དགོན་པ་འདི་ལྷུན་རྩེ་རྫོང་ཁག །རྒྱ་རས་རྒེད་འོག་ནང་ཆགས་ཏེ་འདུག །དེ་ཡང་མོང་སྒར་ལས་ལྷུན་རྩེ་འགྱོ་སའི་གཞུང་ལམ་ཁར་ཆགས་ཏེ་ཡོད་པའི་ཨའུ་མཚོ་ཁྲོམ་ལས་ཁ་ཡར་ལྟ་ཀི་ལོ་མི་ཊར་༣༠ དེ་ཅིག་འགྱོཝ་ད་དགོན་པ་འདི་ནང་ལྷོདཔ་ཨིན་མས། རྒྱ་རས་ཟེར་མི་འདི་དགོན་པ་ཆགས་ཏེ་ཡོད་སའི་གཡུས་ཀྱི་མིང་ཨིནམ་ད། མིང་འདི་བྱར་རིགས་ཟེར་མི་ལས་སྒྲ་ཟུར་ཉམས་ཏེ་རྒྱ་རས་ཟེར་སླབ་སྲོལ་དར་ཁྱབ་སོང་ཡོདཔ་སྦེ་གཡུས་སྒོ་དེ་གི་ལོ་རྒྱུས་ལུ་ཉམས་མྱོང་ཡོད་མི་ཚུ་གིས་བཤདཔ་ཨིན་མས། དེ་ཡང་གཡུས་ཚན་འདི་ནང་ཡོད་པའི་རྒྱ་རས་ཞལ་ངོའི་མི་བརྒྱུད་འདི་དུས་རབས་བཅུ་པའི་ནང་བོད་ཀྱི་ལྷ་སྲས་གཙང་མ་ང་བཅས་ར་མོན་གྱི་གཡུས་ཁ་ལུ་ཕེབས་ཏེ་བཞུགས་པའི་སྐབས་ཁོ་ལུ་གདུང་བརྒྱུད་འཛིན་པའི་སྲས་བདུན་མཚེ་མ་སྦེ་བྱར་ཏེ་འཁྲུངས་ཡོདཔ་ལས་སྲས་གཅིག་གིས་མོན་ཤར་ཕྱོགས་ཁ་ཐུག་ལུ་ཕེབས་ཏེ་མི་བརྒྱུད་ལེ་ཤ་དར་བའི་སྐབས་རྒྱ་རས་ཞལ་ངོའི་མི་བརྒྱུད་ཡང་ཁོང་ལས་དར་ཡོདཔ་སྦེ་བཤད་སྲོལ་ཡོདཔ་ལས་གཡུས་ཀྱི་མིང་ཡང་ཁོང་གི་རིགས་བརྒྱུད་ཀྱི་མིང་ལས་བརྟེན་བྱར་རིགས་ཟེར་སླབ་སྲོལ་དར་ནུག། དེ་བསྒང་རྒྱ་རས་ཞལ་ངོའི་མི་བརྒྱུད་ཚུ་གཡུས་སྒོ་དེ་ནང་གི་མི་དྲག་དབང་ཅན་སྦེ་སྡོད་ཡོདཔ་ལས་གཡུས་སྒོ་ཧ་ལམ་ཅིག་ཁོང་གི་དབང་སྟེ་སྡོད་ཡོདཔ་ཨིན་མས།
༈ ལྷ་ཁང་འགོ་ཐོག་བཞེངས་པའི་ལོ་རྒྱུས།
ལོ་ངོ་བརྒྱ་ཕྲག་མང་རབས་ཅིག་སོང་ཡོད་པའི་རྒྱ་རས་ཞལ་ངོའི་ནགས་ཚང་གི་རྩ་བར་ཆགས་ཏེ་ཡོད་པའི་ ཐུབ་བསྟན་བཤད་སྒྲུབ་ཆོས་གླིང་དགོན་སྡེ་ འདི་འགོ་དང་པ་ཁོང་ར་གཡུས་ཚན་ཅིག་གི་མི་སེར་དམངས་གཅིག་མཐུན་གྱི་ཐོག་ལས་ཧེ་མ་ཡོད་པའི་དམངས་ཀྱི་ལྷ་ཁང་ཆུང་ཀུ་ཅིག་ཡོད་མི་འདི་ནང་དམངས་ཀྱི་རྐྱེན་སེལ་རིམ་གྲོ་དང་ཚེས་བཅུ་མཆོད་པ་ལ་སོགས་པ་ག་ཅི་བཏང་རུང་ཡང་ས་གོ་ཡངས་ཏོག་ཏོ་ཅིག་མེདཔ་ལས་སྤྱི་ལོ་༢༠༠༣ ལུ་ལྷ་ཁང་གསརཔ་ཅིག་བཞེངས་ནི་སྦེ་ལས་ཁོང་ར་མི་སེར་དམངས་གྲོས་མཐུན་འབད་དེ་ ལོ་འདི་ནང་ལས་ར་ལཱ་འགོ་བཙུགས་ཡོདཔ་ཨིན་མས། ཨིན་རུང་ཁོང་ར་མི་སེར་ཚུ་ལུ་རྒྱུ་སྦུང་ག་ཅིའི་ཐད་ལས་ཡང་སྐྱིད་སྡུག་ཕོག་སྡོད་མི་ཙང་ཙ་ཨིནམ་ལས་ལོ་ངོ་མང་རབས་ཅིག་སོང་རུང་ལྷ་ཁང་འདི་སྒྲུབ་མ་ཚུགས་པར་ཉག་ཕྲ་སི་སི་གི་གནས་སྟངས་ཅིག་འགྱུར་ཏེ་མཐའ་མཇུག་ལུ་ཁོང་ར་གཡུས་ཀྱི་མི་སེར་དམངས་བསྟུན་འགྲོས་གཅིག་ཁར་འགྲིགས་ཏེ་ལྷ་ཁང་འདི་ས་ཞིང་གི་ཁྲམ་དང་བཅསཔ་སྦེ་ལྷོ་ལྗོངས་འདིའི་སྔ་འགྱུར་པད་གླིང་བསྟན་པའི་གཙུག་རྒྱན་༧སྒང་སྟེང་སྐྱབས་མགོན་རིན་པོ་ཆེ་ལུ་ཕུལ་ནི་སྦེ་ཐག་བཅད་ནུག།
སྤྱི་ལོ་༢༠༠༩ ལུ་རིན་པོ་ཆེ་མཆོག་ཤར་ཕྱོགས་ཁ་ཐུག་ལུ་ཆོས་དོན་ཞབས་སྐོར་ནང་ཕེབས་པའི་སྐབས་གཡུས་སྒོའི་གོ་ཤེས་ཉན་ཤེས་དག་པར་ཅིག་མོང་སྒར་གྱི་གཞུང་ལམ་ཁ་ལང་ཛི་ཟེར་མི་ས་གནས་ནང་ལུ་བཅར་ཏེ་སྙན་གསན་འགོ་དང་པ་ཞུས་ཡོདཔ་ཨིན་མས། དེའི་སྐབས་ལུ་ལྷ་ཁང་འདི་ཐོག་ཚད་གཉིས་ཡོད་མི་ལས་གཅིག་མ་གཏོགས་བསྒྲུབས་མ་ཚུགས་པར་སྡོད་ནུག། ཁོང་མི་སེར་ཚུ་གིས་གསོལ་བ་བཏབ་བཞིན་དུ་རིན་པོ་གིས་ཡང་དེ་འཕྲོ་ལས་ལྷ་ཁང་འདི་བདག་འཛིན་གནང་ནི་ཨིན་པའི་ཞལ་བཞེས་ཐོབ་སྟེ་ཟླ་ངོ་དག་པར་ཅིག་གི་རྒྱབ་ལས་ར་སྤྱི་ལོ་༢༠༠༩ གི་དགུན་སྨད་དེ་ཅིག་ཁར་ ༧སྐྱབས་རྗེ་སྒང་སྟེང་རིན་པོ་ཆེ་གིས་ཞབས་ལས་དགོན་པ་དེ་ཁར་སྒང་སྟེང་བཤད་གྲྭ་ནང་ལས་སློབ་དཔོན་ཀུན་ཏུ་ལེགས་པ་བླམ་སྦེ་བསྐོ་བཞག་གནང་སྟེ་ཁོ་གིས་སྦེ་ལཱ་གི་འགོ་འདྲེན་མཛད་ཞིནམ་ལས་མ་དངུལ་གྱི་རྒྱབ་སྐྱོར་གཙོ་བོ་རྫོང་ཁག་དང་ཁོང་ར་གཡུས་སྒོ་དེ་ནང་གི་གཞུང་གཡོགཔ་ཚུ་ལས་བསྡུ་བླངས་དང་ཞལ་འདེབས་འཚོལ་ཏེ་ལྷ་ཁང་འདི་ལོ་ངོ་གཅིག་ལྷགཔ་ཅིག་གི་ནང་བསྒྲུབས་ཏེ་སྤྱི་ལོ་༢༠༡༠ གི་ཟླ་༡༡ པའི་ནང་གསེར་ཏོག་བཀལ་ཚུགས་ནུག།
༈ གཞི་རིམ་སློབ་གྲྭ་འགོ་བཙུགས་གནང་ཚུལ།
ཁོང་ར་རྒྱ་རས་པའི་མི་སེར་དམངས་ཀྱིས་ལྷ་ཁང་འདི་འགོ་ཐོག་བཞེངས་པའི་སྐབས་ཕྱག་མཆོད་ཕུལ་ས་ཙམ་ཅིག་མ་གཏོགས་དགེ་འདུན་གྱི་སྡེ་སྦེ་གཞི་བཙུགས་འབད་ནི་གི་མནོ་བསམ་གཏང་མ་ཚུགས་པས། ཨིན་རུང་ལྷ་ཁང་འདི་༧སྒང་སྟེང་རིན་པོ་ཆེ་ལུ་ཕུལ་བའི་སྐབས་གཡུས་སྒོ་འདི་ནང་ལུ་བླམ་ཆོས་པའི་དཀའ་ངལ་སྦོམ་ཡོདཔ་ལས་འདི་སེལ་ཐབས་ཀྱི་དོན་ལུ་རིན་པོ་ཆེ་གིས་གྲྭ་ཚང་ཆུང་ཀུ་ཅིག་ཡང་བཙུགས་གནང་དགོཔ་སྦེ་ཞུཝ་བཞིན་དུ་འགོ་ཐོག་བླམ་བསྐོ་བཞག་གནང་སྟེ་ལྷ་ཁང་འདི་བསྒྲུབས་ཚར་ཞིནམ་ལས་བླམ་འདི་དང་གཅིག་ཁར་དགེ་སློང་ཡང་ཞལ་གྲངས་བཅུ་གཅིག་སྒང་སྟེང་གསང་སྔགས་ཆོས་གླིང་ལས་བཏང་གནང་སྟེ་གཞི་རིམ་སློབ་གྲྭ་འགོ་དང་པ་བཙུགས་གནང་ནུག། གཞི་རིམ་སློབ་གྲྭ་འགོ་དང་པ་བཙུགས་ཞིནམ་ལས་དགེ་སློང་ཚུ་བཞུགས་སའི་གྲྭ་ཤག་ཅིག་མེདཔ་ལས་རྫོང་ཁག་བདག་སྐྱོང་ལུ་ཞུས་ཏེ་དགེ་སློང་ཞལ་གྲངས་༢༠ དེ་ཅིག་ཤོང་པའི་གྲྭ་ཤག་རྐྱབ་ནི་གི་རྒྱབ་སྐྱོར་གནང་ནུག། དེ་ལས་ཚུར་འགོ་བཙུགས་ཏེ་ད་རེས་ཚུན་ཚོད་ཀྱི་རིང་ལུ་སྒང་སྟེང་བཤད་གྲྭ་ནང་ལས་མཁན་པོ་རེ་དང་སློབ་དཔོན་གཉིས་རེ་གནང་ནུག །ཁོང་གིས་དགོན་སྡེ་འདི་འཛིན་སྐྱོང་འཐབ་ཡོདཔ་མ་ཚད་ད་རེས་ནངས་པ་དགེ་སློང་གསརཔ་འཛུལ་མི་ཡར་སེང་སོང་སྟེ་ཞལ་གྲངས་སུམ་བཅུ་དང་། སྤྱི་ལོ་༢༠༢༡ ལས་དགོན་པ་འདི་གི་དབུ་འཛིན་ཡང་སྒང་སྟེང་མཐོ་སློབ་ལས་སྤྲུལ་སྐུ་ཅིག་བདག་རྐྱེན་གནང་སྟེ་ཁོ་གིས་འགོ་འདྲེན་མཛད་ཐོག་སློབ་དཔོན་གཉིས་ཀྱིས་འཛིན་སྐྱོང་འཐབ་གནང་བཞིན་པ་འདུག། སྤྱིར་གཏང་དགོན་སྡེ་འདི་ནང་ལུ་མཐོ་ཤོས་གཞི་རིམ་ལྔ་པ་ཚུན་མ་གཏོགས་སློབ་སྦྱོང་འབད་ནི་མེད་རུང་དུས་ཅི་ལས་དགོན་སྡེའི་འཛིན་སྐྱོང་དང་གཡུས་སྒོ་འདི་ནང་མི་སྡེའི་འགོ་ཁྲིད་ཀྱིས་གཙོས་པའི་མི་སེར་ཚུ་གིས་༧དགོན་པའི་བསྟན་བདག་༧སྐྱབས་རྗེ་རིན་པོ་ཆེ་དང་སྒང་སྟེང་བཤད་གྲྭའི་རྒྱུན་སྐྱོང་ལུ་རེ་སྐུལ་ཞུཝ་བཞིན་དུ་འབྲིང་རིམ་བཤད་གྲྭའི་ལོ་རིམ་དང་པ་ཚུན་སློབ་སྦྱོང་འབད་ནི་ཡོདཔ་སྦེ་ཡར་སེང་གནང་སྟེ་འདུག།
༈ གཙུག་ལག་ཁང་གི་ནང་རྟེན་གྱི་སྐོར།
སྤྱི་ལོ་ ༢༠༡༠ ལུ་ཁོང་ར་མི་སེར་ཚུ་འུ་ལཱ་རྒྱུག་སྟེ་ལྷ་ཁང་འདི་བཞེངས་འཕྲོ་སྦེ་སྡོད་པའི་སྐབས་བཟང་པོའི་རྟེན་འབྲེལ་རང་བཞིན་གྱིས་འགྲིགས་སྟེ་ང་བཅས་ར་འབྲུག་མི་སྤྱི་བོ་གནམ་སྟོན་ཡོངས་ཀྱི་ལྟ་བའི་མིག་དང་ཁོག་པའི་སྙིང་ལས་ལྷག་པའི་མི་དབང་མངའ་བདག་རིན་པོ་ཆེ་འབྲུག་རྒྱལ་ལྔ་པ་མཆོག་ལྷུན་རྩེ་རྫོང་ཁག་ནང་ས་ཆའི་སྐྱིད་སྡུག་གནང་པར་བྱོན་ཏེ་རྒྱ་རས་རྒེད་འོག་ནང་ཕེབས་པའི་སྐབས་ལྷ་ཁང་འདི་བཞེངས་སའི་ས་གོ་ནང་ཕེབས་ད་མི་སེར་ཚུ་ལུ་ཤུལ་ལས་ལྷ་ཁང་འདི་བསྒྲུབས་ཞིནམ་ལས་ནང་གི་རྟེན་ཆ་ཚང་དཔོན་ཁོ་ར་གིས་གནང་གེ་ཟེར་ཞལ་བཞེས་བཟང་པོ་ཐོབ་སྟེ་ སྤྱི་ལོ་༢༠༡༤ ལུ་ནང་རྟེན་གཙོ་བོ་རྒྱུ་སྨན་འདམ་ལས་སྒྲུབ་པའི་སྟོན་པའི་སྐུ་འདྲ་མི་ཚད་མ་གཅིག་དང་། གུ་རུ་རིན་པོ་ཆེ་མཁའ་འགྲོ་གཙོ་འཁོར་དང་བཅས་པ་གཅིག །ཞབས་དྲུང་རིན་པོ་ཆེའི་སྐུ་མི་ཚད་མ་གཅིག །མགོན་ཁང་ནང་ལུ་མགོན་པོ་མ་ནིང་ནག་པོའི་སྐུ་འདྲ་ཕིཊ་གང་ལྷག་ཙམ་ཅིག་ཡང་གནང་སྟེ་བཞུགས་སུ་གསོལ་གནང་ཡོདཔ་ཨིན། ད་རུང་གཞན་ཡང་སྐྱེས་ཡུལ་རྒྱ་རས་ལས་རང་ཨིན་མི་སྒང་སྟེང་རྟ་བ་སྡིང་ལས་སྦྱིན་བདག་སྐལ་བཟང་ཕུན་ཚོགས་ཀྱིས་པདྨ་གླིང་པའི་སྐུ་འདྲ་ཕིཊ་བཞི་འབད་མི་ཅིག་སྒང་སྟེང་དགོན་པ་ལུ་བཞེངས་ཞིནམ་ལས་ཕུལ་གནང་སྟེ་འདུག། སྤྱི་ལོ་༢༠༡༥ ལུ་ལྷ་ཁང་ཕྱི་ནང་རྟེན་དང་བརྟེན་པར་བཅས་ཡོངས་སུ་རྫོགསཔ་སྦེ་བསྒྲུབས་གནང་སྟེ་སྤྱི་ལོ་༢༠༡༥ གི་སྤྱི་ཟླ་༡༢ པའི་ནང་ལུ་མོང་སྒར་རྒྱལ་པོ་ཞིང་ལས་རྒྱལ་ཚབ་འཇིགས་མེད་རྡོ་རྗེ་མཆོག་སྐུ་མགྲོན་གཙོ་བོ་སྦེ་བྱོན་ཏེ་༧སྒང་སྟེང་རིན་པོ་ཆེ་མཆོག་གིས་སྦེ་མཛད་གནང་ནུག།
༈ དུས་མཆོད་འབུམ་སྡེའི་རིགས།
དགོན་སྡེ་འདི་ནང་ལུ་ལོ་གཅིག་གི་རིང་ལུ་དུས་མཆོད་འབུམ་སྡེ་ཡང་ཟླ་བ་དང་པའི་ཡར་ཚེས་ནང་ལུ་ཉིནམ་གསུམ་གྱི་རིང་རྒྱལ་བའི་བཀའ་འགྱུར་ལྷག་གནང་དོ་ཡོདཔ་དང་། ཟླཝ་༤ པ་ས་ག་ཟླ་བའི་ཚེས་༡༥ ལུ་ཚོགས་འཁོར་ཉིནམ་གཅིག། ཟླཝ་༥ པའི་ཚེས་༡༠ སྤྲེལ་ཟླའི་ཚེས་བཅུ་གུ་རུའི་དུས་ཆེན་ལུ་པད་གླིང་བླ་མ་ནོར་བུ་རྒྱ་མཚོའི་ཚོགས་འཁོར་ཉིནམ་གཅིག། ཟླཝ་ ༦ པའི་ཚེས་༤ ལུ་ཚོགས་འཁོར་རྒྱས་པ་ཉིནམ་གཅིག། ཟླཝ་༩ པའི་༢༢ ལྷ་བབས་དུས་ཆེན་ལུ་ཚོགས་འཁོར་རྒྱས་པ་ཉིནམ་གཅིག། གཞན་ཡང་ཟླ་རིམ་བཞིན་དུ་གཡུས་སྒོ་ནང་གི་མི་སེར་ཚུ་སྡེ་ཚན་སྦེ་བཟོ་ཞིནམ་ལས་སྦྱིན་བདག་འབད་དེ་ཡར་ངོ་མར་ངོའི་ཚེས་བཅུ་ཚུ་མ་ཆད་པར་གནང་སྟེ་འདུག། དེ་མ་ཚད་དུས་རྒྱུན་བཞུགས་མི་མཁན་སློབ་དང་དགེ་འདུན་པ་ཚུ་གིས་དྲོ་པ་སྒྲོལ་ཆོག་དང་ཕྱི་རུ་མགོན་པོ་སྡེ་བརྒྱད་ཀྱི་གསོལ་ཁ་དང་བར་བསམ་སྒྲོལ་གསུམ་དང་བཟློག་པ་ཚེས་སྒྲུབ་ཚུ་མ་ཆད་པར་གནང་དོ་ཡོདཔ་ཨིན་མས།
༈ དགོན་སྡེ་དེ་གིས་མི་སྡེ་ལུ་ཁེ་ཕན།
སྔོན་མ་གཡུས་སྒོ་དེ་ཚུ་ནང་ལས་ཕར་ཆོས་དང་འཛིག་རྟེན་གཅིག་ཁར་སྦེ་རྐྱབ་སྡོད་མི་སྒོམ་ཆེན་ལེ་ཤ་ཡོད་རུང་ཁོང་རྒས་ཤོས་ཚུ་རིམ་གྱིས་སྦེ་ཚེ་འདས་སོང་། གཞོནམ་ཚུ་མང་ཤོས་ཅིག་ཁྲོམ་ཁར་ལས་ཕར་གནས་སྤོ་སོང་སྟེ་ཆོསཔ་གི་དཀའ་ངལ་སྦོམ་སྦེ་ཐོན་སྡོད་ནུག། ཨིན་རུང་སྤྱི་ལོ་༢༠༡༡ ལས་དགོན་སྡེ་འདི་ནང་ལུ་གཞི་རིམ་སློབ་གྲྭ་འགོ་བཙུགས་ཞིནམ་ལས་རྒྱ་རས་རྒེད་འོག་གི་གཡུས་ཚན་བདུན་ནང་ལུ་ཆོས་པའི་དཀའ་ངལ་སེལ་ཚུགས་ཏེ་འདུག། དེ་མ་ཚད་དགོན་སྡེ་དེ་གི་ཤུགས་རྐྱེན་ལས་བརྟེན་མི་སེར་ཚུ་གིས་དགེ་སྒྲུབ་སྡིག་སྤོང་གི་ལཱ་ལུ་བརྩོན་ཤུགས་བསྐྱེད་མི་དང་ཚོགས་བསགས་སྒྲིབ་སྦྱང་གི་ལཱ་འབད་ནི་ལུ་དང་འདོད་བསྐྱེད་མི་ལེ་ཤ་གིས་ཡར་སེང་སོང་སྟེ་འདུག།
༈ དགོན་པའི་ས་ཞིང་དང་མ་འོངས་པའི་ལས་འཆར།
ཁོང་ར་མི་སེར་ཚུ་གིས་ལྷ་ཁང་འགོ་དང་པ་བཞེངས་པའི་སྐབས་ས་ཆ་གི་རྒྱབ་སྐྱོར་འདི་རྒྱ་རས་ནག་ཚང་གི་ཁྲམ་ཐོག་ལས་ས་ཆ་ཨེ་ཀར་༡ ཕུལ་ཏེ་ཤུལ་ལས་ལྷ་ཁང་འདི་སྒང་སྟེང་རིན་པོ་ཆེ་ལུ་ཕུལ་བའི་སྐབས་ལུ་ཡང་ས་ཆ་ཁྲམ་དང་སྦྲགས་ཕུལ་ཏེ་ད་ལྟོ་ཁོང་ར་དགོན་སྡེའི་མཚན་ཐོག་ལུ་སྤོ་ཚུགས་ཏེ་འདུག།
དགོན་སྡེའི་ས་ཆ་འདི་ས་གོ་དོག་དྲགས་ཅིག་ནང་ཨིནམ་ལས་མཐུན་རྐྱེན་ཡར་རྒྱས་གཏང་ནི་གི་ས་ཁོངས་སྦོམ་མེདཔ་ལས་གཞི་རིམ་སློབ་གྲྭ་འདི་ད་ལྟོ་ཡོད་པའི་ལྷ་ཁང་ལས་ཁ་མར་བལྟ་ཀི་ལོ་མི་ཊར་༡ ལྷགཔ་ཅིག་འོངམ་ད་་་་་་ཟེར་མི་ས་གོ་ནང་ལུ་སྤོ་བཤུད་འབད་ནི་སྦེ་ད་ལྟོ་ལྷ་ཁང་དང་དགེ་འདུན་པའི་བཞུགས་ཤག་གཞན་ཉེ་བར་མཁོ་བའི་མཐུན་རྐྱེན་ཚུ་རྐྱབ་ནི་གི་དོན་ལུ་གྲ་སྒྲིག་འབད་བའི་བསྒང་ཨིན་མས། དེ་ཡང་ལྷ་ཁང་གཙོ་བོ་འདི་རིན་པོ་ཆེ་ཁོ་ར་སྐུ་སྒེར་གྱི་ཐོག་ལས་བཞེངས་གནང་ནི་སྦེ་ཞལ་བཞེས་ཐོབ་ཡོདཔ་དང་། གཞན་ཚུ་རྫོང་ཁག་དང་རྒེད་འོག་ལས་གྲོགས་རམ་ཞུ་ནི་སྦེ་ཨིན་མས།
དགོན་པ་ལུ་བཞུགས་མི།
རྫོགས་ཆེན་སྤྲུལ་སྐུ་ཨྱོན་འགྱུར་མེད་རྡོ་རྗེ།
སློབ་དཔོན་ཏའུ་ཅུ་ལ། 17761310
