༉ ནད་ཡམས་ཀོ་ཝིཊ (covid-19) གི་གདོང་ལེན་ལུ་ པད་གླིང་ཆོས་ཀྱི་དགའ་ཚལ་གཞི་ཚོགས་ཀྱི་རྒྱལ་པོའི་གཟིམ་དཔོན་ཡིག་ཚང་ལུ་མ་དངུལ་གྱི་ཞལ་འདེབས་ས་ཡ་གཉིས་གནང་ཡོདཔ།

༄།།ད་རེས་(COVID-19) ནད་ཡམས་འདི་གིས་ འཛམ་གླིང་ཡུལ་གྲུ་འདིར་ མི་གྲངས་འབུམ་ལས་བཅད་མི་ལུ་ན་ཚ་དང་ཤི་རྐྱེན་བྱུང་དོ་ཡོད་རུང་། ང་བཅས་རའི་རྒྱལ་ཁབ་ནང་ མི་དབང་མངའ་བདག་རིན་པོ་ཆེ་མཆོག་གིས་ འབངས་མི་སེར་ཚུ་ལུ་ བྱམས་བརྩེ་ཆེན་པོས་རང་གི་སྐུ་སྲོག་ལའང་མ་ཕངས་པར་ ཉིན་མཚན་མེད་པར་ ཉེན་འཚུབས་ཅན་གྱི་ས་ཁོང་ཚུ་ནང་ ཞབས་ཀྱིས་བཅགས། ཐུགས་རིག་རྣམ་པར་བཀྲ་བའི་ལམ་སྟོན་གནང་དང་གནང་བཞིན་ཡོདཔ་མ་ཚད། མི་རྗེ་བློན་ཆེན་གྱིས་གཙོས་ གཞུང་སྐྱོང་ ལྷན་སྡེའི་ངོས་ལས་འབད་རུང་ ང་བཅས་ར་ འབྲུག་མི་ཕུད་རྡོག་གཅིག་ལུ་ཡང་རྐྱེན་འཕོག་མ་བཅུག་ནིའི་དོན་ལས་ ཉེན་སྲུང་གི་ཐབས་ལམ་སྣ་ཚོགས་སྟོན་གནང་མི་ལུ་བརྟེན་ ང་བཅས་ར་འབྲུག་མི་ཚུ་ལུ་གནོད་རྐྱེན་སྦོམ་རྐྱབ་མ་ཚུགས་མི་དེ་ལུ་ཧིང་གི་གདིང་ལས་རང་བཀྲིན་དགའ་ཚོར་ཕུལ་ནི་དང་། དེ་བཟུམ་སྦེ་ནད་ཡམས་འདི་རྒྱ་ནག་རྒྱལ་ཁབ་ན་འཐོན་འདུག་ཟེར་ གོ་བའི་ཉིནམ་ལས་བཟུང་ པད་གླིང་ཆོས་ཀྱི་དགའ་ཚལ་གཞི་ཚོགས་ཀྱི་དབུ་ཁྲིད་༧སྐྱབས་རྗེ་ སྒང་སྟེང་སྤྲུལ་སྐུ་རིན་པོ་ཆེ་སྐུ་དངོས་དབུ་བཞུགས་དང་བཀའ་རྒྱ་གནང་སྟེ་ དགོན་སྡེ་ཁག་ ༣༩ ཡི་ནང་ རྒྱལ་ཁམས་ཀྱི་རིམ་གྲོ་ཟློག་ཐབས་སྣ་ཚོགས་བསྒྲུབས་དང་སྒྲུབ་བཞིན་པའི་གནས་ཚུལ་དང་འབྲེལ། ད་རིས་སྤྱི་ཚེས་༣༠/༠༣/༢༠༢༠ ལུ་མི་དབང་མངའ་བདག་རིན་པོ་ཆེའི་ (COVID-19) སྐྱིད་སྡུག་ མ་དངུལ་ལུ་དངུལ་ཀྲམ་༡༠,༠༠,༠༠༠/(ས་ཡ་གཅིག)དང་། གཞུང་གི་(COVID-19) སྔོན་འགོག་མ་རྩ་ནང་དངུལ་ཀྲམ་༡༠,༠༠,༠༠༠/- (ས་ཡ་གཅིག) ཡོངས་བསྡོམས་དངུལ་ཀྲམ་༢༠,༠༠༠,༠༠/- (ས་ཡ་གཉིས) ཞལ་འདེབས་ཕུལ་ནིའི་གོ་སྐབས་འཐོབ་ཅིག། འཛམ་གླིང་རྒྱལ་ཁབ་གཅིག་དང་ ལྷག་པར་དུ་ ང་བཅས་རའི་འབྲུག་གི་འབངས་མི་སེར་ཞི་བདེ་འབྱུང་ཐབས་དང་ ནད་ཡམ་སྔོན་འགོག་ཐབས་ཤེས་ལུ མེ་ཏོག་ཆུང་རུང་མཆོད་པའི་རྫས་སུ་དམིགས་ཏེ་ཕུལ་བ་དང་འབྲེལ་ ང་བཅས་དཔལ་གླིང་ཆོས་ཀྱི་དགའ་ཚལ་གཞི་ཚོགས་ཀྱི་བཟའ་ཚང་དང་ཐུས་མི་ སྦྱིན་བདག་ གཅིག་མཐུན་གྱིས་ཁ་ཐུག་ལས་ཐུགས་སྨོན་གང་དྲགས་བཏབས་ཏེ་བཀྲིན་བསྐྱངས་གནང་ཞུ་ལགས།།