སྤང་ཁ་བསམ་གཏན་ཆོས་གླིང་སྒྲུབ་སྡེ
དབང་འདུས་ཕོ་བྲང་རྫོང་ཁག །ཉི་ཤུ་རྒེད་འོག་གི་འོག་ལུ་ཆགས་ཏེ་ཡོད་པའི་ སྤང་ཁ་བསམ་གཏན་ཆོས་གླིང་སྒྲུབ་སྡེ་འདི་ དབང་འདུས་ཆུ་འཛོམས་ས་ལས་ཀི་ལོ་མི་ཊར་༡༣ གི་ས་ཁར་ཡོདཔ་ལས་སྣུམ་འཁོར་ནང་དུས་ཡུན་ཆུ་ཚོད་གཅིག་དེ་ཅིག་འགྱོཝ་ད་སྒྲུབ་སྡེ་ཡོད་ས་ལུ་ལྷོདཔ་ཨིན། སྤང་ཁ་གཡུས་ཚན་འདི་ ༸སྒང་སྟེང་སྤྲུལ་སྐུ་སྐུ་ཕྲེང་རིམ་བྱོན་ཚུ་གིས་གདན་ས་གཉིས་པ་ནམ་དགུན་གྱི་བཞུགས་གནས་ཤར་སྤྱི་ཏོག་ཕུན་ཚོགས་རབ་བརྟན་གླིང་གི་ཉེ་འདབས་ལུ་ཆགས་ཏེ་ཡོདཔ་ཨིན། དེ་འབདཝ་ལས་སྤང་ཁའི་མི་སེར་ཚུ་ཡང་སྔོན་ཐོག་ཕ་མའི་སྐབས་ལས་ ༸སྒང་སྤྲུལ་རིམ་བྱོན་ཚུ་དང་འབྲེལ་བ་ཧ་ཅང་གི་ཟབ་དྲག་སྦེ་སྡོད་ནུག།
༈ སྒྲུབ་སྡེ་འགོ་ཐོག་བཞེངས་ཚུལ།
སྒྲུབ་སྡེ་འདི་བུམ་ཐང་སྟངས་པདྨ་ཆོས་གླིང་ཨ་ཎེ་བཤད་གྲྭའི་ཡན་ལག་ཅིག་ཨིནམ་ལས་ ༸སྒང་སྟེང་རིན་པོ་ཆེ་མཆོག་གིས་བཙུན་མ་ལུ་ཡང་དགེ་སློང་དང་སྒོམ་ཆེན་བཟུམ་འདྲ་མཉམ་སྦེ་སློབ་སྦྱོང་མཐར་འཁྱོལ་ཞིནམ་ལས་ལོ་གསུམ་གྱི་སྒྲུབ་པ་གནང་ནི་གི་དོན་ལུ་སྒྲུབ་ཁང་ཅིག་གཞི་བཙུགས་འབད་ནི་གི་ཐུགས་བཞེད་གནང་སྟེ་པདྨ་ཆོས་གླིང་བཤད་གྲྭ་ལས་སློབ་དཔོན་མ་བདེ་ཆེན་དང་། སློབ་དཔོན་སངས་རྒྱས་དབང་མོ་གཉིས་ཀྱིས་ལཱ་གི་འགོ་འདྲེན་འཐབ་དགོཔ་སྦེ་བཀའ་གནང་ནུག།
ཁོང་གཉིས་ཀྱིས་སྒྲུབ་ཁང་གསར་བཞེངས་ཀྱི་ལཱ་འགོ་བཙུགས་ནི་དོན་ལས་མ་དངུལ་ཨ་ཙི་ཅིག་རིན་པོ་ཆེ་གིས་གནང་སྟེ། སྤྱི་ལོ་༢༠༡༥ ལས་ཤིང་མཁོ་སྒྲུབ་འབད་ནི་འགོ་བཙུགས། སྤྱི་ལོ་༢༠༡༧ ལས་ཁོང་ར་སློབ་དཔོན་གཉིས་ཀྱིས་མ་དངུལ་གྱི་གྲོགས་རམ་གཞན་ཁར་ལས་འཚོལ་ཏེ་ལཱ་དངོས་གཞི་འགོ་བཙུགས་སྦེ་ལོ་ངོ་གསུམ་ལྷགཔ་ཅིག་གི་རིང་ལུ་ཕྱི་ནང་ཡོངས་རྫོགས་སྦེ་བསྒྲུབས་ཏེ་སྤྱི་ལོ་༢༠༡༩ རང་ལུགས་གནམ་ལོ་ཕག་ལོ་རང་ཟླ་དང་པའི་ཚེས་༤ ལུ་ ༸སྐྱབས་རྗེ་སྒང་སྟེང་རིན་པོ་ཆེ་མཆོག་གིས་བཀྲ་ཤིས་རབ་གནས་མཛད་གནང་ནུག།
༈ སྒྲུབ་ཁང་གསར་བཞེངས་ཀྱི་མ་དངུལ་སྦྱིན་བདག།
༸སྐྱབས་རྗེ་སྒང་སྟེང་རིན་པོ་ཆེ་མཆོག་གིས་གནང་མི་མ་དངུལ་འདི་གུ་ བསྟན་པའི་སྦྱིན་བདག་སློབ་དཔོན་ཨོ་རྒྱན་ཆོས་འཛོམས་ཀྱིས་འགོ་འདྲེན་ཐོག་ ཕྱི་རྒྱལ་ཐཱའེ་ཝན་བླ་མ་ Haitoaདང་ཁོང་གི་སྦྱིན་བདག་ཡོངས་ནས་མ་དངུལ་གྱི་རྒྱབ་སྐྱོར་འབོར་ཆེ་ཏོག་ཏོ་སྦེ་མཛད་དེ་སྒྲུབ་ཁང་འདི་བཞེངས་ཚུགསཔ་བྱུང་མི་དང་། ཧེ་མ་ཤིང་ཆས་ཚུ་མཁོ་སྒྲུབ་འབད་བའི་སྐབས་ལུ་ཡང་འབྲུག་ཨ་ཎེ་གཞི་ཚོགས་དང་སྤུ་ན་གཙང་ཆུ་གློག་མེ་ལས་འགུལ། མི་སེར་འཐུས་དཔོན་བགྲེསཔ་སྤང་ཁརཔ་སྲིད་རྒྱལ་དང་པ་སངས་རྡོ་རྗེ་གཉིས་ཀྱིས་ཡང་མ་དངུལ་རྒྱབ་སྐྱོར་འབད་ནུག།
༈ སྒྲུབ་ཁང་གི་ནང་རྟེན།
སྒྲུབ་ཁང་གི་ནང་ན་ལྷ་ཁང་ནང་ལུ་སྐུ་རྟེན་གཙོ་བོ་རྒྱུ་སྨན་འདམ་ལས་སྒྲུབ་པའི་སངས་རྒྱས་ཚེ་དཔག་མེད་ཀྱི་སྐུ་འདྲ་མི་ཚད་གཅིག་ཡོདཔ་དང་། གུ་རུ་མཚན་བརྒྱད་ཀྱི་སྐུ་འདྲ་ཚུ་གི་མ་དངུལ་སྦྱིན་བདག་ཡང་སློབ་དཔོན་ཨོ་རྒྱན་ཆོས་འཛོམས་ཀྱིས་ཀྱི་གནང་སྟེ་འདུག།
༈ ལོ་གསུམ་གྱི་མཚམས་འགོ་ཐོག།
སྒྲུབ་ཁང་འདི་ཕྱི་ནང་རྟེན་དང་བརྟེན་པར་བཅས་ག་ར་བསྒྲུབས་ཏེ་རབ་གནས་གནང་ཚར་ཞིནམ་ལས་པདྨ་ཆོས་གླིང་བཙུན་མའི་སྒྲུབ་སྡེ་པ་ཐེངས་གཉིས་པ་འདི་སྒྲུབ་ཁང་འདི་ནང་ལུ་གནང་ནི་འགོ་བཙུགས་ཚུགས་ནུག། དེ་ཡང་ལོ་འདི་གི་རང་ཟླ་དང་པའི་ཚེས་༡༥ ལས་སློབ་དཔོན་མ་གྲངས་བརྒྱད་ཀྱིས་ལོ་གསུམ་གྱི་བསྙེན་སྒྲུབ་འགོ་བཙུགས་ཏེ་ད་ལྟོ་གནང་པའི་བསྒང་འདུག། ལོ་གསུམ་གྱི་སྒྲུབ་པ་གནང་ལུ་བླ་མ་ནོར་བུ་རྒྱ་མཚོའི་སྔོན་འགྲོ་ཟླ་ལྔ། རྫོགས་ཆེན་ཀུན་བཟང་དགོངས་འདུས་ཀྱི་སྔོན་འགྲོ་ཟླཝ་གཅིག། རྩ་གསུམ་གྱི་སྒྲུབ་པ་ཟླ་དྲུག། གུ་རུ་དྲག་པོའི་སྒྲུབ་པ་ཟླ་དྲུག། ཕུར་པའི་སྒྲུབ་པ་ཟླ་དྲུག། ཐུགས་རྗེ་ཆེན་པོ་མུན་གསལ་སྒྲོན་མེ་ཟླ་གཉིས། རྫོགས་ཆེན་ཟླ་ལྔ། ཚེའི་སྒྲུབ་པ་ཟླ་གཅིག་གནང་དོན་ཡོདཔ་ཨིན་མས། བཙུན་མའི་སྒྲུབ་སྡེ་ཐེངས་དང་པ་འདི་ཡང་སྒྲུབ་ཞུགས་པ་སློབ་དཔོན་ ༧ གྱིས་ཀྲོང་གསར་དཀར་གཞོང་སྒྲུབ་སྡེ་རིག་འཛིན་དགའ་ཚལ་ནང་ལུ་གནང་ཡོདཔ་ཨིན་མས།
༈ ལོ་གསུམ་མཚམས་པའི་མཐུན་རྐྱེན།
ལོ་གསུམ་གྱི་མཚམས་བཞུགས་མི་ཚུ་ལུ་མཐུན་རྐྱེན་གྱི་དོན་ལུ་བརྟན་རྩ་དང་སྦྱིན་བདག་ཟེར་དམིགས་བསལ་མེད་རུང་ད་རེས་མཚམས་པ་ཚུ་ལུ་ལོ་གསུམ་གྱི་རིང་ལུ་སློབ་དཔོན་ཨོ་རྒྱན་ཆོས་འཛོམས་ཀྱིས་སྦྱིན་བདག་འབད་དེ་བཟའ་འཐུང་དང་སྨན་ལས་འགོ་བཙུགས་ཕུལ་ཏེ་འདུག།
འབྲེལ་གཏུགས།
མཚམས་གཡོགཔ་ཕུརཔ་བཟངམོ། ༡༧༥༤༤༩༦༨
