ངོ་སྤྲོད།

༉ པད་གླིང་ཆོས་ཀྱི་དགའ་ཚལ་གཞི་ཚོགས་འདི་ གཏེར་སྟོན་ཆེན་པོ་རིག་འཛིན་པདྨ་གླིང་པའི་རིང་ལུགས་ཀྱི་བདག་པོ་གཙོ་བོ་ སྐྱབས་རྗེ་སྒང་སྟེང་སྤྲུལ་སྐུ་ སྐུ་ཕྲེང་ ༩ པ་ ཀུན་བཟང་རིག་འཛིན་པདྨ་རྣམ་རྒྱལ་དང་ བློ་གཏད་བཀོད་ཚོགས་ཀྱིས་ འབྲུག་གཞུང་ཆོས་སྡེའི་བཅའ་ཁྲིམས་ ༢༠༠༧ ཅན་མའི་དགོངས་དོན་དང་འཁྲིལ་ཏེ་ གཞི་བཙུགས་གནང་ཡོད། གཏེར་སྟོན་གྱི་རྒྱལ་པོ་ལྔའི་ཡ་གྱལ་ རིག་འཛིན་པདྨ་གླིང་པའི་མཚན་གྱི་རྗེས་སུ་འབྲངས་ཏེ་ མིང་བཏགས་ཡོད་པའི་ གཞི་ཚོགས་འདིའི་ དམིགས་ཡུལ་ཡང་ སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དང་ སྒོས་སུ་རིག་འཛིན་པདྨ་གླིང་པའི་ཟབ་ཆོས་ཀྱི་རྒྱུན་འདི་ ཇི་སྲིད་ནམ་གནས་ཀྱི་བར་དུ་ འཛིན་སྐྱོང་སྤེལ་གསུམ་གནང་ནི་དང་ རྒྱལ་ཁབ་ཀྱི་ལུགས་སྲོལ་དང་ སྔར་ཁྱུན་བཟང་པོའི་ཁྱད་ཆོས་ ཐུན་མོང་མ་ཡིན་པ་ཚུ་ ཉམས་པ་སོར་ཆུད་དང་ མི་ཉམས་གོང་འཕེལ་གཏང་ནི་ཨིན། དེ་གིས་མ་ཚད་པར་ དམ་པའི་ཆོས་དང་ སྔར་སྲོལ་གྱི་ཤེས་ཡོན་དར་ཁྱབ་བཏང་ཐོག་ལས་ མི་སྡེའི་ནང་འཁོད་ བྱམས་སྙིང་རྗེ་དང་ ཕན་ཚུན་མཐུན་འབྲེལ་ ཡར་དྲག་བཏང་སྟེ་ འཛམ་གླིང་ནང་ ཞི་བདེ་དང་དགའ་སྐྱིད་ ཕུན་སུམ་འཚོགས་ཐབས་ལུ་ བརྩོན་ཤུགས་བསྐྱེད་ནི་ཨིན། རྒྱུ་མཚན་འདི་ལུ་བརྟེན་ཏེ་ མི་ངོ་དྲག་ཞན་ཆེ་ཆུང་མེདཔ་གེ་ར་གིས་ ང་བཅས་ཀྱི་ལས་སྣ་ཚུ་ལུ་ འབྲེལ་གཏོགས་དང་ རྒྱབ་སྐྱོར་གནང་སྟེ་ འགྲོ་བ་སེམས་ཅན་ཐམས་ཅད་ཀྱི་མཐའ་དོན་ བསྒྲུབ་ཐབས་མཛད་གནང་ཟེར་ གསོལ་འདེབས་ཞུ་ནི་ཨིན།