མེ་ཏོག་པདྨ་ལོ་འདབ་རྒྱས་མི་འདི་ མེ་ཏོག་པདྨ་ལས་སྐུ་འཁྲུངས་མི་ སངས་རྒྱས་གཉིས་པ་ གུ་རུ་རིན་པོ་ཆེའི་བརྡ་མཚོན་ཨིན། ཆོས་ཀྱི་འཁོར་ལོ་འདི་ འགྲོ་བ་ཡོངས་ཀྱི་ཕན་བདེ་དང་ འཛམ་གླིང་ཞི་བདེའི་དོན་ལུ་ སངས་རྒྱས་ཀྱི་བསྟན་པ་རིན་པོ་ཆེ་འདི་ རྒྱུན་ཆད་མེད་པར་ དར་ཞིང་རྒྱས་པའི་བརྡ་མཚོན་ཨིན། ཆོས་ཀྱི་འཁོར་ལོའི་གཡས་གཡོན་གཉིས་ལུ་ ཀ་ཤ་ཡོད་མི་འདི་གིས་ སྟོན་པ་རྫོགས་པའི་སངས་རྒྱས་ཀྱིས་ ཆོས་ཀྱི་འཁོར་ལོ་དང་པ་བསྐོར་གནང་མི་དང་ འགྲོ་བ་སེམས་ཅན་ཚུ་གིས་ དམ་པའི་ཆོས་ཀྱི་བདུད་རྩི་ལུ་ རོ་མྱོང་བའི་བརྡ་མཚོན་ཨིན། འཁོར་ལོའི་སྟེང་དུ་ པདྨ་རྒྱས་པའི་ལོ་འདབ་གུ་ གཡོན་ཕྱོགས་ལུ་ བྱ་ངང་པ་ཅིག་དང་ གཡས་ཕྱོགས་ལུ་ བྱ་བ་ཀྲོ་ཅིག་ གདོང་སྐོར་རྐྱབ་སྟེ་ཡོད་མི་གིས་ སངས་ཀྱི་གསུང་རབས་ཚུ་ རྒྱ་གར་གྱི་ ལེགས་སྦྱར་སྐད་ལས་ བོད་ཀྱི་ཆོས་སྐད་ལུ་བསྒྱུར་མི་ ལོ་ཙཱ་བ་ཚུ་མཚོནམ་ཨིན། སྦུག་ན་ཡོད་པའི་ནང་པའི་ཡིག་འབྲུ་ཚུ་ སངས་རྒྱས་ཀྱི་གསུང་རབས་ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་བརྡ་མཚོན་དང་ དར་གྱིས་བརྒྱན་ཏེ་ཡོད་པའི་རལ་གྲི་འདི་གིས་ ཤེས་རབ་ཀྱི་ལྷ་འཕགས་པ་འཇམ་དཔལ་དབྱངས་ཀྱི་སྤྲུལ་པ་ ཆོས་རྒྱལ་ཁྲི་སོང་ལྡེའུ་བཙན་གྱི་བརྡ་མཚོན་ཨིན། དེའི་སྦུག་ན་ཡོད་མི་འདི་ གུ་རུ་རིན་པོ་ཆེའི་ལུང་བསྟན་ལྟར་དུ་བྱོན་མི་ གཏེར་སྟོན་ཆེན་པོ་ལྔའི་ཡ་གྱལ་ གཏེར་སྟོན་པདྨ་གླིང་པའི་སྐུ་འདྲ་ཨིན། སྐུ་འདྲའི་གཡོན་ཕྱོགས་ལུ་ ཡི་དམ་དཔའ་བོ་མཁའ་འགྲོ་ཚུ་གིས་ བདུད་རྩིའི་བུམ་པ་བཞེངས་པའི་ཚུལ་དང་ གཡས་ཕྱོགས་ལུ་ དཔའ་བོ་མཁའ་འགྲོ་ཚུ་གིས་ བྱིན་རླབས་ལྡན་པའི་འབྲུ་སྣ་ཚུ་ མཆོད་པ་ཕུལ་བའི་བརྡ་མཚོན་ཨིན། ལས་རྟགས་འདི་གུ་ འཛམ་གླིང་ཀུན་ཁྱབ་ཟེར་བའི་ ཡི་གུ་ཡོད་མི་འདི་གིས་ འཇིག་རྟེན་གྱི་ཁམས་ཀུན་ལུ་ཁྱབ་པའི་བརྡ་མཚོན་དང་ རྡོ་རྗེ་ཐེག་པ་འདི་ གསང་སྔགས་རྡོ་རྗེ་ཐེག་པའི་ཆོས་ཀྱི་མཚོན་བྱེད་དང་ པད་གླིང་ཆོས་ཀྱི་དགའ་ཚལ་ཟེར་མི་འདི་ འཛམ་གླིང་ནང་ པད་གླིང་གི་ཆོས་རྒྱུད་ འཛིན་སྐྱོང་སྤེལ་གསུམ་གྱི་ལྟེ་གནས་ཨིན་པའི་བརྡ་མཚོན་ཨིན།།
