མིང་གཞན། “གསེར་གཞོང་བཀྲ་ཤིས་ཆོས་གླིང་” ཟེར་སླབ་ཨིན་མས། དགོན་པ་འདི་མོང་སྒར་རྫོང་ཁག་ ཤེལ་རི་མུ་ཧཱུཾ་རྒེད་འོག་གི་ནང་ལུ་ཨིནམ་ད། ཡཱ་དྷི་ཁྲོམ་ལས་སྤྱིར་བཏང་གཞུང་ལམ་བརྒྱུད་དེ་མུ་ཧཱུཾ་རྒེད་འོག་ཚུན་ཀི་ལོ་མི་ཊར་ ༢༠ དང་། རྒེད་འོག་ལས་སོ་ནམ་ཞིང་ལམ་བདའ་སྟེ་ཀི་ལོ་མི་ཊར་ ༤ དེ་ཅིག་འགྱོཝ་ད་མཐོ་བའི་རི་སྒང་ཅིག་གི་གུ་ཆགས་ཏེ་འདུག །གསེར་གཞོང་ཟེར་སླབ་དགོ་པའི་དོན་དག་འདི། ཕྱོགས་གཞན་ཁར་ལས་ལྟཝ་ད་གཡུས་འདིའི་ཆགས་ཚུལ་འདི་གསེར་གྱི་གཞོང་པ་དང་འདྲ་བའི་ཁར། འབྲུ་སྣ་དང་ཤིང་འབྲས་རྩི་ཤིང་མེ་ཏོག་སྣ་ཚོགས་འཚོགས་པའི་ཕུན་སུམ་ཚོགས་པའི་ཡུལ་ཅིག་འབདཝ་ལས་གསེར་གཞོང་ཟེར་སླབ་ཨིན་མས།
དགོན་པ་འདིའི་ཤར་ཕྱོགས་ལུ་མུ་ཧཱུཾ་དང་བ་ལམ་བྱབ་སྒང་། ལྷོ་ཁ་ཐུག་ལུ་ཡ་དྷི་དང་ལྕགས་ས་མཁར། ནུབ་ཕུན་ཚོགས་གླིང་དང་ཕྲུམ་ཆུང་། བྱང་བསོད་ནམས་མཁར་དང་། མཐིལ་ལིང་། ཡ་རབས་ལ་སོགས་པའི་གཡུས་ཚན་ཚུ་མཐོང་གསལ་ཆེ་ཏོག་ཏོ་སྦེ་ཡོད་པའི་ཁར། ལྷ་ཁང་འདིའི་ཉེ་འདབས་ལས་ཕར་ཡང་ལོ་ཐོག་དང་ཤིང་འབྲས་ལ་སོགས་པ་ཕུན་སུམ་ཚོགས་ཏོག་ཏོ་སྦེ་འཚོ་སའི་ས་ཁོངས་ག་ནི་བ་ཉམས་དགའ་བའི་ཁར་མཐོང་སྣང་ཆེ་བའི་སྤང་ཐང་ཅིག་ནང་ཆགས་ཏེ་འདུག །
ད་ལྟོ་དགོན་པའི་ས་ཆ་འདི་གཡུས་འདི་ནང་ལས་སྐུ་ན་བགྲེས་ཤོས་ཅིག་ཨིན་མི་ཚོགས་སློབ་མེེ་སློབ་དཔོན་ཀུན་བཟང་མཆོག་གི་ས་ཆ་ཨིནམ་ད། གཡུས་འདི་ནང་ལུ་རིག་འཛིན་པད་གླིང་ལུགས་ཀྱི་ཆོས་རྒྱུན་དར་ཁྱབ་ཡོདཔ་ལས་ ཆོས་རྒྱུན་མ་ཉམས་པར་བཞག་ཐབས་ལུ་བཤད་གྲྭ་ཅིག་གཞི་བཙུགས་འབད་ཚུགས་པ་ཅིན་བསྟན་པ་དང་སེམས་ཅན་ལུ་ཕན་ཐོགས་ནི་ཨིན་མས་ཟེར་ཐུགས་བསམ་བཞེས་ཏེ། ས་ཆ་འདི་ནང་སྤྱི་ལོ་ ༢༠༠༤ ལས་འགོ་བཟུང་ཏེ་ལྷ་ཁང་ཅིག་བཞེངས་ནིའི་འཆར་གཞི་བརྩམས། ༢༠༠༧ ལུ་ལྷ་ཁང་ཕྱི་གྲུབ་འབད་ཞིནམ་ལས་གཙོ་བོ་ཚོགས་སློབ་མེེ་སློབ་དཔོན་ཀུན་བཟང་ཁོ་རང་གིས་གཙོས་གཡུས་ཁའི་སྒོམ་ཆེན་ཚུ་གིས་ ༸སྐྱབས་རྗེ་སྒང་སྟེང་རིན་པོ་ཆེ་མཆོག་ལུ་ལྷ་ཁང་རྩིས་ཕུལ་ཞིནམ་ལས་བཤད་གྲྭ་ཅིག་གཞི་འཛུགས་གནང་དགོས་པའི་གསོལ་འདེབས་དང་འབྲེལ་མི་སེར་གྱི་མཐའ་དོན་ལུ་བླམ་མཁན་པོ་གཅིག་གནང་དགོ་པའི་ཞུ་བ་ཕུལཝ་བཞིན་དུ་རིན་པོ་ཆེ་མཆོག་གིས་ཐུགས་བརྩེའི་ཞལ་བཞེས་མཛད་དེ། སྒང་སྟེང་དགོན་པ་ལས་སློབ་དཔོན་ཚུ་རབས་དང་རིམ་པ་སྦེ་གནང་ནུག །དེ་ལས་འགོ་བཟུང་གཞི་རིམ་བཤད་གྲྭ་ཅིག་གསར་འཛུགས་འབད་དེ་མཚན་ཡང་གསེར་གཞོང་བཀྲ་ཤིས་ཆོས་གླིང་ཟེར་མིང་བཏགས་ནུག །
ཨིན་རུང་ནང་རྟེན་བཞེངས་ནིའི་ཕྱག་ལཱ་འགོ་བཙུགས་མ་ཚུགས་པར་ལོ་ངོ་དགུ་དེ་ཅིག་འགྱོ་བའི་ཤུལ་སྤྱི་ལོ་ ༢༠༡༤ ལུ་སྒང་སྟེང་བཤད་གྲྭ་ནང་ལས་སློབ་དཔོན་བསོད་ནམས་དབང་ཕྱུག་བཞུགས་པའི་རིང་ལུ་ ༸སྐྱབས་རྗེ་རིན་པོ་ཆེ་རང་གིས་སྦེ་སྦྱིན་བདག་མཛད་དེ་གུ་རུ་མཚན་བརྒྱད་ནང་གཟུངས་དང་བཅས་པ་བཞེངས་པ་གིས་མ་ཚད། བཤད་གྲྭའི་གྲྭ་ཤག་དང་རིན་པོ་ཆེའི་གཟིམ་ཅུང་ཚུ་ཡང་གསར་བཞེངས་འབད་དེ་ ༢༠༡༥ ལུ་བཀའ་བརྒྱད་ཡང་གསང་ཐུགས་ཀྱི་མེ་ལོང་གི་སྒྲུབ་ཆེན་བཙུགས་གནང་། ལྷ་ཁང་འདི་ནང་ལུ་སྐུ་གསུང་ཐུགས་རྟེན་གཞན་དང་མཆོད་ཆས་ཚུ་ཡང་ག་ར་སྐྱབས་རྗེ་རིན་པོ་ཆེ་རང་གིས་སྦེ་མཁོ་སྒྲུབ་མཛད་གནང་ནུག །
༈ དུས་མཆོད་འབུམ་སྡེ། རང་ཟླ་དང་པོའི་ཚེས་ ༣ ལུ་རིག་འཛིན་པདྨ་གླིང་པའི་འདས་མཆོད་དང་། གསུམ་པའི་ཚེས་ ༡༠ ལུ་ཞབས་དྲུང་སྐུ་མཆོད། བཞི་པའི་ཚེས་ ༡༥ ལུ་དུས་ཆེན་ལྔ་འཛོམས། རང་ཟླ་ ༥ པའི་ཚེས་ ༡༠ ལུ་ཨྱོན་གུ་རུ་རིན་པོ་ཆེ་འཁྲུངས་པའི་སྤྲེལ་ཟླ་ཚེས་བཅུ། དྲུག་པའི་ཚེས་ ༤ ལུ་སྟོན་པ་བདེན་བཞི་ཆོས་འཁོར་བསྐོར་བའི་དུས་ཆེན། རང་ཟླ་ ༩ པའི་ཚེས་ ༢༢ ལུ་རྒྱལ་བ་ལྷ་ལས་བབ་པའི་དུས་ཆེན་བཅས་ལོ་གཅིག་ནང་གི་དུས་ཆེན་ཁག་དྲུག་གི་སྐབས་དང་ཡར་ངོ་མར་ངོའི་ཚེས་བཅུ་བཟུང་ནི་ཚུ་མ་གཏོགས་གཞན་དམིགས་བསལ་གྱི་འབུམ་སྡེ་གཞན་ག་ནི་ཡང་མི་འདུག །
༈ བླ་སློབ་ཀྱི་ཁ་གྲངས་དང་། སློབ་ཕྲུག་གི་ཤེས་ཡོན།
སྤྱི་ལོ་ ༢༠༠༧ ལུ་ལྷ་ཁང་རྩིས་བཞེས་ཞིནམ་ལས་བཟུང་སྒང་སྟེང་བཤད་གྲྭའི་ནང་ལས་མཁན་པོ་དང་སློབ་དཔོན་རེ་ཟུང་གནང་ཏེ་འཛིན་སྐྱོང་གནང་དོ་ཡོདཔ་ད། དུས་ཅི་སྤྱི་ལོ་ ༢༠༢༡ ལོ་ནང་ལུ་བླམ་གཅིག་དང་སློབ་དཔོན་གཉིས་ཀྱིས་སྦེ་དགོན་པ་དང་། སློབ་ཕྲུག་ཁ་གྲངས་ ༢༠ དེ་ཅིག་བདག་སྐྱོང་གནང་ཏེ་འདུག །སློབ་ཕྲུག་ཚུ་ཡང་ལོ་ན་ ༥ ལས་ ༡༥ འི་ནང་ཁོད་འབད་མི་ཚུ་ཨིན་མས། སློབ་ཕྲུག་ཚུ་གིས་ཀ་ཁ་ལས་འགོ་བཟུང་སྦྱོང་ཀློག་དང་ཚིག་བསྡུས་ཀྱི་ལྷག་རིག་དང་། མགྱོགས་ཡིག་དང་རི་མོ་ཚུ་བྲི་ནི། སྔ་ཐུན་དགོང་ཐུན་དང་སྨོན་ལམ་གྱི་རིགས་ཚུ་བཟུང་ནི། གཞན་ཡང་སུམ་རྟགས་དང་དག་ཡིག་ཚུ་གི་རྩ་བ་བློ་ལུ་བཟུང་དགོ་དོ་ཡོདཔ་ཨིན་མས། ད་རུང་ཆོ་ག་ཕྱག་ལེན་གྱི་དོན་ལས་གཏོར་བཟོ་དང་། དུང་དང་རྒྱ་གླིང་འཕུ་ནི། རོལ་མོ་དཀྲོགས་ནི་ཚུ་ཡང་ལྷབ་སྦྱངས་འབད་དོ་ཡོདཔ་ཨིན།
༈ མ་འོངས་པའི་ལས་སྣ། སྤྱིར་བཏང་སློབ་དཔོན་བཞུགས་ས་ཡོད་དེ་འབད་རུང་ཕྱི་ལས་བླ་སློབ་རེ་བྱོན་པའི་སྐབས་བཞུགས་ས་མེདཔ་ལས་བླ་སློབ་ཀྱི་གཟིམ་ཅུང་གཅིག་དང་། སློབ་ཕྲུག་ལུ་མེད་ཐབས་མེད་པའི་ཁོར་ཡུག་སློབ་སྟོན་ཁང་(འཛིན་གྲྭ་ཁང་པ།)། དེ་བཟུམ་སྦེ་སློབ་ཕྲུག་གི་དོན་ལུ་ཐབ་ཚང་ཅིག་ངེས་པར་དུ་དགོས་གལ་ཆེཝ་སྦེ་ཡོདཔ་ལས་དེ་ཚུ་གསར་བཟོའི་ལས་འགུལ་འགོ་འཛུགས་ནིའི་ལས་འཆར་འདུག །
གཞི་རིམ་བཤད་གྲྭའི་འཛིན་སྐྱོང་སློབ་དཔོན།
བླམ་འཇམ་དབྱངས་རྡོ་རྗེ། # 17902661
སློབ་དཔོན་ཟླ་དབང་རྡོ་རྗེ། # 17769402
སློབ་དཔོན་དམ་ཆོས་རྡོ་རྗེ། # 17669681
