་ཡོདཔ་དང་། ཕྱག་རྫོགས་གཉིས་ཟུང་འཇུག་སྦེ་ཉམས་ལེན་གནང་མི་བླམ་གྲུབ་ཐོབ་ཅིག་ཨིནམ་མ་ཚད་སྔོན་དུས་རབས་ ༧ པའི་ནང་ལུ་བོད་ཆོས་རྒྱལ་སྲོང་བཙན་སྒམ་པོའི་ཆོས་བློན་མགར་བ་སྟོང་བཙན་གྱི་སྐྱེ་མཐའ་ལྷ་ལུང་དཔལ་གྱི་རྡོ་རྗེའི་སྐྱེ་བ་ཕྱི་མ་གསང་བདག་ཕྱག་ན་རྡོ་རྗེའི་སྤྲུལ་པ་ཀུན་མཁྱེན་ཀློང་ཆེན་རབ་འབྱམས་ཀྱི་དངོས་སློབ་སྤྲུལ་སྐུ་དཔལ་འབྱོར་རྒྱལ་མཚན་གྱི་སྐུའི་སྐྱེ་བ་ཡང་ཨིནམ་ལས་གདུང་བརྒྱུད་ཀྱི་ཆེ་བ་ཡང་ཁྱད་པར་དུ་འཕགས་པ་ཨིན་མས། ལྷག་པར་དུ་གཏེར་སྟོན་པདྨ་གླིང་པའི་ཞབས་སར་བཅར་ཏེ་པད་གླིང་གཏེར་ཆོས་ཚུ་རིམ་པ་བཞིན་དུ་ཞུས་ཏེ་ཟབ་ཆོས་རྫོགས་པ་ཆེན་པོ་ཉམས་ལེན་གནང་བཞུགསཔ་ད། གཏེར་སྟོན་གྱིས་མ་འོངས་པ་ན་སློབ་མ་གཏེར་སྟོན་རྣམ་གཉིས་འབྱུང་ནི་ཨིན་པའི་ལུང་བསྟན་གནང་མི་དང་བཅས། པད་གླིང་གཏེར་ཆོས་བླ་རྫོགས་ཐུགས་གསུམ་གྱི་ནང་ལས་རྫོགས་པ་ཆེན་པོ་ཀུན་བཟང་དགོངས་འདུས་ཀྱི་ཆོས་བདག་སྦེ་མངའ་གསོལ་གནང་སྟེ་ཀུན་བཟང་དགོངས་པ་ཀུན་འདུས་ཀྱི་འགྲོ་དོན་རྒྱལ་ཁམས་ཀུན་ལུ་སྤེལ་གནང་དགོཔ་དང་ ལྷག་པར་དུ་ཡང་སྤ་རོ་དང་སྔན་ལུང་གི་གཡུས་ཁར་ལུ་ཟབ་ཆོས་འདི་གི་འགྲོ་དོན་རྒྱ་ཆེཝ་སྦེ་མཛད་གནང་དགོས་པའི་ལུང་བསྟན་ཡང་གནང་ཡོདཔ་ཨིན་པས། འདི་གིས་འབད་ཞིནམ་ལས་གཏེར་སྟོན་པདྨ་གླིང་པའི་དཀྱིལ་འཁོར་འཛིན་པའི་བུ་བདུན་གྱི་ནང་གསེས། གཏེར་སྟོན་ཚེ་རིང་རྡོ་རྗེ་དང་གཏེར་སྟོན་ངག་དབང་གྲགས་པ་གཉིས་ཀྱིས་ཡང་རྩ་བའི་བླམ་སྦེ་བསྟེན་ཏེ་གསར་རྙིང་གི་ཟབ་ཆོས་སྤྱི་དང་ལྷག་པར་དུ་པད་གླིང་བླ་རྫོགས་ཐུགས་གསུམ་ལས་འགོ་བཙུགས་ཏེ་གཏེར་ཆོས་ཡོངས་སུ་རྫོགསཔ་སྦེ་ཞུ་ནུག །ལུང་བསྟན་ཀུན་གསལ་མེ་ལོང་ནང་ལས། གཏེར་སྟོན་བས་ཀྱང་གཏེར་སློབ་བཟང༔ གཏེར་སློབ་བས་ཀྱང་ཡང་སློབ་བཟང༔ ཟེར་གསུངས་དོ་བཟུམ་གྲུབ་དབང་འདི་གཏེར་སྟོན་རང་ལས་ལྷག་པའི་གཏེར་སློབ་དང་། གོང་གི་གཏེར་སྟོན་རྣམ་གཉིས་འདི་གཏེར་སློབ་རང་ལས་ལྷག་པའི་ཡང་སློབ་ཨིནམ་སྦེ་བརྩིཝ་ཨིན་པས།
སྨན་རི་དགོན་པ་འདི་གི་མཚན་ལུ་སྨན་རི་དགོན་པ་དང་སྨན་སྒྲུབ་དགོན་པ་ཟེར་ཡིག་སྡེབ་མ་འདྲཝ་གཉིས་སྦེ་ཐོནམ་ཨིན་མས། ངག་རྒྱུན་ལྟར་འབད་བ་ཅིན་གྲུབ་དབང་རིན་ཆེན་ཆོས་རྡོར་གྱིས་སྨན་གྱི་སྒྲུབ་པ་གནང་ནི་འདི་གིས་སྨན་སྒྲུབ་དགོན་པ་ཟེར་སླབ་སྲོལ་བྱུང་ཡོདཔ་སྦེ་བཤདཔ་ཨིན་པས། ཨིན་རུང་ཁུངས་ལྡན་གྱི་ལོ་རྒྱུས་ཚུ་དང་འཁྲིལཝ་ད་དགོན་པ་འདི་སྒྲུབ་སྡེ་ཅིག་ཨིནམ་མ་ཚད་གྲུབ་དབང་མཆོག་ཡང་སྒྲུབ་པ་ཁོ་ན་ལུ་བརྩོན་བཞུགས་མི་ཅིག་ཨིནམ་མ་གཏོགས་གྲོང་ཆོག་དང་དབང་བསྐུར་ཆོས་བཤད་སོགས་མཛད་ནི་ལུ་ཐུགས་མ་མཉེས་མི་ཅིག་ཨིན་མས། ག་དེ་སྦེ་ཨིན་རུང་སྨན་རི་སྒྲུབ་སྡེ་འདི་ནང་ལུ་གྲུབ་དབང་ཁོ་རའི་སྐུ་ཐོག་ལུ་ར་སྒྲུབ་པ་ལུ་བརྩོན་མི་བརྒྱ་ལྷགཔ་སྦེ་བཞུགས་ཡོདཔ་མ་ཚད། གྲུབ་པ་ཐོབ་མི་ཡང་གཏེར་སྟོན་ཚེ་རིང་རྡོ་རྗེ་དང་གནས་ཕུ་སྤྲུལ་སྐུ་སྐུ་ཕྲེང་དང་པོ་གཏེར་སྟོན་ངག་དབང་གྲགས་པ་གིས་གཙོས་པའི་མིང་ཅན་དང་མིང་མེད་ཀྱི་གྲུབ་ཐོབ་ལེ་ཤ་བྱུང་ནུག།
སྒྲུབ་སྡེ་འདི་ནང་གཏེར་སྟོན་པདྨ་གླིང་པའི་ཐུགས་སྲས་གྲགས་པ་རྒྱལ་མཚན་དང་ཟླ་བ་རྒྱལ་མཚན། གཏེར་སྟོན་མཆོག་ལྡན་མགོན་པོ་ཚུ་གིས་ཡང་ཞབས་ཀྱིས་བཅགས་གནང་སྟེ་སྐྱེ་བདུན་སྒྲུབ་ཆེན་གྱིས་གཙོས་པའི་གྲུབ་པ་སྒྲུབ་ཆེན་ཡང་ཐེངས་ལེ་ཤ་བཙུགས་ཡོད་པའི་ལོ་རྒྱུས་ཁུངས་ལྡན་གྱི་ཡིག་ཆ་ཚུ་ནང་ལས་ཐོན་ནི་འདུག །ཐུགས་སྲས་ཟླ་བ་རྒྱལ་མཚན་མཆོག་དང་གྲུབ་དབང་རིན་ཆེན་ཆོས་རྡོར་ཁོང་ར་གཉིས་བཀའ་གྲོས་མཛད་དེ་གཏེར་སྟོན་ཚེ་རིང་རྡོ་རྗེ་མཆོག་གྲུབ་དབང་རིན་པོ་ཆེའི་རྒྱལ་ཚབ་དང་ལྷག་པར་དུ་ཡང་སྨན་རི་སྒྲུབ་སྡེའི་རྡོ་རྗེ་སློབ་དཔོན་སྦེ་དབང་བསྐུར་ཏེསྨན་རི་སྒྲུབ་སྡེ་འདི་རྩིས་སྤྲོད་གནང་ཡོདཔ་ཨིན་རུང་། གཏེར་སྟོན་མཆོག་གིས་གདོང་དཀར་འོད་གསལ་རྩེ་མོ་ཕྱག་བཏབ་གནང་ཞིནམ་ལས་གྲུབ་དབང་དཔོན་སློབ་ག་ར་གདོང་དཀར་ལ་ལུ་གནས་སྤོ་མཛད་དེ་སྨན་རི་སྒྲུབ་སྡེ་འདི་ཚར་གཅིག་སྟོངམ་སྦེ་ལུས་སོ་ནུག། དེ་ལས་རིམ་པ་བཞིན་དུ་གྲུབ་དབང་རིན་པོ་ཆེ་ཁོ་ར་སྐུ་བགྲེས་པའི་རྐྱེན་ལས་བརྟེན་གདོང་དཀར་འོད་གསལ་རྩེ་མོའི་གྲུབ་ཁང་འདི་གཏེར་སྟོན་ཚེ་རིང་རྡོ་རྗེ་ལུ་རྩིས་སྤྲོད་གནང་། གྲུབ་དབང་རང་གི་གདན་ས་གཏན་བོད་མོ་རི་དང་གདན་ས་སྨན་རི་ཁ་གཉིས་འདི་གཏེར་སྟོན་ངག་དབང་གྲགས་པ་ལུ་རྩིས་སྤྲོད་གནང་སྟེ་སྨན་རི་དགོན་པ་འདི་ནང་ལུ་གྲུབ་དབང་རིན་པོ་ཆེ་ཁོ་རང་དུས་རྒྱུན་དུ་བཞུགས་གནང་ཡོདཔ་ལས། ཤུལ་ལས་རིན་པོ་ཆེ་ཁོ་ར་དགོངས་པ་རྫོགས་ས་ཡང་དགོན་པ་འདི་ནང་རང་ཨིན་པས། གྲུབ་དབང་རིན་ཆེན་ཆོས་རྡོར་དགོངས་པ་རྫོགས་པའི་སྐབས་གཏེར་སྟོན་བུ་སློབ་རྣམ་གཉིས་ཀྱིས་གཙོས་པའི་ལས་ཅན་གྱི་སྐལ་ལྡན་སློབ་མའི་ཚོགས་ལུ་ངེའི་དོན་ལུ་སྐུ་རྟེན་བཞེངས་པ་ལ་སོགས་པའི་དགེ་རྩ་གཞན་ག་ཅི་ཡང་འབད་མི་དགོ་འདི་ཚུ་དོན་མེད། ངའི་རྒྱུ་དངོས་ག་དེམ་ཅིག་ཡོད་མི་འདི་བུམ་ཐང་ལུ་ཐུགས་སྲས་ཟླ་བའི་ཞབས་ལུ་ཕུལ། ཁྱོད་ར་འདི་ཚུ་འཇིག་རྟེན་ གཡེངས་བའི་ཕྱོགས་ལུ་མ་སྡོད་པར་སྒྲུབ་པ་ལུ་བརྩོན་དགོས་ཟེར་བའི་ཞལ་ཆེམས་བཞག་ཡོད་པ་ལྟར་དུ་། གཏེར་སྟོན་ངག་དབང་གྲགས་པ་ཡང་སློབ་མའི་ཚོགས་དང་བཅས་བོད་མོ་རི་ལུ་གནས་སྤོ་བྱོན་ཏེ་ལོ་བདུན་གྱི་རིང་སྒྲུབ་པ་ལུ་བརྩོན་ཏེ་བཞུགས་གནང་བའི་སྐབས། སྨན་རི་ཁ་དགོན་པ་འདི་་སྟོངམ་ཐོན་ཏེ་ཉམས་ཆག་ཤུགས་སྦེ་རང་ཤོར་ཏེ་ལྷོ་གླིང་ཁའི་མི་སེར་ཚུ་གིས་ཡང། སྨན་རི་སྒྲུབ་སྡེ་འདི་གཏེར་སྟོན་ངག་དབང་གྲགས་པ་ལུ་ཕུལ་ཏེ། དེ་ཁར་གཙུག་ལག་ཁང་སྦོམ་སྦེ་བཞེངས་གནང་དགོ་པའི་ཞུ་བ་ཕུལཝ་ལས་བརྟེན། གཏེར་སྟོན་ངག་དབང་གྲགས་པ་མཆོག་གིས་གཙུག་ལག་ཁང་རྩ་བ་ལས་རང་གསར་བཞེངས་མཛད་དེ། མཚན་ཡང་ཟབ་དོན་ཆོས་གླིང་ཟེར་བཏགས་གནང་ནུག །གཙུག་ལག་ཁང་གསར་བཞེངས་སྒྲུབ་པའི་ཤུལ་ལས་ཡང་ཐུགས་སྲས་ཟླ་བ་དང་སྲས་གྲགས་རྒྱལ། གསང་བདག་དང་གཏེར་སྟོན་ཚེ་རིང་རྡོ་རྗེ་ཚུ་གིས་ཞབས་ཀྱིས་བཅགས་ཏེ། སྐྱེ་བདུན་གྱི་སྒྲུབ་པ་ཆེན་པོ་བཙུགས་པ་ལ་སོགས་པའི་སྒོ་ལས་བྱིན་གྱིས་རླབས་གནང་ནུག།
༼ལྷ་ཁང་ཉམས་གསོ་ཞུ་ཡོད་པའི་ལོ་རྒྱུས།༽
གཙུག་ལག་ཁང་འདི་ལུ་ཉམས་ཆག་ཤོར་བའི་ལོ་རྒྱུས་དང་ཉམས་གསོ་ག་དེ་སྦེ་མཛད་མཛདཔ་ཨིན་ན་གི་ལོ་རྒྱུས་ཚུ་ག་ནི་ཡང་ཁ་གསལ་སྦེ་མེད་རུང་། སྔར་གྱི་ལྷ་ཁང་དེ་ཉམས་ཆག་ཤོར་ཡོདཔ་ཨིནམ་ཐག་ཆོད་པས། དེ་ཡང་གོང་ལུ་ཞུ་དོ་བཟུམ་སྦེ་གྲུབ་དབང་རིན་པོ་ཆེ་ཁོ་ར་དགོངས་པ་རྫོགས་ཞིནམ་ལས་གཏེར་སྟོན་ངག་དབང་གྲགས་པ་གིས་རྩ་བ་ལས་ར་ཉམས་གསོ་ཞུ་ཡོདཔ་ལས་དེ་ནང་ལྡེབས་རིས་ཚུ་ཡང་ནང་ཀུན་བཟང་ཞི་ཁྲོའི་ལྷ་ཚོགས། གུ་རུ་རིན་པོ་ཆེའི་རྣམ་ཐར། དུས་གསུམ་སངས་རྒྱས་ཀྱི་སྐུ་གཟུགས། ཀུན་མཁྱེན་དྲི་མེད་འོད་ཟེར་ལུ་སྙིང་ཐིག་བརྒྱུད་པའི་བླ་མས་བསྐོར་བ། རྡོ་རྗེ་འཆང་ལ་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་གྱི་བརྒྱུད་པས་བསྐོར༌བ། དྲུང་དྲུང་རིན་པོ་ཆེ་ལ་བརྒྱུད་པ་དྲུག་ལྡན་གྱིས་བསྐོར་བ། རྩ་བའི་བླ་མ་ལ་མ་ཕྱག་རྒྱ་ཆེན་པོ་མ་རིག་མུན་སེལ་གྱི་བརྒྱུད་པས་བསྐོར་བ། མགོན་པོ་ཚེ་དཔག་མེད་ལ་མཁའ་འགྲོ་སྙིག་ཏིག་ལུགས་ཀྱི་ཚེའི་བརྒྱུད་པས་བསྐོར་བ། དཔལ་སྔགས་ཀྱི་བདག་མོ་ལ་དམ་ཅན་སྡེ་ལྔས་བསྐོར་ཏེ་ཡོད་པའི་ལྡེབས་རིས་ཚུ་བཞེངས་གནང་ཡོད་པའི་ལོ་རྒྱུས་གཏེར་སྟོན་ཁོ་ར་གི་རྣམ་ཐར་ནང་གསལ་འདི་འདུག །འདི་ལུ་བལྟ་བ་ཅིན་ཧེ་མ་ལྷ་ཁང་སྦོམ་ཅིག་རང་སྡོད་སྡོདཔ་འོང་ནི་མས། ཧེ་མ་ཡོད་པའི་ལྷ་ཁང་རྙིངམ་ནང་ལུ་དེ་བཟུམ་གྱི་ལྡེབས་རིས་ཡང་མཇལ་ནི་མེདཔ་མ་ཚད་ལྡེབས་རིས་དེ་ཅིག་ཤོངས་པའི་ཚད་ཡང་མ་མཇལ། དེ་གིས་ཡང་མ་ཚད་འ་ནི་ལྷ་ཁང་སྦོམ་འདི་ཉམས་ཆག་ཤོར་བའི་ཤུལ་ལས་ཧེ་མ་ཡོད་པའི་ལྷ་ཁང་རྙིངམ་ཆུང་ཀུ་འདི་ལོག་ཉམས་སོ་ཞུ་བའི་སྐབས་ས་སྒོ་ཡང་དུམ་གྲྭ་ཅིག་སྤོ་བཤུད་འབད་དེ་ད་ལྟོ་ཡོད་པའི་ས་སྒོ་ནང་བཞེངས་གནང་ཡོདཔ་ཨིན་པས། ཧེ་མ་ལྷ་ཁང་ཡོད་སའི་ས་སྒོ་ནང་ལུ་ཧེ་མའི་ལྷ་ཁང་རྙིངམ་གྱི་གྱང་ཁོག་ཚུ་ད་ལྟོ་ཡང་མཇལ་ནི་ཡོདཔ་ཨིན། མདོར་ན་གཏེར་སྟོན་ངག་དབང་གྲགས་པ་གིས་ལྷ་ཁང་ཉམས་སོ་ཞུ་གནང་བའི་རྗེས་སུ་ཡང་ཉམས་ཆག་ཤོར་ཏེ་ཐེངས་གཅིག་ཉམས་སོ་ཞུ་སྟེ་ས་སྒོ་སྤོ་བཤུད་འབད་བ་མ་ཚད་ལྷ་ཁང་རྒྱ་ཆུང་ཀུ་བཏང་ཡོདཔ་འོང་ནི་ཨིན་པས།
གོང་ལུ་བཀོད་དོ་བཟུམ་སྦེ་དགོན་གནས་འདི་གྲུབ་དབང་རིན་ཆེན་ཆོས་རྡོར་གྱི་གདན་ས་ཨིན་རུང་། གྲུབ་དབང་རིན་པོ་ཆེ་གིས་གཏེར་སྟོན་ངག་དབང་གྲགས་པ་ལུ་གནང་ཡོདཔ་མ་ཚད། ལྷོ་གླིང་ཁའི་མི་སེར་ཚུ་གིས་ཡང་ཁོ་ལུ་ཕུལཝ་བཞིན་དུ། ཁོ་གིས་ཡང་ལྷ་ཁང་གསར་བཞེངས་གནང་སྟེ་ཆོས་སྡེ་ཅིག་བཙུགས་གནང་ཡོདཔ་ཨིན་རུང་། ཤུལ་ལས་ལྷ་ཁང་འདི་ཁོང་ར་མི་སེར་ཚུ་གིས་བདག་འཛིན་འབད་དེ་བཞག་ཡོདཔ་མ་གཏོགས་ལྷ་ཁང་འདི་ལུ་འཛིན་སྐྱོང་སྒྲིང་སྒྲིང་ཅིག་མཛད་མ་ཚུགསཔ་འོང་ནི་མས། འདི་ལས་བརྟེན་ལྷ་ཁང་ལོག་ཉམས་ཆག་ཤོར་མི་རྒྱུ་རྐྱེན་ཡང་འདི་ལས་བརྟེན་འོང་ནི་ཨིན་མས་ཟེར་ཞུ་ནི་དང་ལོག་ཉམས་བཅོས་ཞུ་མི་དང་ས་སྒོ་སྤོ་བཤུད་འབད་མི་ཡང་ཁོང་རང་ལྷོ་གླིང་ཁའི་མི་སེར་ཚུ་གིས་འབད་འབདཝ་འོང་ནི་ཨིན་པའི་དོགས་པ་ཙམ་མ་གཏོགས་ལོ་རྒྱུས་ཁ་གསལ་མ་ཐོབ། ལྷ་ཁང་འདི་ཐེངས་གསུམ་པ་ཉམས་གསོ་ཞུ་བའི་ཤུལ་ལས་མིང་མ་ཡལཝ་ཙམ་ཅིག་སྦེ་སྤྱི་ལོ་ ༢༠༠༩ ཚུན་ཚོད་ལུ་ལྷོ་གླིང་ཁའི་མི་སེར་དམངས་ཀྱི་བདག་འཛིན་འཐབ་སྡོད་ནུག། ཨིན་རུང་དེང་སང་ཡར་རྒྱས་ཀྱི་འགྱུར་བ་དང་བསྟུན་ལྷོ་གླིང་ཁ་པའི་མི་སེར་ཚུ་ག་ར་ཡར་རྒྱས་ཀྱི་མཐུན་རྐྱེན་འཛོམས་སར་གནས་སྤོ་སོང་སྟེ་གཡུས་ཁར་སྡོད་མི་མེདཔ་ལས་བརྟེན་ལྷ་ཁང་འདི་ལྟ་རྟོག་འབད་མི་མེད་པར་ཉམས་ཆག་ཤོར་བའི་ཚ་ གྱང་གིས་ལྷོ་གླིང་ཁའི་མི་སེར་དམངས་མོས་མཐུན་ཐོག་སྤྱི་ལོ་ ༢༠༠༩ ལུ་པད་གླིང་བསྟན་བདག་༧སྒང་སྟེང་སྐྱབས་མགོན་རིན་པོ་ཆེ་པད་ཕྲིན་དགུ་པ་ཀུན་བཟང་རིག་འཛིན་པདྨ་རྣམ་རྒྱལ་མཆོག་ལུ་རྩིས་ཕུལ་ནུག །དུས་དེ་ལས་ཚུར་རིན་པོ་ཆེ་མཆོག་གིས་སྒང་སྟེང་བཤད་གྲྭ་ནང་ལས་བསླབ་པ་མཐར་སོན་པའི་སློབ་དཔོན་གཉིས་ལས་མ་ཉུང་བར་བཏང་གནང་སྟེ་ལྷ་ཁང་འདི་རིན་པོ་ཆེ་རང་གི་ལམ་སྟོན་འོག་སློབ་དཔོན་ཚུ་གིས་འཛིན་སྐྱོང་མཛད་གནངམ་ཨིན་པས། ཨིན་རུང་ལྷ་ཁང་འདི་སྦོམ་སྦེ་རང་ཉམས་ཆག་ཤོར་ཏེ་ཡོདཔ་ལས་གཞུང་ནང་སྲིད་ལྷན་ཁག་གི་བཀའ་ཡི་གནང་བ་དང་རིན་པོ་ཆེ་མཆོག་གི་བཀའ་སློབ་ལམ་སྟོན་དང་འཁྲིལ་ལྷ་ཁང་རྩ་བ་ལས་རང་ཉམས་གསོ་ཞུ་ནི་འགོ་བཙུགས་ཏེ་ལོ་ངོ་དག་པ་ཅིག་གི་ནང་འཁོད་ལུ་ཕྱིའི་བཟོ་བཀོད་སྔར་ལས་ལྷགཔ་སྦེ་བསྒྲུབས་གནང་ནུག །
༼དུས་མཆོད་འབུམ་སྡེ་གི་རིགས།༽
སྨན་རི་དགོན་པ་ནང་ལུ་ལོ་བསྟར་དུས་མཆོད་འབུམ་སྡེ་ཡང་དགོན་སྡེ་གཞན་ཁ་བཟུམ་སྦེ་གྲ་རྒྱས་ཏོག་ཏོ་འབད་རང་གནང་སྲོལ་ཡོདཔ་ཨིན་པས། དེ་ཡང་དང་པ་རང་ཟླ་ ༡༢ པའི་ཚེས་ལས་འགོ་བཙུགས་ཉིན་གྲངས་གསུམ་གྱི་རིང་དགུན་གྱི་བསྐང་གསོ་ཆོས་སྲུང་ཡོངས་རྫོགས་ལུ་གཏང་རག་ཕུལ་ཏེ་ཉིནམ་མཇུག་ལུ་པད་གླིང་བླ་མ་ནོར་བུ་རྒྱ་མཚོའི་ཚོགས་འཁོར་དང་བཅསཔ་སྦེ་གྲོལ་གནང་དོ་ཡོདཔ་ཨིན་པས། གཞན་ཡང་ཟླཝ་དང་པའི་ཚེས་ ༣ ལུ་དགོན་པ་གདན་ས་བཅགས་མི་བླམ་ དྲུང་དྲུང་རང་གི་རྩ་བའི་བླམ་རིག་འཛིན་པདྨ་གླིང་པའི་སྐུ་མཆོད་ཉིན་གཅིག་བཟུང་སྲོལ་ཡོདཔ་དང། ཟླཝ་བཞི་པའི་ཚེས་ ༡༥ ས་ག་ཟླ་བའི་དུས་ཆེན་ལུ་ཚོགས་འཁོར་ཉིན་གཅིག །ཟླཝ་ ༥ པའི་ཚེས་ ༡༠ ལུ་གུ་རུ་རིན་པོ་ཆེའི་སྐུའི་འཁྲུངས་སྐར་དང་འབྲེལ་ནོར་རྒྱམ་ཚོགས་འཁོར་རྒྱས་པ་ཉིན་གྲངས་གཅིག་དང། ཟླཝ་དྲུག་པའི་ཚེས་བཞི་སངས་རྒྱས་ཀྱི་བདེན་བཞི་ཆོས་ འཁོར་བསྐོར་བའི་དུས་ཆེན་ལུ་ཚོགས་འཁོར་ཉིན་གཅིག། ཟླཝ་བདུན་པའི་ཚེས་ ༡༣ ལས་ ༡༥ ཚུན་ཉིན་ དང་པའི་ནང་མ་ནི་ཟེར་ཐུགས་རྗེ་ཆེན་པོ་མུན་སེལ་སྒྲོན་མེའི་ཆོ་གུ་དང་ཉིན་གཉིས་པའི་ནང་ལུ་བྱཱར་གྱི་བསྐང་གསོ་ཆོས་སྲུང་གཏང་རག་ཕུལ་ཏེ་ཉིན་མཇུག་ལུ་ནོར་རྒྱམ་ཚོགས་འཁོར་བསྐོར་གནང་དོ་ཡོདཔ་ཨིན་པས། བྱཱར་དགུན་གྱི་བསྐང་གསོ་ཕུལ་བའི་སྐབས་ཉེ་འདབས་ཀྱི་མི་སེར་གུང་རེ་ལས་མི་རེ་དཀོན་མཆོག་མཆོད་པ་ཟེར་ཚོགས་དང་སྙན་དར་ཕུལ་བ་འོང་བའི་སྲོལ་ད་ལྟོ་ཡང་མ་ཉམས་པར་ཡོདཔ་ཨིན་པས། ཟླཝ་དགུ་པའི་ཉེར་ ༢༢ ལུ་རྒྱལ་བ་ལྷ་ལས་བབས་པའི་དུས་ཆེན་བརྩི་སྲུང་ཞུ་གནང་སྟེ་ཚོགས་འཁོར་རྒྱས་པ་ཉིན་གཅིག་བསྐོར་གནང་དོ་ཡོདཔ་ཨིན་པས་ཟེར་ཞུ་ནི་ཨིན་ནོ། །
༼ལྷ་ཁང་གི་ནང་རྟེན་གྱི་སྐོར།༽
ལྷ་ཁང་འདི་ནང་ལུ་ནང་རྟེན་གཙོ་བོ་རྒྱུ་སྨན་འདམ་ལ་སྒྲུབ་པའི་སྟོན་པའི་སྐུ་མི་གཟུགས་གང་མ་གཅིག་དང་སྤྱན་རས་གཟིགས་ཀྱི་སྐུ་གིས་གཙོས་པའི་གཞན་བླ་བརྒྱུད་དང་འབྲེལ་བའི་སྐུ་ཆུང་བ་དང། གདན་ས་བཅགས་མི་བླམ་དྲུང་དྲུང་ཁོ་རའི་སྐུ་འདྲ་ཚུ་མཇལ་ནི་ཡོད། ཡང་ལྷ་ཁང་འདི་ནང་ལུ་ཧེ་མ་གྲུབ་དབང་རིན་ཆེན་ཆོས་རྡོར་གྱི་སྨན་བཏུལ་གནང་གནངམ་གི་རྡོ་གཞོང་ཨིན་ཟེར་རྡོ་གཞོང་ལ་ཝང་གི་དབྱིབས་ཅན་ཅིག་འདུག། མི་ཚུ་གིས་འདི་གུ་ལས་སྔགས་མར་ཞུ་འབག་པའི་སྲོལ་ཡོདཔ་ཨིན་པས། སྔགས་མར་འདི་གིས་ཀླུ་དང་གདོན་ཚུ་གིས་གདོན་ཏེ་ཐོན་པའི་རྨ་ཁ་ཚུ་དྲག་ཚུགསཔ་ཨིན་ཟེར་སླབ་སྲོལ་འདུག །ད་རུང་པད་གླིང་ཐུགས་སྲས་ཟླ་བ་རྒྱལ་མཚན་གྱི་ཞབས་རྗེས་ཡང་ལྷ་ཁང་འདི་ནང་མཇལ་ནི་འདུག་ཟེར་ཞུ་ནི་ཨིན། མདོར་བསྡུ་བ་ཅིན་ལྷ་ཁང་འདི་རྒྱ་དང་བོད་ག་ཏེ་ཡང་མ་བྱོན་པར་འབྲུག་ལས་འཁྲུངས་ཏེ་འབྲུག་ལུ་ར་སྒྲུབ་པ་མཛད་དེ་གྲུབ་པ་ཐོབ་པའི་བླམ་ཚད་ལྡན་ཅིག་གིས་བཞེངས་གནང་གནངམ་ཨིནམ་མ་ཚད། འབྲུག་པའི་གཏེར་སྟོན་གཉིས་གཉིས་དེ་རེ་ལྷ་ཁང་འདི་ནས་བྱུང་ཡོདཔ་མ་ཚད་གྲུབ་པ་ཐོབ་མི་མཚམས་པ་བརྒྱ་སྦེ་དགོན་པ་འདི་ནང་ལུ་བཞུགས་ཡོདཔ་ལས། རྒྱལ་ཁབ་ནང་ལུ་དགོན་སྡེ་རྩ་ཆེ་ཤོས་ཅིག་དང་བྱིན་རླབས་ཆེ་ཤོས་ཅིག་ཨིན་མས་ཟེར་ཞུ་ནི་ཨིན། ལྷ་ཁང་འདི་སྤ་རོ་ཤར་པ་ལས་གདོང་དཀར་ལ་འགྱོ་སའི་ལམ་བདའ་སྟེ་ཀི་ལོ་མི་ཀྲར་༡༠ དེ་ཅིག་འགྱོཝ་ད་ལྷོ་གླིང་ཁའི་གཡུས་ཚན་གྱི་ལྟག་ལུ་འཁོར་ལམ་གྱི་འོག་ལུ་ཆགས་ཏེ་ཡོདཔ་ཨིན།
