ཀུར་སྟོད་ཀུན་བཟང་གླིང་ལྷ་ཁང་གི་ཆགས་རབས།
༼ཕྱིའི་བཀོད་པ།༽
དང་པོ་ཀུར་སྟོད་ཀུན་བཟང་གླིང་ལྷ་ཁང་གི་ཕྱིའི་བཀོད་པ་ཆགས་ཚུལ་མདོར་བསྡུས་ཙམ་ཅིག་བཤད་པ་ཅིན། དེ་ཡང་དགོན་པ་འདི་ཆགས་སའི་ཤར་ཕྱོགས་ཁ་ཐུག་ལུ་རི་གླང་པོ་ཆེ་འགྱིང་སྡོད་དོ་བཟུམ་སྦེ་ཡོདཔ་ཨིན། དེའི་ཕྱོགས་ལུ་གནས་ཀྱི་ཆེ་བ་ཀུར་སྟོད་སེང་གེ་རྫོང་དང། འདི་གིས་རྣལ་འབྱོར་པའི་ཉམས་ལེན་ལུ་ཕྱི་ནང་གསང་གསུམ་གྱི་གནོད་པ་དང་སྐུ་ཚེ་ལུ་བར་ཆད་མེད་པའི་བརྡ་མཚོན་ཨིན། ལྷོ་ཕྱོགས་ཁ་ཐུག་ལུ་རི་ནགས་ཤིང་བྱིན་ཆགས་ཏོག་ཏོ་སྦེ་ཆགས་སྟེ་ཡོདཔ་དང་། དེ་ནང་ ཡུལ་ལྷ་སྲིབ་ལ་རྡོ་རྗེ་དཀར་པོ་དང་དབང་ཆེན་བཟང་མོ་གཉིས་ཀྱི་གནས་ཁང་ཁྱོན་ཡངས་པ་དང་དབྱིབས་རྒྱ་ཆེ་བ་སྦེ་གནས་ཏེ་ཡོདཔ་ཨིན། ཁོང་གཉིས་ཀྱིས་རིག་འཛིན་པདྨ་གླིང་པ་ཀུར་སྟོད་ཕྱོགས་ལུ་བྱོན་པའི་སྐབས་སྐུ་གཟུགས་དངོས་སུ་སྟོན་ཏེ་པད་གླིང་གི་བསྟན་པ་སྲུང་བའི་ཁས་བླངས་མཛད་གནང་ནུག །ལྷོ་ཕྱོགས་ལུ་གནས་ཀྱི་ཆེ་བ་ཕུ་ལུ་གསང་བདག་སྐུ་འབུམ་དང་མདའ་ལུ་སྦས་ཡུལ་ཁམས་ཕུག་གཞན་ཡང་གནས་འདི་ནང་བདེ་གཤེགས་མཆོད་རྟེན་བརྒྱད་བྱིན་རླབས་དང་དངོས་གྲུབ་ཀྱི་མཚན་ཁ་མ་ཉམས་པར་མཇལ་ནི་ཡོདཔ་ཨིན་པས། ནུབ་ཕྱོགས་ལུ་རྡོ་རྗེ་བྲག་རི་གཟེངས་མཐོ་བ་འདི་གིས་རྣལ་འབྱོར་པའི་ཏིང་ངེ་འཛིན་བརྟེན་པའི་བརྡ་མཚོན་དང་རྡོ་རྗེ་བྲག་རི་བཙན་པའི་སྟེང་ལུ་གནས་རིན་ཆེན་དབྱིབས་ཀྱི་བུམ་པ་དང་ཨོ་རྒྱན་པད་མའི་སྦས་ཡུལ་མཁན་པ་ལྗོངས་གཉིས་བྱིན་རླབས་ཀྱི་རྒྱུན་མ་ཆད། གཟི་བརྗིད་ཀྱི་མདངས་མ་ཡལ་བར་ མཇལ་ནི་ཡོད། བྱང་ཕྱོགས་ལུ་རི་ཁྱོན་ཡངས་པའི་དབུས་སུ་པད་མ་གླིང་པ་གནས་དེ་ཁར་བསྟན་འགྲོའི་མཛད་ཕྲིན་བསྐྱངས་ཏེ་བཞུགས་པའི་སྐབས་བཞེངས་གནང་བའི་བྱང་ཆུབ་མཆོད་རྟེན་པད་གླིང་རང་གི་ཕྱག་པར་དང་བཅས་པ་སྦེ་བཞུགས་ཏེ་ཡོདཔ་མ་ཚད་པད་གླིང་རང་གིས་བྱིན་གྱིས་བརླབས་གནང་བའི་ནད་རིགས་བཞི་རྒྱ་རྩ་བཞི་ལུ་ཕན་པའི་སྨན་ཆུ་དང་ཚྭ་ཆུ་ ཡང་ཡོད། དེ་ཐམས་ཅད་ཀྱི་དབུས་ལུ་སྟེང་གནམ་འཁོར་ལོ་རྩིབས་བརྒྱད་དང་འོག་གདན་དབྱིབས་རིན་ཆེན་སྤུངས་བཞག་བཞགསཔ་བཟུམ་གྱི་ཐོག་ཁར་སྔོན་མ་དུས་རབས་བརྒྱད་པའི་ནང་ལུ་ཨོ་རྒྱན་གྱི་སློབ་དཔོན་ཆེན་པོ་པད་མ་འབྱུང་གནས་དང་གྲུབ་ཐོབ་མེ་ལོང་རྡོ་རྗེ། རིག་འཛིན་ཀུ་མ་ཛ་སོགས་ཀྱིས་བྱིན་གྱིས་བརླབས་གནང་བའི་གདན་ས་ཆེན་པོ། ལྷག་པར་དུ་ ཡང་དུས་རབས་༡༤པའི་བར་ཙམ་ལུ་ཀུན་མཁྱེན་རྒྱལ་བ་གཉིས་པ་ཀློང་ཆེན་རབ་འབྱམས་དཔལ་བཟང་པོ་མཆོག་བོད་ལུ་བཞུགས་པའི་སྐབས་ཆབས་སྲིད་ཀྱི་དབང་ཆ་ལས་བརྟེན་ཏེ་ས་སྐྱ་དང་ཕག་གྲུ་པ་གཉིས་ཀྱི་བར་ན་དུས་ཀྱི་ཟིང་ཆ་འབྱུང་ནི་ཨིནམ་མཁྱེན་ཏེ་སྤྱི་ལོ་ ༡༣༥༡ ལུ་འབྲུག་ཆོས་ལྡན་གྱི་ཞིང་ཁམས་འདི་ནང་ཕེབས་གནང་སྟེ་ཀུན་མཁྱེན་རང་གི་ཕྲིན་ལས་དང་པ་བསྐྱངས་གནང་བའི་སྐབས་བུམ་ཐང་བརྒྱུད་ཀུར་སྟོད་ཕྱོགས་ལུ་ཕེབས་ཏེ་ཀུར་སྟོད་ཀུན་བཟང་གླིང་གི་གདན་ས་ཆེན་པོ་འདི་ཉིད་བཞེངས་ཏེ་བྱིན་གྱིས་བརླབས་གནང་ཡོདཔ་ཨིན་པས། གཙུག་ལག་ཁང་འདི་བཞེངས་གནང་བའི་རྗེས་སུ་ཀུན་མཁྱེན་རང་གི་ལྷུན་གྲུབ་རྫོགས་པ་ཆེན་པོའི་ཆོས་ཀྱི་འཁོར་ལོ་ལེ་ཤ་ཅིག་གསུངས་གནང་ཡོདཔ་དང་ལྷག་པར་དུ་ཡང་ཀུན་ མཁྱེན་ཁོ་ར་གི་རྫོགས་པ་ཆེན་པོ་ཐོད་རྒལ་གྱི་ཉམས་ལེན་གནང་ས་གཙོ་བོ་ཅིག་ཨིན་པས། ཀུན་མཁྱེན་ཆེན་པོ་རང་དང་དངོས་སློབ་རྣམས་དུས་ཚོད་མང་ཆེ་བ་སྒྲུབ་པ་ཁོ་ན་ལུ་བརྩོན་བཞུགས་ཡོདཔ་མ་གཏོགས་དགོན་པ་འདི་རྐྱངམ་ཅིག་གིས་མ་ཚད་གཞུང་ཕྱོགས་ལུ་བཞེངས་གནང་ཡོད་པའི་དགོན་པ་དེ་ཚུ་ཡང་འཛིན་སྐྱོང་གི་དོན་གཉེར་ལུ་གཙོ་བོར་བཏོན་མ་གནང་པས། ཨིན་རུང་དགོན་པ་འདི་ཤུལ་ལས་ཀུན་མཁྱེན་ཀློང་ཆེན་རབ་འབྱམས་རང་གི་ཆོས་བརྒྱུད་ཀློང་ཆེན་རྙིང་ཐིག་གི་རིང་ ལུགས་འཛིན་མི་བླ་སློབ་ཚུ་གིས་བདག་འཛིན་མཛད་དེ་བརྒྱུད་འཛིན་ལེ་ཤ་ཅིག་དགོན་པ་འདི་ནང་བཞུགས་ཡོདཔ་དང་ལྷག་པར་དུ་དུས་རབས་ ༡༥ པའི་ནང་ལུ་ཀུར་སྟོད་ཕྱོགས་ལུ་ཀུན་མཁྱེན་རང་གི་ཆོས་བརྒྱུད་གཙོ་བོར་འཛིན་མི་བླ་མ་དགེ་འདུན་བཟང་པོ་ཟེར་ཞུ་མི་ཅིག་གིས་བདག་འཛིན་མཛད་དེ་འཛིན་སྐྱོང་གནང་བཞུགས་ཡོདཔ་ཨིན་པས། བླ་མ་ཁོ་རང་ཡང་ཀུ་རི་ ལུང་ལུ་བཞུགས་པའི་སྐབས་རིག་འཛིན་ཆེན་པོ་ཉིད་ལུ་ཕྱི་ནང་ངོ་ལྐོག་མེད་པར་དད་པ་དང་དམ་ཚིག་འགྱུར་བ་མེད་པ་ཡོད་མི་ཅིག་ཨིནམ་ལས་བླམ་རང་གིས་སྦྱིན་བདག་མཛད་དེ་པད་གླིང་གི་དབང་ལུང་ཆོས་ཁྲིད་ཡང་ལེ་ཤ་ཅིག་ཞུ་ཡོདཔ་ལས་ཀུར་སྟོད་ཕྱོགས་ལུ་པད་གླིང་རང་གི་སློབ་གཙོ་བོ་ཅིག་ཡང་ཨིན་པས། ཤུལ་ལས་བླ་མ་འདི་དགོངས་པ་རྫོགས་ཞིནམ་ལས་བླ་མའི་ཨ་ནེ་གིས་རིག་འཛིན་པདྨ་གླིང་པ་མཆོག་ཀུན་མཁྱེན་ཀློང་ཆེན་པའི་ཡང་སྲིད་དངོས་ཨིན་པའི་དད་དམ་འགྱུར་བ་མེད་པའི་ཤུགས་ཀྱིས་དགོན་པའི་རྟེན་མཆོད་ཡུལ་གཞི་དང་བཅས་པར་པད་གླིང་ལུ་རྩིས་ཕུལ་གནང་ནུག །དེ་ལས་རིམ་པ་བཞིན་དུ་རིག་འཛིན་ཆེན་པོ་པདྨ་གླིང་པ་མཆོག་གིས་གདན་ས་འདི་བདག་འཛིན་མཛད་དེ་བསྟན་འགྲོའི་མཛད་ཕྲིན་བསྐྱངས་ཏེ་བཞུགས་ཡོདཔ་དང་ལྷག་པར་དུ་རང་ལུགས་པད་གླིང་བསྟན་པའི་འགྲོ་དོན་རྒྱ་ཆེཝ་སྦེ་བསྐྱངས་གནང་ཡོད་མི་ལས་རིག་ འཛིན་ཆེན་པོ་པདྨ་གླིང་པའི་པད་གླིང་བླ་མ་ནོར་བུ་རྒྱ་མཚོའི་སྒྲུབ་ཐབས་སྐྱེ་བདུན་ཤའི་རིལ་བུ་སྒྲུབ་ས་ཡང་འགོ་དང་པ་གནས་འདི་ཁར་ཀུན་བཟང་གླིང་གྱི་སྦྱིན་བདག་ཚུ་གིས་རྒྱབ་སྐྱོར་མཛད་དེ་སྒྲུབ་གནང་བའི་ལོ་རྒྱུས་འདུག །འདི་གིས་མ་ཚད་ཀུན་བཟང་གླིང་གི་གཙུག་ལག་ཁང་འདི་ནང་བླམ་དགེ་འདུན་བཟང་པོ་རང་གིས་གསོལ་བ་བཏབ་དོན་ལྟར་ཐུགས་རྗེ་ཆེན་པོ་མུན་སེལ་སྒྲོན་མེའི་བཤད་ཁྲིད་དང་ཤངས་ཀྱི་བླ་མ་ཤཱཀྱ་དཔོན་སློབ་གཉིས་ཀྱིས་བསྐུལ་བའི་ངོ་ལུ་གནས་དེ་ཁར་རྫོགས་པ་ཆེན་པོ་ཀུན་བཟང་དགོངས་པ་ཀུན་འདུས་ཀྱི་ཉམས་ཁྲིད་དང་བཅས་པར་ཞག་གྲངས་ཉི་ཤུ་རྩ་ལྔའི་རིང་གནང་ནུག །དེ་སྦེ་རིག་འཛིན་པདྨ་གླིང་པ་མཆོག་གིས་གནས་འདི་ནང་ལུ་ཡུན་རིངམ་སྦེ་བཞུགས་ཏེ་སློབ་མ་ལེ་ཤ་ཅིག་ལུ་པད་གླིང་ཟབ་ཆོས་ཀྱི་དབང་ཁྲིད་ཉམས་ལེན་དང་བཅས་པ་ལེ་ཤ་ཅིག་སྤེལ་གནང་ཡོདཔ་ཨིན་པས། དེ་ལས་ཚུར་ཕ་ཤུལ་བུ་གིས་འཛིན་པའི་ཚུལ་སྦེ་ཀུར་སྟོད་མཁོ་ཆུང་བསམ་གྲུབ་ཆོས་གླིང་དགོན་པ་གདན་ས་བཅགས་གནང་མི་པད་གླིང་རང་གི་གདུང་སྲས་མཁས་གྲུབ་ཀུན་དགའ་དབང་པོ་གིས་གདན་ས་བཟུང་སྟེ་སྒྲུབ་པའི་སྡེ་བཙུགས་པ་དང་། སྐལ་ལྡན་སློབ་མའི་ཚོགས་ཡང་ལེ་ཤ་ཅིག་བསྐྱངས་གནང་ཡོདཔ་ཨིན་པས། ཡང་དུས་ཕྱིས་སུ་སྒང་སྟེང་གསང་སྔགས་ཆོས་གླིང་གི་ཉེ་འདབས་ལུ་སྐུ་ འཁྲུངས་མི་པད་གླིང་གཉིས་པ་རྒྱལ་བ་བསྟན་འཛིན་གྲགས་པ་མཆོག་ཡང་ཡུན་རིངམ་སྦེ་བཞུགས་གནང་ཡོདཔ་ལས་པད་གླིང་ཡབ་སྲས་དང་སྐུ་ཕྲེང་རིམ་བྱོན་ཚུ་བཞུགས་པའི་གདན་ས་གཙོ་ཅན་ཅིག་དང་ཀུར་སྟོད་ཕྱོགས་ལུ་པད་གླིང་བསྟན་པ་དར་སྤེལ་གནང་སའི་གནས་ལྟེ་བ་ཅིག་དང་རྩ་ཆེ་ཤོས་ཅིག་ཨིན། ད་རེས་ནངས་པ་ཡང་གདན་ས་འདི་སྔ་འགྱུར་པད་གླིང་བསྟན་ པའི་གཙུག་རྒྱན་དམ་པ་༧སྒང་སྟེང་སྐྱབས་མགོན་པད་ཕྲིན་དགུ་པ་ཀུན་བཟང་རིག་འཛིན་པདྨ་རྣམ་རྒྱལ་མཆོག་གིས་བདག་འཛིན་མཛད་དེ་དམ་ཆོས་ཟབ་མོའི་བསྟན་པ་སྤྱི་དང་སྒོས་སུ་ཡང་རང་ལུགས་པད་གླིང་ཆོས་ཀྱི་འཁོར་ལོ་དུས་དང་དུས་སུ་བསྐོར་དང་སྐོར་བཞིན་ཡོད།
༼ལྷ་ཁང་གི་ཕྱི་ནང་གི་རྟེན་ཁྱད་པར་ཅན་གྱི་སྐོར།༽
གདན་ས་ཀུན་བཟང་གླིང་གི་གཙུག་ལག་ཁང་ནང་ལུ་གདུལ་བྱ་བསོད་ནམས་སོགས་པའི་ཡུལ་ཕྱག་དང་མཆོད་པ་ཕུལ་སའི་རྟེན་མཆོག་ནང་རྟེན་གྱི་རིམ་པ་ཡང། སྤྱིར་གཏང་ཀུན་མཁྱེན་ཀློང་ཆེན་རབ་འབྱམས་རང་གིས་གནས་འདི་ཀུན་མཁྱེན་རང་གི་སྒྲུབ་ཁང་སྦེ་གདན་ས་བཅགས་ཏེ་བྱིན་གྱིས་བརླབས་གནང་ཡོད་པ་ཙམ་མ་གཏོགས་སྐུ་གསུང་ཐུགས་ཀྱི་རྟེན་ལ་སོགས་པ་ཚུ་གྱི་རིགས་བཞེངས་ཡོད་པའི་ལོ་རྒྱུས་མེད་རུང་རྟིང་ལས་རིག་འཛིན་པདྨ་གླིང་པ་མཆོག་གིས་རང་གི་ཕྱག་བཟོ་སྟོན་པའི་སྐུ་མདའ་ཚད་མ་གཅིག་དང་གུ་རུ་དང་ཛམ་བྷ་ལའི་སྐུ་ཁྲུ་གང་མ་ཅིག་རིག་འཛིན་ཆེན་པོ་རང་གིས་བཞེངས་གནང་སྟེ་ནང་རྟེན་གྱི་གཙོ་བོ་སྦེ་བཙུགས་གནང་ཡོདཔ་ཨིན་པས། མ་འོངས་གདུལ་བྱའི་བསོད་ནམས་ཀྱི་བགོ་སྐལ་ལུ་གཙུག་ལག་ཁང་གི་ནང་ན་ལུ་ཀུན་མཁྱེན་རང་གི་སྒྲུབ་ཁང་ཆུང་ཀུ་ཅིག་ཡོད་མི་འདི་ནང་རྡོ་གུར་ཀུན་མཁྱེན་ཆེན་པོ་ཁོ་ར་གི་ཞབས་རྗེས་དངོས་སུ་བཞགས་གནང་ཡོད་མི་འདི་མཇལ་ནི་ཡོདཔ་མ་ཚད། གཙུག་ལག་ཁང་གི་རྒྱབ་ཁར་ལུ་ཡང་ཀུན་མཁྱེན་གྱིས་ཐོད་རྒོལ་གཟིགས་སའི་བཞུགས་ཁྲི་རྡོ་སྦོམ་ཅིག་ཡང་མཇལ་ནི་ཡོདཔ་ཨིན། བཞུགས་ཁྲི་རྡོ་འདི་ནང་ལུ་དྲང་སྲོང་གི་སྐུ་གཏེར་ལུ་སྦ་ འདི་ཡོད་པའི་ལོ་རྒྱུས་ཡོདཔ་ཨིན། གཙུག་ལག་ཁང་གི་ཟུར་ཕྱོགས་གཡས་ཁ་ཐུག་ལུ་ནམ་དུས་འཕོ་བཞི་ལུ་འགྱུར་བ་མེད་པའི་ཀུན་མཁྱེན་གྱི་སྒྲུབ་ཆུ་ཡ་མཚན་ཅན་ཅིག་དང་། དེ་གི་སྦོ་ལོག་ཁར་ལུ་ཡང་ཀུན་མཁྱེན་གྱི་བཞུགས་ཁྲི་ཅིག་ཡོད་མི་འདི་གི་མདུན་ལུ་མཁའ་འགྲོ་མ་ཚུ་གིས་གླུ་གར་འཁྲབ་སའི་རྡོ་སྦོམ་ཅིག་ཡང་མཇལ་ནི་ཡོད། རྡོ་དེ་གི་སྟེང་ལུ་ཀུན་མཁྱེན་དགུང་ལོ་བཅུ་དྲུག་མའི་ཚོད་དང་མཉམ་པའི་ཞབས་རྗེས་ཡ་མཚན་ཆེ་ཏོག་ཏོ་ཅིག་མཇལ་ནི་ཡོད། ལོ་རྒྱུས་དང་འཁྲིལཝ་ད་ཀུན་མཁྱེན་བཞུགས་ཁྲི་དེ་གུར་ཉམས་སྣང་ལུ་བཞུགས་པའི་སྐབས་མཁའ་འགྲོ་མ་ཚུ་དངོས་སུ་བྱོན་ཏེ་གླུ་གར་གྱི་མཆོད་པ་ཕུལ་བའི་སྐབས་ཀུན་མཁྱེན་ཉམས་འུར་ཏེ་དགུང་ལོ་བཅུ་དྲུག་མའི་ན་ཚོད་ལུ་བཞེངས་ཏེ་མཁའ་འགྲོ་མ་ཚུ་དང་གཅིག་ཁར་གར་ འཁྲབ་པའི་སྐབས་ཞབས་རྗེས་འདི་བཞགས་གནང་ཡོདཔ་ཨིན་པས། ཡང་འདི་གི་སྦོ་ལོགས་ཁར་ཀུན་བཟང་གླིང་ལྷ་ཁང་གི་ཉེ་འདབས་ལུ་ཡོད་པའི་རིན་ཆེན་བུམ་པའི་གནས་ཀྱི་གཏེར་གྱི་ལྡེ་མིག་གཏེར་ལུ་སྦ་འདི་ཡོད་མི་རྡོ་འདི་གུར་ ༧སྐྱབས་རྗེ་སྒང་སྟེང་རིན་པོ་ཆེ་པད་ཕྲིན་དགུ་པ་ཀུན་བཟང་རིག་འཛིན་པདྨ་རྣམ་རྒྱལ་མཆོག་གི་ཡལ་གྲིབ་མེད་པའི་ཕྱག་བྲིས་ཧཱུྃ་གི་ཡི་གེ་ཅིག་གསལ་ལ་འབུར་བའི་ཚུལ་ལུ་མཇལ་ནི་ཡོདཔ་ཨིན།
༼ལྷ་ཁང་གི་གཞི་དང་བཅས་པར་༧སྒང་སྟེང་སྐྱབས་མགོན་རིན་པོ་ཆེ་ལུ་རྩིས་ཕུལ་གནང་བའི་ལོ་རྒྱུས།༽
ཀུན་བཟང་གླིང་གི་གཙུག་ལག་ཁང་འདི་མི་རབས་ལེ་ཤ་ཅིག་གི་རིང་ལུ་ཀུར་སྟོད་གདུང་དཀར་ནག་ཚང་ནང་གི་མི་བརྒྱུད་ཚུ་གིས་བདག་འཛིན་དང་འཛིན་སྐྱོང་གཙོ་བོ་འཐབ་སྟེ་གཙུག་ལག་ཁང་གི་མཐའ་འཁོར་ལུ་ཡོད་པའི་མི་སེར་ཚུ་གིས་ཁྲལ་དང་ཞབས་ཏོག་ཞུ་སྡོད་ཡོདཔ་ཨིན་རུང་སྤྱི་ལོ་ ༢༠༠༨ རང་ལུགས་གནམ་ལོ་བྱི་ལོ་ཟླ་ ༡༢ པའི་ནང་ལུ་༧སྒང་སྟེང་སྐྱབས་མགོན་རིན་པོ་ཆེ་ཀུར་སྟོད་གདུང་དཀར་བརྒྱུད་དེ་ཀུན་བཟང་གླིང་ལུ་ཆིབས་སྐྱོད་གནང་བའི་སྐབས་གདུང་དཀར་ནག་ཚང་གི་མི་བརྒྱུད་གཙང་མར་འཛིན་པའི་མཁན་པོ་འཇིགས་མེད་དབང་ཕྱུག་དང་བུ་མོ་སྐུ་མཆེད་གཉིས་ཀྱིས་གཙུག་ལག་ཁང་གི་ས་གཞི་དང་བཅས་པར་ཟླ་ ༡༢ པའི་ཚེས་ ༡ རང་ལུགས་སྔར་སྲོལ་འབུལ་བའི་དུས་དང་བསྟུན་ ༧སྐྱབས་རྗེ་སྒང་སྟེང་རིན་པོ་ཆེ་ལུ་རྩིས་ཕུལ་གནང་ནུག། ༧སྐྱབས་རྗེ་རིན་པོ་ཆེ་མཆོག་གིས་ཡང་རྟེན་འབྲེལ་གྱི་ཆེ་བ་དང་པད་གླིང་ཡབ་སྲས་གོང་མ་རྣམས་ཀྱི་མཛད་ཤུལ་བཟང་པོ་མི་ཉམས་རྒྱུན་འཛིན་ཆེད་ལྷ་ཁང་བརྩིས་བཞེས་གནང་སྟེ་ཟླ་འདི་གི་ཚེས་ ༡ གི་ཉིན་མ་པད་གླིང་ཚེ་ཁྲིད་རྡོ་རྗེ་ཕྲེང་བའི་ཚེ་ཆོག་དབང་དང་བཅས་པར་གནང་སྟེ། ཕྱི་རུ་ཀུན་མཁྱེན་ཀློང་ཆེན་རབ་འབྱམས་རང་གིས་མཛད་པའི་ཆོས་དབྱིངས་མཛོད་ཀྱི་བཤད་ཁྲིད་རྒྱས་པར་གནང་། དུས་དེ་ལས་བཟུང་སྟེ་གཙུག་ལག་ཁང་འདི་༧སྒང་སྟེང་སྐྱབས་མགོན་རིན་པོ་ཆེ་རང་གི་སྐྱབས་འཛིན་གྱི་འོག་ལུ་ཕྱི་ནང་གསང་གསུམ་གྱི་འཛིན་སྐྱོང་དང་ལྟ་རྟོག་མཛད་མི་བླ་ཚབ་ཡང་སྒང་སྟེང་མཐོ་སློབ་ཆེན་མོ་ལས་བསླབ་པ་མཐར་སོན་མཁན་པོ་འཇིགས་མེད་དབང་ཕྱུག་ཁོ་ར་བསྐོ་བཞག་མཛད་གནང་ནུག།
༼ལྷ་ཁང་རྒྱ་བསྐྱེད་མཛད་དེ་ཉམས་སོ་མཐིལ་ཕྱིན་མཛད་གནང་བ་དང་བཀྲིས་རབ་གནས་གནང་བའི་སྐོར།༽
ལྷ་ཁང་འདི་བཞེངས་ཏེ་ལོ་ངོ་བརྒྱ་ཕྲག་སྦེ་སོང་ཡོདཔ་ལས་འབྱུང་བཞིའི་གནོད་པ་སྦོམ་སྦེ་མ་ཕོགཔ་ཙམ་ཅིག་མ་གཏོགས་ས་རྡོ་ཤིང་ཆས་ཚུ་ཧ་ཅང་གིས་ཞིག་རལ་སོང་ཡོདཔ་ལས་བརྟེན་རྒྱལ་བསྟན་ཡོངས་རྫོགས་ཀྱི་སྦྱིན་པའི་བདག་པོ་མི་དབང་རྒྱལ་ཡུམ་ཞིང་གཤེགས་ཨ་ཞེ་ཕུན་ཚོགས་ཆོས་སྒྲོན་མཆོག་དང་ཨ་ཞེ་པདྨ་བདེ་ཆེན་གཉིས་ཀྱིས་རྒྱུ་དངུལ་གྱི་རོགས་རམ་ ལས་བརྟེན་ལྷུན་གྲུབ་རིན་ཆེན་རྩེ་རྫོང་གི་དབུ་མཛད་བགྲེས་པ་མཆོག་གིས་ལཱ་གི་ལྟ་རྟོག་དང་འགོ་འདྲེན་མཛད་དེ་ལྷ་ཁང་འདི་ཉམས་བཅོས་ཞུས་གནང་ཡོདཔ་ཨིན་པས། ནང་རྟེན་ཡང་གཙོ་བོ་འཕགས་པ་བཅུ་གཅིག་ཞལ་དང་གཡས་གཡོན་ལུ་གུ་རུ་དང་རྡོ་རྗེ་སེམས་དཔའི་སྐུ་བྱིན་ཅན་གསུམ་རྒྱལ་ཡུམ་རང་གིས་སྦྱིན་བདག་མཛད་དེ་བཞེངས་གནང་ཡོདཔ་ཨིན་པས། ཡང་ལྷ་ཁང་འདི་ཉམས་གསོ་ཞུས་ཏེ་ལོ་གྲངས་ལེ་ཤ་སོང་ཡོདཔ་ལས་ཤིང་ཆས་ཚུ་མེདཔ་ཐལ་བའི་རྐྱེན་དང་ཧེ་མའི་ལྷ་ཁང་འདི་རྒྱ་ཆུང་བའི་སྟབས་ཀྱིས་དུས་མཆོད་འབུམ་སྡེ་དང་སྒྲུབ་པ་སྒྲུབ་ཆེན་ལ་སོགས་པ་ཚུ་གནངམ་ད་མི་གངམ་མ་ཤོངས་པའི་རྐྱེན་ལས་བརྟེན་སྤྱི་ལོ་ ༢༠༡༡ ལས་༧སྐྱབས་རྗེ་སྒང་སྟེང་རིན་པོ་ཆེ་མཆོག་གིས་བཀའ་སློབ་ལམ་སྟོན་དང་འཁྲིལ་དགོན་པའི་བླ་ཚབ་མཁན་པོ་འཇིགས་མེད་དབང་ཕྱུག་རང་གིས་ཐུགས་འགན་གཙོ་བོ་བཞེས་ཏེ་ལྷ་ཁང་གི་རྩ་བ་ལས་ར་ཉམས་སོ་མཐིལ་ཕྱིན་མཛད་དེ་ལོ་ངོ་ལྔ་ལྷག་ཙམ་གྱི་ནང་འཁོད་ལུ་ཕྱི་ནང་གི་རྟེན་དང་བརྟེན་པ་བཅས་པར་བསྒྲུབས་གནང་ནུག །ལྷ་ཁང་ཉམས་གསོ་ཞུ་མི་དང་འབྲེལ་༧སྒང་སྟེང་སྐྱབས་མགོན་རིན་པོ་ཆེ་རང་གི་ཞལ་བཀོད་དང་འཁྲིལ་ལྷ་ཁང་གི་ཟུར་ཕྱོགས་ལུ་མགོན་ཁང་གསརཔ་ཅིག་ཡང་བཙུགས་གནང་སྟེ་འདི་ནང་སྲུང་མ་གཙོ་བོ་མགོན་པོ་མ་ནིང་དང་ལྷ་མོ་ སྔགས་སྲུང་མ། དེ་ལས་དྲང་སྲོང་དང་གཏེར་བདག་ཟོ་ར་རྭ་སྐྱེས་ཚུ་བཞུགས་སུ་གསོལ་གནང་ཡོདཔ་ཨིན་པས། གཙུག་ལག་ཁང་ལེགས་པར་བསྒྲུབས་པའི་བཀྲིས་ཕུན་སུམ་ཚོགས་པའི་རབ་གནས་ཡང་སྤྱི་ལོ་ ༢༠༡༦ རང་ལུགས་གནམ་ལོ་ཆུ་མོ་ལུག་ལོ་རང་ཟླ་ ༡༡ པའི་ཚེས་ ༡༤ ལས་འགོ་བཙུགས་ཉིན་གྲངས་ ༧ གྱི་རིང་སྔ་འགྱུར་རིག་འཛིན་པད་གླིང་བསྟན་པའི་མངའ་བདག་༧སྒང་སྟེང་སྐྱབས་མགོན་རིན་པོ་ཆེ་པད་ཕྲིན་དགུ་པ་ཀུན་བཟང་རིག་འཛིན་པདྨ་རྣམ་རྒྱལ་མཆོག་གིས་དབུ་བཞུགས་ཐོག་ཀུར་སྟོད་མཁོ་བྱུང་བསམ་གྲུབ་ཆོས་གླིང་གཞི་རིམ་སློབ་གྲྭའི་དགེ་སློབ་ལྷན་རྒྱས་དང་མོང་སྒར་ཙཀ་གླིང་སྒོམ་སྡེའི་སྒོམ་ཆེན་ཞལ་གྲངས་བསྡོམས་བརྒྱ་ལྷག་ཙམ་གྱིས་གུ་རུའི་ཐུགས་སྒྲུབ་བླ་མ་ནོར་བུ་རྒྱ་མཚོའི་སྒྲུབ་ཆེན་སྨན་གྱི་ སྒྲུབ་པ་དང་བཅསཔ་སྦེ་གནང་བའི་ཚེས་ ༡༩ གཟའ་སྐར་དགེ་བའི་ཉིནམ་དང་བསྟུན་རབ་གནས་རྒྱས་པར་མཛད་གནང་སྟེ་ཚེས་ ༢༠ ལུ་སྒྲུབ་ཆེན་གྱི་དངོས་གྲུབ་བླངས་བ་དང་བཅས་གྲོལ་གནང་ནུག།
༼དུས་མཆོད་འབུམ་སྡེའི་སྐོར།༽
རྟེན་གསུམ་རབ་ཏུ་གནས་ཡོད་སའི་ལྷ་ཁང་དང་དགོན་སྡེ་གཙུག་ལག་ཁང་འདི་ཚུ་ནང་དཀོན་མཆོག་མཆོད་པའི་ཐབས་དང་གནས་བདག་སྲུང་མ་འདི་ཚུ་ལས་ལུ་བསྐུལ་ཏེ་མི་མཐུན་པའི་བར་ཆད་བཟློག་པའི་ཐབས་ལུ་ལོ་བསྟར་བཞིན་དུ་དུས་མཆོད་འབུམ་སྡེ་བཟུང་སྲོལ་ཡོད་དོ་བཟུམ་སྦེ་ཀུར་སྟོད་ཀུན་བཟང་གླིང་ལྷ་ཁང་ནང་ལུ་ཡང་སྔ་མའི་སྲོལ་མ་ཉམས་པར་ཡོད་མི་དེ་ཡང་། རང་ཟླ་ ༡༡ པའི་ཚེས་ ༡༥ ལུ་ཀུན་བཟང་གླིང་མཆོད་པ་ཟེར་བཏང་བའི་སྲོལ་ཡོདཔ་ཨིན། འདི་ཡང་གཙོ་བོ་པད་གླིང་མགོན་པོ་མ་ནིང་གིས་གཙོས་པའི་མ་གཟའ་དམ་གསུམ་དང་གཞན་ཡང་རྙིང་མའི་ཆོས་སྲུང་ཡོངས་རྫོགས་ཀྱི་གསོལ་མཆོད་ཡོངས་སུ་རྫོགསཔ་སྦེ་ཕུལ་གནང་དོ་ཡོདཔ་དང་འདི་ལུ་བདག་བསྐྱེད་གཙོ་བོ་པད་གླིང་བླ་མ་ནོར་བུ་རྒྱ་མཚོ་གནངམ་ཨིན་པས། དེ་ལས་རང་ཟླ་ ༡༢ པའི་ཚེས་ ༡༨ ལུ་ཀུན་མཁྱེན་ཀློང་ཆེན་རབ་འབྱམས་ཀྱི་འདས་མཆོད་ཉིན་གྲངས་གཅིག་ བཟུང་དོ་ཡོདཔ་དང་། ཟླ་ ༡ པའི་ཚེས་ ༣ ལུ་རིག་འཛིན་པདྨ་གླིང་པའི་འདས་མཆོད་ཉིནམ་གཅིག་དང་རང་ཟླ་ ༥ པའི་ཚེས་ ༡༠ ལུ་གུ་རུ་རིན་པོ་ཆེའི་སྐུའི་འཁྲུངས་སྐར་གྱི་ཉིནམ་ལུ་སྤྲེལ་ཟླ་ཚེས་བཅུ་ཟེར་བཟུང་སྲོལ་ཡོདཔ་ཨིན་པས། འདི་བཟུམ་སྦེ་རང་ཟླ་ ༦ པའི་ཚེས་ ༤ ལུ་སངས་རྒྱས་ཀྱི་བདེན་བཞི་ཆོས་འཁོར་བསྐོར་བའི་དུས་ཆེན་ལུ་ཚོགས་འཁོར་ཉིན་གྲངས་གཅིག་དང་ཟླ་ ༩ པའི་ཚེས་ ༢༢ ལུ་ལྷ་བབས་དུས་ཆེན་གྱི་ཚོགས་འཁོར་རྒྱས་པ་ཉིན་གྲངས་གཅིག་གི་རིང་ལུ་གནང་དོ་ཡོདཔ་ཨིན། ཀུར་སྟོད་ཀུན་བཟང་གླིང་ལྷ་ཁང་འདི་ལྷུན་རྩེ་རྫོང་ལས་སྣུམ་འཁོར་ནང་དུས་ཡུན་ཆུ་ཚོད་ ༢ ལྷག་ཙམ་ཅིག་འགོར་དོ་ཡོདཔ་དང་ལྷ་ཁང་འདི་གི་ཉེ་འདབས་ལུ་རིན་ཆེན་བུམ་པའི་གནས་དང་རིག་འཛིན་པད་གླིང་པའི་སྲས་མཁས་གྲུབ་དབང་པོའི་གདན་ས་མཁོ་ཆུང་དགོན་པ་དང་དབང་ཕྱུག་བརྒྱུད་འཛིན་གྱི་གདན་ས་ཀུར་སྟོད་གདུང་དཀར་ནག་ཚང་། གཞན་ཡང་གུ་རུ་རིན་པོ་ཆེ་དང་གཏེར་སྟོན་པད་མ་གླིང་པའི་གནས་དང་དགོན་པ་རྩ་ཅན་ལེ་ཤ་ཅིག་མཇལ་ཚུགས་དོ་ཡོདཔ་ཨིན་པས་ཟེར་ཞུ་ནི་ཨིན་ནོ། །
