༈ དགོན་པའི་འབྱུང་རབས་ལོ་རྒྱུས།
བཤད་སྒྲུབ་ཆོས་འཁོར་གླིང་བཙུན་མའི་གཞི་རིམ་སློབ་གྲྭ་འདི། མོང་སྒར་རྫོང་ཁག །རྩ་མང་རྒེད་འོག །རྩ་མང་ཏོ་ཀ་རི་གཡུས་ཚན་ནང་ལུ་ཆགས་ཏེ་འདུག། དགོན་པའི་མཚན་ངོ་མ་ “རྩ་མང་བཤད་སྒྲུབ་ཆོས་འཁོར་གླིང་” ཟེར་ཞུཝ་ཨིན་མས། དེ་ཡང་ཡོང་ཀ་ལའི་གཞུང་ལམ་ལས་ཀི་ལོ་མི་ཊར་ ༡༢ གི་ས་ཁར་ཆགས་ཏེ་ཡོདཔ་ལས་སྣུམ་འཁོར་ནང་དུས་ཡུན་ཆུ་ཚོད་ཕྱེད་ལྷགཔ་ཅིག་འགྱོཝ་ད་དགོན་པ་འདི་ནང་ལྷོདཔ་ཨིན་མས། གདན་ས་འདི་ངོ་མ་ར་དུས་རབས་ བཅུ་གསུམ་པའི་སྨད་ལུ་སྐུ་འཁྲུངས་མི་ཀརྨ་པ་སྐུ་ཕྲེང་གསུམ་པ་རང་བྱུང་རྡོ་རྗེ་༼༡༢༨༤༡༣༣༩༽གིས་ཕྱག་བཏབ་གནང་ནུག། ཀརྨ་པ་མཆོག་བོད་ལས་ལྷོ་མོན་ཤར་ཕྱོགས་ཁ་ཐུག་ལུ་ཕེབས་ཏེ་གདན་ས་དག་པར་ཅིག་བཏབ་གནང་ཡོད་མི་ལས་གཅིག་ཨིན་མས། ལོ་རྒྱུས་བཤད་སྲོལ་གཅིག་ལས་འབད་བ་ཅིན་ཞྭ་དམར་སྐུ་ཕྲེང་གཅིག་གིས་བཞེངས་གནང་ཡོདཔ་སྦེ་ཨིན་མས། ག་དེ་སྦེ་ཨིན་རུང་ཤུལ་ལས་དགོན་པ་འདི་ཁོང་ར་མི་སེར་ཚུ་གིས་ར་བདག་འཛིན་འཐབ་སྟེ་ཕྱག་མཆོད་ཚུ་རྒྱུན་མ་ཆད་པར་ཕུལ་སྡོད་ནུག། རྩ་མང་པའི་མི་སེར་ཚུ་བུམ་ཐང་ཨུ་ར་དགེ་ལྡན་བླམ་དང་ཙ་ཀ་གླིང་བླམ་ཚུ་གིས་སྦྱིན་བདག་ཨིནམ་ལས་ལྷ་ཁང་འདི་ནང་ལུ་བླམ་དེ་གཉིས་འཕྲལ་འཕྲལ་ར་བྱོན་ཏེ་མི་སེར་ཚུ་དང་ཆོས་འབྲེལ་མཛད་གནང་དོ་ཡོདཔ་ཨིན་མས།
༈ ལྷ་ཁང་ཉམས་གསོ་མཛད་ཚུལ།
ལྷ་ཁང་འགོ་ཐོག་གདན་ས་བཏབ་གནང་མི་གིས་ ལྷ་ཁང་ཆུང་ཀུ་ཅིག་མ་གཏོགས་བཞེངས་པའི་ལོ་རྒྱུས་མེད་རུང་ཁོང་ར་རྩ་མང་པའི་མི་སེར་ཚུ་ཙཀྐླིང་བླམ་དང་འབྲེལ་བ་བཏགས་ཏེ་བླམ་འདི་གིས་འགོ་འདྲེན་མཛད་ཞིནམ་ལས་ཁོང་ར་མི་སེར་ཚུ་གིས་ར་རྒྱ་སྐྱེད་འབད་དེ་བཞེངས་ནུག། ཁྱིམ་ཐོག་རྡོ་ལེབ་འདི་ཡང་བླམ་ཁོ་ར་གིས་ར་འཚོལ་གནང་སྟེ་བཀབ་གནང་ནུག ། ཤུལ་ལས་ད་རུང་ཡང་ལྷ་ཁང་འདི་ཉམས་ཆགས་སོང་སྟེ་དགེ་ལྡན་བླ་མ་གིས་ཡང་འགོ་འདྲེན་འབད་དེ་ཁོང་ར་མི་སེར་ཚུ་གིས་ཉམས་གསོ་འབད་ཡོད་པའི་ལོ་རྒྱུས་བཤད་ནི་འདུག།
༈ ༧སྐྱབས་རྗེ་སྒང་སྟེང་རིན་པོ་ཆེ་ལུ་རྩིས་ཕུལ་གནང་བ།
ལྷ་ཁང་འདི་རིན་པོ་ཆེ་ལུ་རྩིས་ཕུལ་གནང་དགོ་པའི་རྒྱུ་མཚད་ཡང་དང་པ་དེ་བསྒང་སྤྱི་ལོ་ ༡༩༩༩ ལུ་ ༸སྐྱབས་རྗེ་རིན་པོ་ཆེ་གིས་ཙཀྐླིང་སྒོམ་སྡེ་ནང་ལུ་སྒྲུབ་སྡེ་ཅིག་འགོ་བཙུགས་ནི་སྦེ་ད་ལྟོ་སྒྲུབ་སྡེ་ཡོད་སའི་ས་གོ་ནང་ལུ་པད་གླིང་ཆོས་འཁོར་འགོ་དང་པ་གནང་བའི་སྐབས་རྩ་མང་ལས་ཡང་མི་སེར་དང་སྒོམ་ཆེན་ལེ་ཤ་ཅིག་ཆོས་འབྲེལ་ཞུ་བར་བཅར་ཏེ་རིན་པོ་ཆེ་དང་འགོ་དང་པ་འབྲེལ་བ་བྱུང་ཞིནམ་ལས། རྩ་མང་མི་སེར་ཚུ་གིས་རྩ་མང་ལྷ་ཁང་འདི་ཡང་རིན་པོ་ཆེ་ལུ་ཕུལ་ནི་སྦེ་གྲོས་འཆམས་བྱུང་ནུག །གཉིས་པ་རྩ་མང་གཡུས་ཚན་གྱི་ཉེ་འདབས་ཙཀྐླིང་དང་བན་ཇར་དང་། གཏོར་མ་གཞོང་། ཆ་གླིང་ལུ་མང་ཤོས་ཅིག་རིན་པོ་ཆེ་གི་འགྲོ་དོན་རྒྱས་ཏེ་ཡོདཔ་མ་ཚད་གྲྭ་ཚང་དང་སྒོམ་སྡེ་ཆུང་ཀུ་རེ་བཙུགས་ཏེ་པད་གླིང་གི་ཆོས་དར་ཤིང་རྒྱས་ཏེ་ཡོདཔ་ལས། ཁོང་གི་ལྷ་ཁང་ཡང་རིན་པོ་ཆེ་ལུ་ཕུལ་བ་ཅིན་གྲྭ་ཚང་ཅིག་གཞི་བཙུགས་འབད་དེ་གཡུས་ཁ་ལུ་བླམ་ཆོས་པའི་དཀའ་ངལ་འདི་སེལ་ནི་ཨིན་མས་ཟེར་གྲོས་འཆམས་བྱུང་ནུག ། གསུམ་པ་གོང་གསལ་བཞིན་རྩ་མང་གཡུས་ཁར་ལུ་པད་གླིང་ཆོས་ལུགས་འཛིན་མི་ཙཀྐླིང་གི་སྒོམ་ཆེན་ཚུ་དང་ཆོས་འབྲེལ་སྦོམ་སྡོད་ཡོདཔ་ལས་བརྟེན་ཏེ་ཡང་ཨིནམ་འོང་ནི་ཨིན་མས། བཞི་པ་ཁོང་ར་མི་སེར་ཚུ་གིས་ལྷ་ཁང་འདི་གི་ཕྱི་ནང་གི་འཛིན་སྐྱོང་དང་ལྟ་རྟོག་ལེགས་ཤོམ་ཅིག་འབད་མ་ཚུགས་པར་རྐྱེན་འདི་ཚུ་ལས་བརྟེན་སྤྱི་ལོ་ ༢༠༠༦ ལུ་གཡུས་ཀྱི་མི་སྡེའི་འགོ་ཁྲིད་རྒཔོ་དང་མི་སེར་དམངས་མོས་མཐུན་གྱི་ཐོག་ལས་གན་ཡིག་ལག་རྗེས་དང་བཅསཔ་སྦེ་ལྷ་ཁང་འདི་ ༸སྒང་སྟེང་རིན་པོ་ཆེ་ལུ་རྩིས་ཕུལ་ཞུས་ནུག།
༈ གཞི་རིམ་སློབ་གྲྭ་འགོ་བཙུགས་གནང་བ།
སྤྱི་ལོ་ ༢༠༠༦ ལས་ལྷ་ཁང་འདི་རྩིས་བཞེས་ཞིནམ་ལས་སྒང་སྟེང་བཤད་གྲྭ་ནང་ལས་སློབ་དཔོན་ཅིག་དགོན་པ་དེ་གི་བླམ་སྦེ་བསྐོ་བཞག་གནང་སྟེ་ལྷ་ཁང་འདི་ནང་གི་རྟེན་དང་བཅསཔ་སྦེ་བླམ་དེ་གིས་རྩིས་ལེན་གནང་ནུག། དེ་ལས་རིམ་པ་བཞིན་དུ་ལོ་སྟར་གྱི་དུས་མཆོད་འབུམ་སྡེ་དང་གཡུས་སྒོ་ནང་ལུ་རྐྱེན་སེལ་རིམ་གྲོ་དང་མི་ཤིའི་དགེ་རྩ་ཚུ་བླམ་གིས་འགོ་འདྲེན་འཐབ་འབད་དེ་ཕན་ཐོགས་སྦོམ་བྱུང་ནུག། ཨིན་རུང་གཡུས་འདི་ནང་ཆོསཔ་མེད་པའི་དཀའ་ངལ་དང་གདོང་ལེན་སྦོམ་བྱུང་སྟེ་ སྤྱི་ལོ་༢༠༠༨ ལུ་མི་སེར་གྱི་རེ་འདུན་ལྟར་དགོན་པ་འདི་ནང་དགེ་སློང་ཞལ་གྲངས་༡༡ གསར་བཙུགས་འབད་དེ་གཞི་རིམ་སློབ་གྲྭ་འགོ་བཙུགས་གནང་ནུག།
༈ བཙུན་མའི་སྡེ་གསར་བཙུགས་གནང་བ།
སྤྱི་ལོ་༢༠༡༤ ལས་དགོན་པ་འདི་ནང་དུས་རྒྱུན་བཞུགས་མི་དགེ་སློང་ཚུ་སྒང་སྟེང་གསང་སྔགས་ཆོས་གླིང་གཞི་རིམ་སློབ་གྲྭ་ནང་ལུ་གནས་སོར་འོང་ཞིནམ་ལས་ ༸སྐྱབས་རྗེ་རིན་པོ་ཆེའི་ཐུགས་ཀྱི་དགོངས་བཞེད་བཞིན་དགོན་སྡེ་འདི་ཨ་ཎེའི་གཞི་རིམ་སློབ་གྲྭ་སྦེ་སྒྱུར་བཅོས་གནང་ནུག། དེ་ཡང་འགོ་དང་པ་ར་བུམ་ཐང་སྟངས་པདྨ་ཆོས་གླིང་ཨ་ཎེའི་མཐོ་རིམ་བཤད་གྲྭ་ནང་ལས་སློབ་དཔོན་གཉིས་དང་ཨ་ནིམོ་ཞལ་གྲངས་ ༢༥ བྱོན་ཏེ་འགོ་བཙུགས་གནང་སྟེ་ད་རེས་ཚུན་གྱི་བར་ན་གཞི་རིམ་སློབ་གྲྭ་སྦེ་འདུག། ད་རེས་དགོན་པ་འདི་ནང་སློབ་དཔོན་གཉིས་དང་སླབ་གཉེར་གནང་མི་ཨ་ནེམོ་གྲངས་༡༥ འདུག།
༈ ནང་རྟེན་གྱི་རིགས།
ལྷ་ཁང་འདི་ཐོག་གཉིས་སྦེ་ཡོད་ས་ལས་ཐོག་དང་པོའི་ནང་ལུ་སྟོན་པ་དང་སྤྱན་རས་གཟིགས་ ཞབས་དྲུང་གསུམ་གྱི་སྐུ་འདྲ་དང་། གཞན་གསུང་རྟེན་གྱི་རིགས་ལས་རྒྱལ་བའི་བཀའ་འགྱུར་ཚུ་བཞུགས་ཏེ་འདུག། ཐོག་གཉིས་པའི་ནང་ལུ་དུས་གསུམ་སངས་རྒྱས་ཀྱི་སྐུ་འདྲ་མི་ཚད་མ་རེ་དང་། གཡས་གཡོན་ལུ་གུ་རུ་མཚན་བརྒྱད་ཀྱི་སྨན་སྐུ་ཚུ་གཟི་བརྗིད་ཆེ་ཏོག་ཏོ་སྦེ་མཇལ་ནི་འདུག།
༈ དུས་མཆོད་འབུམ་སྡེ་དང་མ་འོངས་པའི་ལས་འཆར།
རང་ཟླ་དང་པའི་ནང་ལུ་བདེ་ཆེན་ཞིང་སྒྲུབ་ཉིནམ་གསུམ་དང་གནང་སྲོལ་འདུག། འདི་ཡང་བུམ་ཐང་ཨུ་ར་ལས་ཞིང་གཤེགས་དགེ་ལྡན་བླམ་གིས་སྦེ་གཞི་བཙུགས་གནང་སྟེ་ཧེ་མ་ཁོ་ར་སྐུ་དངོས་བཞུགས་པའི་སྐབས་སྦྱིན་བདག་མི་སེར་ཚུ་གིས་འབད་དེ་བླམ་ཁོ་ར་གིས་ར་གནང་དོ་ཡོདཔ་ཨིན་མས། ཟླཝ་ལྔ་པའི་ནང་ལུ་བཛྲ་གུ་རུ་དུང་སྒྲུབ་ཉིནམ་ལྔ་གནང་དོ་ཡོདཔ་དང་། དེ་ལས་གཞན་ཡང་པད་གླིང་འདས་མཆོད་དང་དུས་རྒྱུན་གྱི་ཡར་ངོ་མར་ངོའི་ཚེས་བཅུ་ཚུ་མ་ཆད་པར་གནང་དོ་ཡོདཔ་ཨིནམས། ཤུལ་ལས་གཞུང་ལས་གནང་བ་འཐོབ་ཞིནམ་ལས་ལྷ་ཁང་འདི་ཉམས་གསོ་ཞུ་ནི་གི་འཆར་གཞི་ཡོདཔ་ལས་ད་ལྟོ་ལཱ་ཚུ་འབད་བའི་བསྒང་ར་འདུག། ཨིན་རུང་ལྷ་ཁང་གི་ས་ཞིང་དྲིས་༣༠ མ་གཏོགས་མེདཔ་ལས་ལྷ་ཁང་ཉམས་གསོ་དང་གཞན་མཐུན་རྐྱེན་ཚུ་བཙུགས་ནི་ལུ་གདོང་ལེན་བྱུང་སྟེ་འདུག།
དགོན་སྡེའི་སློབ་དཔོན།
སློབ་དཔོན་མ་ཐུབ་བསྟན་ཆོས་སྒྲོན། ༡༧༨༠༥༢༦༨
སློབ་དཔོན་མ་ལྷག་པ་སྒྲོལ་མ། ༡༧༧༢༤༧༩༣
