ཤར་བསྒོར་སྒོར་ན་སྒོམ་སྡེའི་ཆགས་རབས་དང་འབྲེལ་བའི་ལོ་རྒྱུས།
༉ དེ་ཡང་སྔོན་མ་དུས་རབས་བརྒྱད་པའི་ནང་བོད་གངས་ཅན་གྱི་ལྗོངས་ནང་ལུ་མཁན་སློབ་ཆོས་གསུམ་གཅིག་ཁར་གདན་འཛོམས་ཏེ་དམ་པའི་ཆོས་སྤྱི་དང་ལྷག་པར་གསང་སྔགས་རྫོགས་པ་ཆེན་པོའི་ཆོས་དར་ཞིང་རྒྱས་པའི་སྐབས་ཆོས་ཀྱི་གཞི་མ་གོས་དཀར་ལྕང་ལོའི་སྡེ་དང་རབ་བྱུང་ངུར་སྨྲིག་གི་སྡེ་ཟེར་གཉིས་བྱུང་ཡོདཔ་ཨིན་པས། དང་པོ་གོས་དཀར་ལྕང་ལོ་ཅན་གྱི་སྡེ་ནང་ལུ་བཞུགས་མི་སྒོམ་ཆེན་ཟེར་མི་འདི་རང་གི་ཁྱིམ་དང་ཡང་ན་དགོན་སྡེ་ཅིག་ནང་བཞུགས་ཏེ་མདོ་སྔགས་ཀྱི་གཞུང་སྤྱི་དང་ལྷག་པར་གསང་སྔགས་ཀྱི་ཆོས་ཉམས་སུ་ལེན་ཏེ་བཞུགས་མི་ཅིག་ལུ་སླབ་ཨིནམ་ལས། འདི་ལུ་མིང་གཞན་སྔགས་པ་ཟེར་ཡང་ཞུཝ་ཨིན། དེ་བསྒང་བོད་སྟོད་སྨད་བར་གསུམ་ལུ་ཉམས་ལེན་མཐར་ཕྱིན་པའི་སྒོམ་ཆེན་པའམ་སྔགས་པ་ལེ་ཤ་ཅིག་བྱུང་ཡོདཔ་ཨིན་པས།
དེ་ལས་རིམ་པ་བཞིན་དུ་ང་བཅས་རའི་རྒྱལ་ཁབ་ནང་ལུ་ཡང་དུས་རབས་བརྒྱད་པའི་ནང་ལས་རང་ཨོ་རྒྱན་གུ་རུ་རིན་པོ་ཆེ་སྐུ་དངོས་སུ་ཞབས་ཀྱིས་བཅགས་བྱིན་གྱིས་བརླབས་གནང་སྟེ་གསང་སྔགས་ཀྱི་ཆོས་འགོ་ཐོག་དར་གནང་བ་དང་། བུམ་ཐང་སྐུ་རྗེས་ལུ་རྗོགས་པ་ཆེན་པོའི་ཆོས་འཁོར་ལེ་ཤ་བསྐོར་གནང་སྟེ་བཞུགས་པའི་སྐབས་ཆོས་འདི་ལུ་ཉམས་ལེན་གནང་མི་སྒོམ་ཆེན་ཡང་དེ་ལས་ཚུར་བྱུང་ཡོདཔ་ཨིན་པས། ལྷག་པར་དུ་ཤུལ་ལས་ཆོས་ལུགས་གསར་རྙིང་གི་མཁས་གྲུབ་སྐྱེས་ཆེན་དམ་པ་ལེ་ཤ་ཅིག་བྱོན་ཏེ་སངས་རྒྱས་ཀྱི་བསྟན་པ་དར་ཁྱབ་འགྱོ་ཞིནམ་ལས་ཚུར་ཆོས་སྒོར་ཞུགས་མི་ང་བཅས་ར་འབྲུག་ པའི་མི་སྡེ་ནང་ལུ་ཡོངས་གྲགས་དགེ་སློང་དང་ཨ་ནེམ། སྒོམ་ཆེན་ཟེར་གསུམ་དར་ཁྱབ་སྦོམ་སྦེ་བྱུང་ཡོདཔ་ཨིན། དེའི་ནང་ལས་རྟེན་འཇིག་རྟེན་ཁྱིམ་པ་དང་ཁྱད་པར་མེད་པར་བཞུགས་མི་སྒོམ་ཆེན་གྱི་སྡེ་རྒྱལ་ཁབ་ཀྱི་ཤར་ནུབ་དབུས་གསུམ་ཆ་མཉམ་ནང་དར་ཁྱབ་བྱུང་སྟེ་ཡོད་པའི་ནང་ལས་འབྲུག་ནུབ་ཕྱོགས་ཐེད་ཐིམ་དང་ཧ་ཅང་གི་ཐག་ཉེ་བའི་ཤར་སྒོར་སྒོར་ནའི་སྒོམ་སྡེ་འདི་སྒོམ་ཆེན་གྱི་སྡེ་སྦོམ་ཤོས་ཅིག་དང་ཡོངས་གྲགས་ཅན་ཅིག་སྦེ་ཆགས་ཏེ་ཡོདཔ་ཨིན།
༼དང་པ་ཤར་བསྒོར་སྒོར་ན་ཟེར་བའི་གཡུས་ཀྱི་མིང་ཆགས་ཚུལ།༽
དེ་ཡང་གཡུས་མི་རྒན་ཤོས་ཚུ་གི་ངག་རྒྱུན་ལྟར་བཤད་པ་ཅིན། གཡུས་ཚན་དེ་ནང་གཞི་ཆགས་སྡོད་མི་མི་སེར་ཚུ་འཚོ་བ་གཙོ་བོ་འབྲུ་སྣའི་རིགས་ལས་བྱཱོའོ་ལུ་བརྟེན་སྡོད་དོ་ཡོདཔ་ཨིན་པས། ཨིན་རུང་བྱཱོཔ་འཕྱེ་ཐག་ནིའི་དོན་ལས་ཆུ་རག་ཅིག་མེདཔ་ལས་འཕྱེ་ཐག་པར་ཕོབ་སྦྱིས་ཁ་དང་ཤར་མཁོ་ཐང་ཁ་ལུ་འགྱོ་དགོ་དོ་ཡོདཔ་ལས། ཁོང་རང་མི་སེར་ཚུ་མཉམ་བསྡོམས་འབད་དེ་གཡུས་ཀྱི་མཇུག་ལུ་ཆུ་རག་སྒང་ཏོག་ཟེར་མི་ནང་ཆུ་རག་ཅིག་བཙུགས་ཡོདཔ་ཨིན་པས། ཨིན་རུང་ཆུ་རག་འདི་བཙུགས་ཚར་བའི་རྗེས་སུ་ས་གནས་འདི་ནང་སྟབས་མ་ལེགས་པའི་རྐྱེན་ངན་དང་བར་ཆད་ལེ་ཤ་བྱུང་བ་གིས་མ་ཚད། ཆུ་རག་ནང་ལས་མགུ་ནོར་དང་མཇུག་སྦུལ་འབད་མི་ལྟས་ངན་པའི་སེམས་ཅན་མ་འདྲཝ་ཅིག་ཐོན་ཏེ་མིའི་ཚེ་སྲོག་ལུ་ཡང་གནོད་པ་ལེ་ཤ་ཅིག་རྐྱབ་ཡོདཔ་ཨིན་པས།
དེ་ལས་མི་ཚུ་གིས་ལྟས་ངན་པ་འདིའི་བཟློག་ཐབས་ལུ་སྤུ་ན་ཁ་རྟ་ལོག་དགོན་པ་ལུ་ཞབས་དྲུང་ཐུགས་སྤྲུལ་འཇིགས་མེད་ཆོས་རྒྱལ་གྱི་སྐུ་མདུན་ལུ་བཅར་ཏེ་སྙན་གསན་ཞུ་བའི་སྐབས་དང་བསྟུན་ཞབས་དྲུང་རིན་པོ་ཆེ་གིས་མངོན་ཤེས་ཀྱི་ཐོག་ལས་ས་གནས་འདིའི་ཆགས་ཚུལ་ལ་གཉིས་ཀྱི་སྦུག་ལུ་རི་མཇུག་གི་རྣམ་པ་བགོ་གྱོན་གྱོནམ་བཟུམ་སྦེ་ས་དབྱིབས་ཡ་མཚན་ཆེ་ཏོག་ཏོ་འདུག། དེ་འབདཝ་ལས་དང་པ་སའི་མིང་ལུ་བསྒོར་སྒོར་ན་ཟེར་སླབ་ད་ཟེར་གསུངས་ཞིནམ་ལས་ཚུར་གཡུས་ཀྱི་ མིང་ལུ་བསྒོར་སྒོར་ན་ཟེར་དར་ཁྱབ་སོང་སྟེ་སླབ་སྲོལ་དར་ཡོདཔ་ཨིན་པས། དེ་ལས་ངན་པའི་ལྟས་བཟློག་ཐབས་ཀྱི་དོན་ལུ་ཡང་རི་འདི་སྦུག་ཕྲང་སྟེ་ལྷ་ཁང་ཅིག་བཞེངས་དགོ་པའི་སྐུལ་མ་གསུངས་གནང་སྟེ། ཤུལ་ལས་ལྷ་ཁང་འདི་བསྒྲུབས་ཏེ་རབ་གནས་ཡང་ཞབས་དྲུང་ཁོ་རང་གིས་མཛད་གནང་ཡོདཔ་དང་ནང་རྟེན་ཡང་སྤུ་ན་ཁ་རྟ་ལོག་དགོན་པ་ལས་ཞབས་དྲུང་འཇིགས་མེད་ཆོས་རྒྱལ་ཁོ་ར་གིས་གནང་ཡོད་པའི་ལོ་རྒྱུས་འོག་ལས་ཡོད།
༼དགོན་སྡེ་ཐོག་མ་བཅགས་ཚུལ།༽
དེ་ཡང་ཤར་བསྒོར་སྒོར་ན་ཐེག་ཆེན་ཆོས་གླིང་དགོན་སྡེ་འདི་འབྲུག་རྒྱལ་ཁབ་ནང་ལུ་སྒོམ་སྡེ་རྙིང་ཤོས་ཅིག་དང་རྒྱབ་ཁུངས་ཀྱི་ལོ་རྒྱུས་སྤྲོ་སྣང་ཅན་ཡོད་མི་ཅིག་ཨིན། དེ་མ་ཚད་ད་ལྟོའི་བར་ན་ཡང་སྒོམ་སྡེ་འདི་ནང་སྔོན་གྱི་སྲོལ་གྱི་རིམ་པ་ཚུ་མ་ཉམས་པར་གནས་ཏེ་ཡོདཔ་དང། འཛིན་སྐྱོང་དང་སྒྲིག་གཞི་ག་ཅིའི་ཐད་ལས་ཡང་གྲ་རྒྱས་ཏོག་ཏོ་དང་སྒོམ་སྡེ་ནང་འཛུལ་མིའི་འབོར་ཚད་ཡང་མཐོ་ཤོས་ཡོད་པའི་སྒོམ་སྡེ་ཆེ་ཤོས་ཅིག་ཨིན།
སྒོམ་སྡེའི་གཙུག་ལག་ཁང་འདི་རིམ་ཐེངས་གསུམ་སྦེ་ སྤོ་སོར་འབད་དེ་བཞེངས་གནང་ཡོདཔ་ཨིན་པས། དེ་ཡང་དང་པོ་ད་ལྟོ་ཡོད་པའི་ལྷ་ཁང་གི་འོག་ལུ་བཞེངས་ཏེ་ད་རེས་ནངས་པ་ཞིག་རལ་སོང་སྟེ་ཁང་ཤུལ་སྦེ་ལུས་ཡོད་མི་འདི་དུས་རབས་ ༡༧ པའི་མཇུག་མཚམས་ལུ་སྒང་སྟེང་སྤྲུལ་སྐུ་བསྟན་འཛིན་ལེགས་དོན་གྱི་དངོས་སློབ་མཁས་གྲུབ་གསང་བའམ་སངས་རྒྱས་དོན་གྲུབ་ཟེར་ཞུ་མི་འདི་གིས་བཞེངས་གནང་ཡོདཔ་ཨིན་པས། དེ་ལས་ཚུར་མཁས་གྲུབ་གསང་བ་ཁོ་ར་དགོན་སྡེ་འདི་ནང་གྲུབ་པ་ལུ་གཙོ་བོར་མཛད་དེ་བཞུགས་པའི་སྐབས་ཆོས་ཞུ་བར་འོང་མི་སློབ་མ་ཡང་མང་ཆེ་ཤོས་སྔན་ལུང་ཕོབ་སྦིས་དང་ཤར་མཁོ་ཐང་ཁ་སོགས་ལས་འཇིག་རྟེན་ཕོ་མོ་སྤྱི་དང་ལྷག་པར་དུ་ཁྱིམ་པའི་རྟེན་ལུ་དགེ་བསྙེན་གྱི་སྡོམ་པ་བླངས་ཏེ་དུས་རྒྱུན་དུ་དམ་ཆོས་ཉམས་སུ་བླངས་ཏེ་སྡོད་མི་སྒོམ་ཆེན་ཚུ་ཡོདཔ་ཨིན་པས། དེ་ལས་རིམ་པ་བཞིན་དུ་ཕྱོགས་སོ་སོ་ལས་ཕེབས་པའི་ཁོང་སློབ་མའི་གཙོ་བོ་སྒོམ་ཆེན་ཚུ་གིས་ཡང་བླ་མའི་སྐུ་མདུན་ལས་དམ་ཆོས་རྫོགས་པ་ཆེན་པོའི་ཉམས་ཁྲིད་ཞུ་ མི་དང་གཅིག་ཁར་ལ་ལུ་ཅིག་གིས་ཁོང་རང་ནང་དུ་གཉེན་འབྲེལ་བསྡོམས་ཏེ་གཡུས་དེ་ནང་གནས་བཅའ་སྟེ་ཤར་སྒོར་སྒོར་ནའི་མི་བརྒྱུད་ཡང་དེ་ལས་མཆེད་ཡོདཔ་འོང་ནི་ཨིན་པས་ཟེར་བའི་ལོ་རྒྱུས་ངག་རྒྱུན་དུ་ཁོང་རའི་ཡུལ་མི་དང་སྒོམ་ཆེན་རྒས་ཤོས་ཚུ་གིས་བཤད་ནི་འདུག། ཡང་ངག་རྒྱུན་ཅིག་ནང་ལུ་མཁས་གྲུབ་སངས་རྒྱས་དོན་གྲུབ་ཀྱིས་གཙོས་པའི་སྒང་སྟེང་སྤྲུལ་སྐུ་བསྟན་འཛིན་ལེགས་དོན་གྱི་དངོས་སློབ་བདུན་ས་གནས་འདི་ནང་མཚམས་ཁང་ཆུང་ཀུ་རེ་རྐྱབ་སྟེ་ཐུགས་དམ་གནང་ བཞུགསཔ་ད་ཁོང་གི་མཚམས་གཡོག་རྒྱུགས་སྡོད་མི་ཁོང་རང་གི་ཚའུ་ཚམོ་ཚུ་ཡོདཔ་ལས་རིམ་གྱིས་སྦེ་ཁོང་ཚུ་གཉེན་འབྲེལ་བསྡོམས་ཏེ་བསྒོར་སྒོར་ནའི་མི་བརྒྱུད་འདི་དེ་ལས་མར་མཆེད་ཡོདཔ་སྦེ་ཡང་བཤད་ནི་འདུག
༼ལྷ་ཁང་གཉིས་པ་དཔལ་འབྱོར་ཆོས་གླིང་གི་ལོ་རྒྱུས།༽
གོང་ལུ་གསལ་དོ་བཟུམ་སྦེ་རྟ་ལོག་དགོན་པར་ཞབས་དྲུང་འཇིགས་མེད་ཆོས་རྒྱལ་གྱི་སྐུ་མདུན་ལུ་བཅར་ཏེ་བཟློག་ཐབས་ཞུ་བའི་སྐབས་དེ་གི་ཁ་གནོན་སྦེ་གཡུས་ཀྱི་གཡས་གཡོན་ལུ་ཡོད་པའི་རི་མགོ་ཕྲང་སྟེ་ས་ཆ་དུང་དཀར་གཡས་འཁྱིལ་བཟུམ་སྦེ་ཡོད་པའི་སྒང་ཏོ་ཅིག་ཡོད་མི་གུར་ལྷ་ཁང་ཅིག་བཞེངས་དགོས་པའི་བཀའ་གནང་བ་དང་། ལྷ་ཁང་གི་ཞལ་ཡང་གཡུས་མཇུག་གི་ཆུ་རག་ལུ་ཕོགཔ་སྦེ་བཞེངས་དགོ་པའི་བཀའ་གནང་ཡོདཔ་ཨིན་པས། དེ་ལས་ལྷ་ཁང་འདི་བཞེངས་པའི་ སྐབས་ས་བཅགས་གནང་མི་ཡང་ཞབས་དྲུང་ཁོ་རང་བྱོན་ཏེ་ལྷ་ཁང་འདི་ཞབས་དྲུང་དང་སྒང་སྤྲུལ་སྐུ་ཕྲེང་བདུན་པ་བསྟན་པའི་ཉིན་བྱེད་ཁོང་ར་སྤུན་ཆ་གཉིས་ཀྱིས་འགོ་འདྲེན་མཛད་དེ་གནམ་ལོ་ཤིང་བྱ་ལོ་ལུ་བཞེངས་གནང་ནུག། ལྷ་ཁང་འདི་ཞབས་དྲུང་ཁོ་རའི་ཡུམ་གྱི་དགོངས་རྫོགས་ལུ་སྦེ་ཡང་བཞེངས་གནང་ཡོདཔ་ལས་ནང་ནའི་སྐུ་རྟེན་ཡང་ཁོ་ར་གིས་རང་གནང་ཡོདཔ་ཨིན་པས། སྐུ་རྟེན་དེ་ཡང་རྟ་ལོག་དགོན་པ་ལུ་གུ་རུའི་སྐུ་མདའ་ཚད་མ་གཉིས་ཡོད་པའི་ནང་ལས་གཅིག་བསྒོར་སྒོར་ནང་ལུ་ཞུ་དགོཔ་སྦེ་གསུངས་ཏེ་གདན་འདྲེན་ཞུ་བའི་སྐབས་བ་ཇོ་ཐང་ཀ་ལུ་ལྷོདཔ་ད་སྐུ་འདི་ལྗིད་མ་འདྲཝ་ཅིག་བཏགས་ཏེ་སྐུ་འདྲ་འདི་ཞུ་མ་ཚུགས་པར་ལོག་རྟ་ལོག་ལུ་སོང་སྟེ་ཞབས་དྲུང་ཁོ་ར་ལུ་དགོངས་སྐོར་ཞུ་བའི་སྐབས། ཞབས་དྲུང་གིས་སྐུ་འདྲ་འདི་རྟ་ལོག་རྒྱལ་པོས་མ་བཏང་འོང་ནི་ཨིན་པས་ཟེར་གསུངས་པའི་འཕྲོས་ལས་མགོན་ཁང་ནང་བྱོན་ཏེ་རྒྱལ་པོ་སྐུ་ལྔ་ལུ་ཀུན་ཏུ་བཟང་མོ་ཁྱེད་ཤར་བསྒོར་སྒོར་ནང་ལུ་ཆོས་བདག་སྦེ་སོང་ཟེར་བཀའ་གནང་བའི་སྐབས་རྒྱལ་པོའི་སྐུ་འདྲ་དེ་གིས་དབུ་ཀྱོག་ཀྱོག་འབད་ཐུགས་དགྱེས་ཚོར་ཆེན་པོའི་ཐོག་ལས་ངོས་ལེན་གནང་སྟེ་སྐུ་འདྲ་དང་མཉམ་དུ་རྒྱལ་པོ་སྐུ་ལྔ་ལས་གཅིག་བསྒོར་སྒོར་ན་ལུ་གདན་འདྲེན་ཞུས་ཏེ་ད་ལྟོའི་བར་ན་ཡང་དགོན་ཁང་ནང་ལུ་གཙོ་བོ་པད་གླིང་མགོན་པོ་མ་ནིང་དང་མཉམ་རྟ་ལོག་རྒྱལ་པོ་ཡང་བཞུགས་ཏེ་གསོལ་ཁ་ཚུ་དུས་རྒྱུན་དུ་ཕུལ་སྲོལ་འདུག
ལྷ་ཁང་འདི་བཞེངས་ཚར་བའི་ཤུལ་ལས་ཞབས་དྲུང་ཁོང་ར་སྤུན་ཆ་གཉིས་ཡང་ཡུན་རིངམ་སྦེ་ཐུགས་དམ་གནང་སྟེ་བཞུགས་ཡོདཔ་མ་ཚད་ཞབས་དྲུང་རིན་པོ་ ཆེ་ཁོར་སྒང་སྟེང་དང་རྟ་ལོག་ཕར་ཚུར་ཕེབས་པའི་སྐབས་སྐུ་ཞག་ལྷ་ཁང་དེ་ནང་བཞུགས་དོ་ཡོདཔ་ཨིན་པས། ལྷ་ཁང་དང་པ་ཁང་ཤུལ་ནང་ལས་སྒོམ་ཆེན་ཚུ་ཡང་ལྷ་ཁང་འདི་ནང་སྤོ་བཤུད་འབད་དེ་སྒོམ་ཆེན་གྱི་སྡེ་ཡང་ལྷ་ཁང་དེ་ནང་རང་བསྐྱངས་ཏེ་བཞུགས་ནུག
༼ད་ལྟོ་སྒོམ་སྡེཔ་བཞུགས་སའི་ཐེག་ཆེན་ཆོས་གླིང་གཙུག་ལག་ཁང་གི་ལོ་རྒྱུས།༽
ད་ལྟོ་ཡོད་པའི་སྒོམ་སྡེ་གི་སྡེ་སྐྱོང་སའི་ཐེག་ཆེན་ཆོས་གླིང་གཙུག་ལག་ཁང་འདི་ཡབ་རྗེ་འཇིགས་མེད་རྣམ་རྒྱལ་གྱི་རྩ་བའི་བླ་མ་བྱང་ཆུབ་བརྩོན་འགྲུས་ཀྱིས་འབྲུག་རྒྱལ་དང་པོ་གོང་ས་དབང་ཕྱུག་མཆོག་ལུ་དགེ་སློང་མ་དཔལ་མོའི་དབུ་ཐོད་ཨ་རང་བྱོན་ཅིག་གནང་ཡོད་མི་འདི་བཞུགས་སུ་གསོལ་ནི་གི་དོན་ལས་ལྷ་ཁང་བཞེངས་སའི་ས་འཚོལ་དགོས་པའི་བཀའ་ཕེབས་པ་ལྟར་འཇིམ་བཟོ་སློབ་དཔོན་བསྟན་པའི་ཉི་མ་དང་དེ་བསྒང་མི་རྗེ་དམ་པའི་འབོད་སྒརཔ་སྦེ་བཞུགས་མི་༧སྐྱབས་རྗེ་ཁྲི་ཟུར་རིན་པོ་ཆེའི་ཡབ་སྒོམ་ཆེན་བ་སྒོ་ཟེར་ཞུ་མི་གཉིས་ཀྱིས་དབུ་ཁྲིད་འབད་དེ་ལས་རོགས་དག་པར་ཅིག་བུམ་ཐང་ལས་མར་ཀྲོང་གསར་བརྒྱུད་ཤར་བསྒོར་སྒོར་ནང་ལྷོདཔ་ད་གཡུས་དེ་ཁར་ཁྱིམ་གུང་པ་དགུ་དེ་ཅིག་ཡོད་མི་ཚུ་གཡུས་ཀྱི་ལྷ་ཁང་ཅིག་ བཞེངས་ནི་ཨིན་པའི་བསྟུན་འགྲོས་རྐྱབ་པའི་བསྒང་ཨིནམ་ལས་རང་བཞིན་གྱིས་རྟེན་འབྲེལ་མ་སྒྲིག་རང་འགྲིགས་སོང་སྟེ། བླ་མའི་ལུང་བསྟན་ནང་ལུ་ལྷ་ཁང་འདི་ཞལ་ལྷོ་ཁ་ཐུག་ལུ་འགོར་ཏེ་བཞེངས་བདེ་ཏོག་ཏོ་ཡོད་སའི་ས་ཆ་ཅིག་འཚོལ་དགོཔ་སྦེ་ཡོདཔ་ཨིནམ་ལས། ས་གནས་དེ་ནང་ཀྲིག་ཀྲིག་ཕོག་ཡོདཔ་ཨིན་པས། དེ་སྦེ་ལྷོ་ཁ་ཐུག་ལུ་བཞེངས་དགོ་མི་འདི་ཡང་དེ་ བསྒང་ལྷོའི་དམག་ལས་བཟློག་ཐབས་ཀྱི་དོན་ལས་ཨིན་པས་ཟེར་བཤད་ནི་འདུག
དེ་ལས་རིམ་པ་བཞིན་དུ་གོང་ས་ཨོ་རྒྱན་དབང་ཕྱུག་ཞབས་ལུ་སྙན་གསན་ཞུས་ཏེ་ལྷ་ཁང་བཞེངས་དགོ་པའི་བཀའ་རྒྱ་གནང་བ་ལྟར་༧སྐྱབས་རྗེ་ཁྲི་ཟུར་རིན་པོ་ཆེའི་ཡབ་ཀྱིས་ལྷ་ཁང་གསར་བཞེངས་ཀྱི་འགོ་འདྲེན་གཙོ་བོ་མཛད་དེ་ས་བཅད་གནང་བའི་རྟེན་འབྲེལ་ནང་ཆོས་དུང་དཀར་པོ་ཅིག་བཙོང་མི་འཐོན་ཏེ་ཉོ་བཞག་ཡོདཔ་ལས་ཆོས་དུང་འདི་ད་ལྟོའི་བར་ན་ཡང་ལྷ་ཁང་གི་རྟེན་སྦེ་བཞུགས་སུ་གསོལ་ཏེ་ཡོདཔ་ཨིན།
ལྷ་ཁང་འདི་བཞེངས་པའི་སྐབས་བཟོ་རིག་རྒྱན་བཀོད་ཀྱི་ཕྱག་ལཱ་ཤིང་བཟོ་དང་པ་ཏྲ་ལྷ་བྲིས་གནང་མི་ཆ་མཉམ་གཞུང་ཞབས་ལས་ཁོང་མཁས་མཆོག་ཙང་ཙང་གནང་ཡོདཔ་ལས་ལྷ་ཁང་གི་པ་ཏྲ་ཚུ་ད་ལྟོ་ཡང་ཡོངས་གྲགས་ཡོདཔ་དང་ད་རེས་ནངས་པ་གཙུག་ལག་ཁང་དང་རྫོང་གཞི་གསརཔ་མང་ཤོས་ཅིག་གི་དཔེ་བལྟ་སའི་གཞི་ཅིག་ལུ་གྱུར་ཏེ་ཡོདཔ་ཨིན།
སྒོམ་སྡེ་འདི་ནང་ལུ་གསར་རྙིང་གི་བླམ་སྐྱེས་ཆེན་དམ་པ་ལེ་ཤ་ཅིག་བྱོན་ཏེ་དམ་པའི་ཆོས་ཀྱི་དབང་ལུང་ཟབ་མོའི་ཆོས་འཁོར་ལེ་ཤ་བསྐོར་གནང་ཡོད་པའི་ནང་ལས་སྤྱི་ལོ་ ༡༩༨༧ ལུ་པད་གླིང་ཡབ་སྲས་གསུམ༼༧སྐྱབས་རྗེ་སྒང་སྟེང་རིན་པོ་ཆེ། ༧སྐྱབས་རྗེ་གསུང་སྤྲུལ་རིན་པོ་ཆེ། ཞིང་གཤེགས་༧སྐྱབས་རྗེ་ཐུགས་སྲས་རིན་པོ་ཆེ།༽གདན་འདྲེན་ཞུས་ཏེ་པད་ གླིང་གཏེར་བྱོན་ཐུགས་རྗེ་ཆེན་པོ་མུན་སེལ་སྒྲོན་མེའི་སྒྲུབ་ཆེན་བཙུགས་གནང་ཡོདཔ་དང་། ཡང་སྤྱི་ལོ་ ༡༩༩༥ ལུ་ ༧སྐྱབས་རྗེ་སྒང་སྟེང་རིན་པོ་ཆེ་མཆོག་གིས་པད་གླིང་ཆོས་འཁོར་ཡོངས་རྫོགས་ཀྱི་དབང་ལུང་གནང་ཡོདཔ་ཨིན་པས།
སྔོན་མ་དགོན་སྡེ་ནང་ལུ་སྒོམ་སྡེཔ་ཚུ་ལུ་ཤེས་ཡོན་གྱི་མཐུན་རྐྱེན་ཡང་འབྲི་ཀློག་གི་ཡོན་ཏན་ཙམ་ཅིག་མ་གཏོགས་ཤུགས་ཆེ་ཤོས་རང་ཕྱི་ཀུན་རྫོབ་ཕྱག་ལེན་གྱི་རིགས་ལུ་གཙོ་བོར་བཏོན་སྟེ་སྦྱང་བརྩོན་གནང་དོ་ཡོདཔ་ཨིན་རུང་། སྐབས་ཅིག་ལས་ཁོང་རང་སྒོམ་སྡེ་དམངས་ཀྱིས་༧སྐྱབས་རྗེ་སྒང་སྟེང་རིན་པོ་ཆེ་ལུ་སྒང་སྟེང་མཐོ་སློབ་ལས་སློབ་དཔོན་ཅིག་གཏང་གནང་དགོ་པའི་གསོལ་འདེབས་ཞུས་པ་ལྟར་སློབ་དཔོན་ཅིག་བསྐོ་བཞག་གནང་སྟེ་སྒོམ་སྡེ་ནང་ལུ་བརྡ་དག་གི་གཞུང་ལས་འགོ་བཙུགས་ཏེ་ནང་ཆོས་སྤྱི་ལུ་སློབ་སྦྱོང་འབད་ནི་ཡང་འགོ་བཙུགས་གནང་སྟེ་ལོ་ངོ་ ༡༥ ལྷགཔ་ཅིག་འགྱོ་དོ་ཡོདཔ་མ་ཚད། སྤྱི་ལོ ༢༠༡༧ ལས་སྒོམ་སྡེའི་དབུ་འཛིན་རྡོ་རྗེ་སློབ་དཔོན་ཡང་སྔོན་མ་སྒོམ་སྡེ་ནང་ལུ་བཞུགས་མྱོང་ཡོད་མི་སྒང་སྟེང་མཐོ་ སློབ་ལས་མཁན་པོ་ཅིག་གསར་བསྐོས་གནང་ཡོདཔ་ཨིན་པས།
སྒོམ་སྡེཔ་ཚུ་གིས་དགོན་སྡེ་ཕྱི་ནང་གཉིས་ནང་ལུ་སྐུ་མཆོད་འབུམ་སྡེ་གི་རིགས་ལེ་ཤ་ཅིག་བཟུང་སྲོལ་ཡོད་པའི་ནང་ལས་སྦོམ་ཤོས་ཅིག་རྒྱལ་ཁབ་ཀྱི་བསྟན་སྤྱིའི་སྐུ་རིམ་དང་ལྷག་པར་དུ་མི་དབང་སྐུ་འཁོར་ལྷན་རྒྱས་ཚུ་གིས་སྐུ་རིམ་ལུ་གཙོ་བོར་མཛད་དེ་ཐིམ་ཕུག་ལྕང་སྒང་ཁ་ལུ་དབྱར་ཟླཝ་གསུམ་གྱི་རིང་ལུ་རྒྱལ་བའི་བཀའ་འགྱུར་རིན་པོ་ཆེ་ལྷག་གནང་དོ་ཡོདཔ་ཨིན་པས། དེ་སྦེ་བཀའ་འགྱུར་ལྷག་ནིའི་སྲོལ་ཡང་དེ་བསྒང་ཞིང་གཤེགས་མི་དབང་འབྲུག་རྒྱལ་གསུམ་པ་མཆོག་སྐུ་སྙུང་སྟེ་བཞུགས་པའི་སྐབས་དང་རྒྱལ་ཁབ་ཆབ་སྲིད་ཀྱི་གནས་སྟངས་ཉག་ཕྲ་བའི་སྐབས་མི་དབང་ཞིང་གཤེགས་ཁོ་རང་གིས་དམིགས་བསལ་གྱི་སྐུ་རིམ་སྦེ་སྒོམ་སྡེ་འདི་ལུ་ལོ་གསུམ་དེ་ཅིག་ལྷག་དགོཔ་སྦེ་བཀའ་གནང་ཡོདཔ་ཨིན་པས། ཨིན་རུང་ཡང་ལོ་གསུམ་གྱི་རྒྱབ་ལས་འཕྲོ་མཐུད་བསྐལ་པ་མ་སྟོང་གི་བར་ན་ལྷག་དགོཔ་སྦེ་བཀའ་རྒྱ་གནང་ཡོདཔ་ཨིན་པས། བཀའ་འགྱུར་འགོ་ཐོག་ལྷག་ས་ཡང་ཐིམ་ཕུག་བཀྲིས་ཆོས་རྫོང་ནང་ལུ་ཨིནམ་དང་ལོ་གཅིག་གི་རྒྱབ་ལས་ལྕང་སྒང་ཁ་ལུ་སྦེ་ལྷག་ནི་འགོ་བཙུགས་ཏེ་ད་ལྟོའི་བར་ན་ཡང་གཙུག་ལག་ཁང་འདི་ནང་ལུ་རང་ལྷག་གནང་དོ་ཡོདཔ་ཨིན། ཡོངས་གྲགས་ལུ་སྒོར་སྒོར་ནང་གི་སྒོམ་ཆེན་ཚུ་འབྲུག་རྒྱལ་ཁབ་ཀྱི་ནུབ་ཕྱོགས་ཁ་ཐུག་ལུ་ཀློག་རྩལ་ལེགས་ཤོམ་ཡོད་པའི་སྐད་གྲགས་ཡོདཔ་ཨིན་པས། གཏམ་དཔེ་སླབ་སྲོལ་ལུ་ཡང་བསྒོར་སྒོར་པ་དང་ཀློག་མ་འགྲན། སྒང་སྟེང་པ་དང་འཆམ་མ་འགྲན་ཟེར་སླབ་སྲོལ་ཡོདཔ་ཨིན་ནོ།།
