དགེ་རྩ་ཆེན་ཐུབ་བསྟན་བཤད་སྒྲུབ་ཆོས་གླིང་དགོན་པ་འདི། དབང་འདུས་རྫོང་ཁག །ཕོབ་སྦྱིས་རྒེད་འོག་གི་ནང་ལུ་ཨིནམ་ད། སྒང་སྟེང་དགོན་པ་ལས་སོ་ནམ་ཞིང་ལམ་བརྒྱུད་དེ་ཀི་ལོ་མི་ཊར་ ༡༥ དེ་ཅིག་འགྱོཝ་ད་དགེ་རྩ་ཆེན་གཡུས་ཚན་གྱི་རི་མགུ་ལུ་ཆགས་ཏེ་འདུག །གཡུས་ཚན་གྱི་མིང་ལུ་བརྒལ་མཐར་ཕྱིན་དང་གད་སྟེགས་ཕྱིན་ཟེར་སླབ་སྲོལ་དང་འབྲི་སྲོལ་ཡོད་རུང་ང་བཅས་ཀྱིས་ལྷ་ཁང་གི་ཁྲམ་ནང་ཡོད་མི་འདི་ལྟར་དུ་བྲིས་ཡོད། ལྷ་ཁང་འདི་རྒྱལ་ཡུམ་སྐུ་བགྲེས་རིན་པོ་ཆེ་སྐལ་བཟང་མཆོག་གིས་སྦྱིན་བདག་མཛད་ཐོག་རྒྱལ་ཡུམ་གྱི་སྲུང་འཁོར་པ་རྩིས་སློབ་སྨིན་དྲུག་ཟེར་ཞུ་མི་གིས་འགོ་འདྲེན་ཐོག་རུ་ཁ་དང་དགེ་རྩ་ཆེན་གྱི་མི་སེར་ཚུ་གིས་སྦེ་སྤྱི་ལོ་ ༡༩༩༠ ལོ་ལུ་ཕྱི་ནང་རྟེན་དང་བརྟེན་པ་བཅས་པ་སྦེ་གསརཔ་བཞེངས་གནང་སྟེ་རབ་གནས་ཡང་ ༸སྐྱབས་རྗེ་སྒང་སྟེང་རིན་པོ་ཆེ་མཆོག་གིས་གནང་ནུག །
༈ ནང་རྟེན།
སྐུ་རྟེན་གཙོ་བོ་འཕགས་མཆོག་བཅུ་གཅིག་ཞལ་ཕྱག་སྟོང་སྤྱན་སྟོང་། གཡས་ཁ་ཐུག་རྗེ་བཙུན་འཇམ་དཔལ་དབྱངས་དང་གུ་རུ་རིན་པོ་ཆེ། རྟ་མགྲིན་དང་རྡོར་སེམས། གཡོན་ཁ་ཐུག་ལུ་ཞབས་དྲུང་རིན་པོ་ཆེ་དང་སྟོན་པ། ཕྱག་རྡོར་དང་སངས་རྒྱས་ཚེ་དཔག་མེད། སྟོན་པ་བཅོམ་ལྡན་འདས་དང་སྤྱན་རས་གཟིགས་ཞལ་གཅིག་ཕྱག་བཞི་པ་ཚུ་བཞུགས་ནུག །
གསུང་རྟེན་རྒྱལ་བའི་བཀའ་འགྱུར་རིན་པོ་ཆེ་དང་། ཐུགས་རྟེན་རྒྱུ་ཙན་དན་ལས་གྲུབ་པའི་བྱང་ཆུབ་མཆོད་རྟེན། དེ་ལས་ལྡེབས་རིས་ཡང་། ཀུན་བཟང་ཞི་ཁྲོའི་ལྷ་ཚོགས་དང་། བྱང་ཆུབ་ལྟུང་བཤགས་ཚུ་བཞེངས་གནང་ནུག །མ་གཞི་ལྷ་ཁང་འདི་བཞེངས་ཏེ་ལོ་ངོ་ ༣༠ དེ་ཅིག་ལས་བརྒལ་མ་འགྱོ་རུང་ཐོག་ཆས་དང་ཤིང་ཆས། ལྡེབས་རིས་དང་སྒོ་ཐེམ་ཚུ་ཉམས་ཆག་ཤོར་ཏེ་ཡོདཔ་ལས་ཉམས་གསོ་ཞུ་དགོཔ་སྦེ་མཇལཝ་མས།
༈ ལྷ་ཁང་སྒང་སྟེང་རིན་པོ་ཆེ་ལུ་རྩིས་ཕུལ་གནང་བ།
ལྷ་ཁང་འདི་སྒང་སྟེང་རིན་པོ་ཆེ་ལུ་ཕུལ་དགོ་པའི་གནད་དོན་ཡང་། དང་པ་གཡུས་ཚན་འདི་དང་ཉེ་འདབས་ཀྱི་ས་གནས་ཚུ་ནང་པད་གླིང་གི་ཆོས་རྒྱུན་དར་ཏེ་ཡོདཔ་ལས་བརྟེན་ཨིནམ་ད། གཉིས་པ་ གཟིག་གཟིགས་དང་དགེ་རྩ་ཆེན་གཡུས་ཚན་ཚུ་ནང་ལས་ཕར་བླམ་ཆོསཔ་གི་དཀའ་ངལ་བྱུང་སྟེ་ཡོད་པའི་ཁར་ དཀོན་གཉེར་འབད་མི་མ་འཐོན་པར་ལྷ་ཁང་བདག་འཛིན་འཐབ་མ་ཚུགས་པའི་དཀའ་ངལ་འཐོན་ཏེ་ཕྱག་མཆོད་ཡང་དུས་ཚོད་ཁར་ཕུལ་མ་ཚུགས་པར་ཡོདཔ་ལས། མི་སེར་གྱི་གཤིན་དོན་དགེ་རྩ་དང་གསོན་པོའི་རིམ་གྲོ་ལ་སོགས་པའི་སྐྱིད་སྡུག་སེལ་ཐབས་ལུ་ རྩིས་སློབ་སྨིན་དྲུག་ཁོ་རང་གིས་གཙོས་པའི་མི་སེར་ཚུ་མགྲིན་གཅིག་གི་ཐོག་ལས་ ༸སྐྱབས་རྗེ་སྒང་སྟེང་རིན་པོ་ཆེ་མཆོག་ལུ་ལྷ་ཁང་རྩིས་བཞེས་དགོ་པའི་གསོལ་འདེབས་དང་བཅས་ཕུལ་ནུག ། དེ་མ་ཚད་ཧེ་མ་ལས་རང་གཟིག་གཟིགས། ཤོ་བ་ ༼ཤོག་བྲག༽ ལྟ་ཕུག་ཚུ་ནང་ལུ་མང་ཆེ་ཤོས་རང་སྒང་སྟེང་བླ་མའི་གྲྭཔ་ཨིནམ་ལས་བརྟེན་ཏེ་ཡང་ཕུལ་ཡོདཔ་ཨིན་མས།
ལྷ་ཁང་འདི་སྒང་སྟེང་རིན་པོ་ཆེ་ལུ་ཕུལ་ཞིནམ་ལས་སྒང་སྟེང་ལས་ཡོངས་གྲགས་ལུ་བླམ་དགེ་བཤེས་དང་བླམ་ཕུརཔ་བསམ་གྲུབ། བླམ་དངོས་གྲུབ་ཚུ་རབས་དང་རིམ་པ་སྦེ་བསྐོས་ཏེ་བཞུགས་པའི་སྐབས་སྒོམ་སྡེ་ཅིག་ཡང་བཙུགས་ཏེ་ གཟིག་གཟིགས་ཀྱི་སྒོམ་ཆེན་མང་ཆེ་ཤོས་ཅིག་སློབ་སྦྱོང་འབད་དེ་སྡོད་ནུག །
དེ་ལས་ལྷ་ཁང་འདི་སྤྱི་ལོ་ ༢༠༡༨ ལས་རིན་པོ་ཆེའི་ཞབས་ལས་མཁན་རིན་པོ་ཆེ་ཀརྨ་དབང་རྒྱལ་ལུ་ལོགས་སུ་སྦེ་བདག་འཛིན་གནང་དགོཔ་སྦེ་བཀའ་ཕེབས་ཞིནམ་ལས་ད་རེས་ནངས་པ་གཙོ་བོ་མཁན་པོ་མཆོག་གིས་དབུ་ཁྲིད་ཐོག་ལུ་ སྒང་སྟེང་བཤད་གྲྭའི་ནང་ལས་སློབ་དཔོན་རྣམ་པ་གཉིས་ཀྱིས་སྦེ་འཛིན་སྐྱོང་གནང་སྟེ་འདུག །དེ་ཡང་མཁན་པོ་མཆོག་གིས་ལྷ་ཁང་ནང་ལུ་གློག་མེའི་མཐུན་རྐྱེན་བཙུགས་ནི་དང་ལྷ་ཁང་ཡོད་ས་ཚུན་སྣུམ་འཁོར་ལམ་མི་ཊར་ ༦༠༠ དེ་ཅིག་སེལ་གནང་ཡོད་པའི་ཐོག་ཁར་། རྒེད་འོག་གི་ཁ་ཐུག་ལས་མ་དངུལ་རྒྱབ་སྐྱོར་ཐོག་སྣུམ་འཁོར་ལམ་གྱི་རྡོ་བསྒྲིག་ནི་དང་། ལྷ་ཁང་གི་དམང་ཐབ། དེ་ལས་འཐུང་ཆུ་ཡང་བཏོན་གནང་ནུག །དེ་མ་ཚད་ལྟ་བ་སྡིང་ལས་སློབ་དཔོན་སྐལ་བཟང་ཕུན་ཚོགས་ཀྱིས་ཡང་དགོན་པའི་གློག་མེ་བཙུགས་ནི་དང་གཞན་མཐུན་རྐྱེན་སྦྱར་ནི་ལུ་གྲོགས་རམ་འབད་དང་འབད་བཞིན་དུ་འདུག།
ད་རེས་སློབ་དཔོན་གྱི་གཟིམ་ཅུང་དང་སློབ་ཕྲུག་གི་གྲྭ་ཤག་གསར་བསྐྲུན་འབད་བའི་བསྒང་ཡོད་མི་འདི། ཕྱིའི་མ་དངུལ་གྱི་ཐོག་ལུ་མཁན་རིན་པོ་ཆེ་གིས་གནང་བའི་ཁར། ནང་གི་འཛིན་སྐྱོང་སློབ་དཔོན་རྣམ་པ་གཉིས་ཀྱིས་མཛད་ཐོག་གཙོ་བོ་དགེ་རྩ་ཆེན་དང་གཟིག་གཟིགསཔ་གི་མི་སེར་ཚུ་དང་། དེ་ལས་ ཟེ་བག་ ཚུ་གིས་ཡང་ཞབས་ཏོག་འུར་ལས་དང་འབྲེལ་ཏེ་འཐུས་ཨ་ཙི་རེ་གནང་སྟེ་ཕྱག་ལཱ་གནང་བའི་བསྒང་འདུག །ལྷ་ཁང་འདི་ནང་དུས་ཅི་སྤྱི་ལོ་ ༢༠༢༡ ལུ་འགོ་ཐོག་སློབ་གཉེར་འབད་མི་སློབ་ཕྲུག་གྲངས་བདུན་དེ་ཅིག་གསར་འཛུགས་འབད་ཡོདཔ་ད་གྲྭ་ཤག་གསརཔ་འདི་གྲུབ་པའི་བསྒང་ལས་སློབ་ཕྲུག་ ༣༠ དེ་ཅིག་ཤོང་ཚུགས་ནི་ཨིན་མས།
དེ་བཟུམ་སྦེ་གད་སྟེགས་ཕྱིན་གཡུས་ཀྱི་ལྟག་ལས་ཡར་དུས་ཡུན་སྐར་མ་༣༠ དེ་ཅིག་འགྱོཝ་ད་སྨན་ཆུ་ཅིག་ཡོད་མི་འདི། མགུ་ནད་དང་མིག་ནད། ཕོཝ་དང་སྒལ་ཏོག་ན་ནི་དང་། རྐང་ཚིགས་ལག་ཚིགས་ལ་སོགས་པ་ག་ཅི་རང་ན་རུང་སྨན་ཆུ་འདི་གིས་ཁོལམ་སྦེ་ཁྱུ་རུང་དྲག་ཚུགས་པའི་ནུས་པ་ཡོདཔ་སྦེ་བཤདཔ་ཨིན་མས། སྨན་ཆུ་འདི་ད་རེས་ཆུ་དུང་ནང་ལས་དགོན་པའི་སྦོ་ལོག་ཁར་དྲངས་ཏེ་ཡོདཔ་ལས་སྨན་ཆུ་སྦང་མི་ཚུ་ཡང་མ་ཆད་པར་འཐོན་ཏེ་འདུག །
གཞན་དང་མ་འདྲ་བའི་ནད་སེལ་ཚུགས་པའི་ནུས་པ་ཡོདཔ་སྦེ་བཤདཔ་ལས་།
༈ དུས་མཆོད་འབུམ་སྡེ།
༡༽ རང་ཟླ་དང་པོའི་ཚེས་ ༡༥ ལུ་རྒྱལ་བའི་བཀའ་འགྱུར་ཞལ་དབྱེ་ནི།
༢༽ རང་ཟླ་ ༢ པའི་ཚེས་ཚེས་ ༡༠ ལུ་ཚེས་བཅུ།
༣༽ རང་ཟླ་ ༣ པའི་ཚེས་ ༡༠ ལུ་ཞབས་དྲུང་སྐུ་མཆོད།
༤༽ རང་ཟླ་ ༤ པའི་ཚེས་༡༥ ལུ་དུས་ཆེན་ལྔ་འཛོམས།
༥༽ རང་ཟླ་ ༥ པའི་ཚེས་ ༡༠ ལུ་སྤྲེལ་ཟླ།
༦༽ རང་ཟླ་ ༦ པའི་ཚེས་ ༤ ལུ་བདེན་བཞི་ཆོས་འཁོར་བསྐོར་བའི་དུས་ཆེན།
༧༽ རང་ཟླ་ ༧ པའི་ཚེས་ ༡༣ ལས་ ༡༥ ཚུན་མུན་སེལ་སྒྲོན་མེའི་མ་ཎི་དུང་སྒྲུབ་དང་། ཚེས་ ༡༦ ལུ་སློབ་དཔོན་རྩིས་པ་སྨིན་དྲུག་གི་འདས་མཆོད།
༨༽ རང་ཟླ་ ༩ པའི་ཚེས་ ༡༣ ལས་ ༡༦ ཚུན་བདེ་ཆེན་ཞིང་སྒྲུབ་དང་། ༢༢ ལུ་ལྷ་བབས་དུས་ཆེན།
དགོན་པ་ལུ་བཞུགས་མི།
སློབ་དཔོན་པ་སངས། ༼ད་གར་པ༽འགྲུལ་འཕྲིན་ཨང་། 17774468
སློབ་དཔོན་ཀུན་བཟང་རྡོ་རྗེ། ༼གཞལ་སྒང་པ༽ འགྲུལ་འཕྲིན་ཨང་ 17526170
